MAKISA 25 - Disambi Dipyadipya

¹ FESTO lolo, pakadi amalwa mu mbata anci, akadikisa matuku asatu yi akaximuna ku Kyesalia kuya ku Yelusaleme.

² Yi makanda manene, yi bantu banene ba bena Yuda bakamutôyela bwalo bwa Paulu ;

³ yi bakamulomba ku bwalo bwanci, amoni loko kutuma kuya mwangata ku Yelusaleme ; bamapolamisa bantu mu ncila bamuxipi.

⁴ Mbwôso Festo akapingasa ene, Paulu anamibwi ku Kyesalia, mikyenci lolo uxeya koku mo nkyekyu.

⁵ Biakatôyayi ene, Bobo badi bantu banene yinenu bapweki kabidi yinami ; aka lolo kintu kioso kakina loko yi muntu you, bamusanyi.

⁶ Pakadi amasala yinabo matuku ndo yenana ndo disangi, akapweka ku Kyesalia ; yi ku diba dia mankyelo, akaxikama ku kisambolelu, yi akatôya ene, Paulu acwadibwi.

⁷ Pakalwayi lolo, bena Yuda bakapweka ku Yelusaleme bakakwemana, bakamusanya masanya mangi a maxitu atalubukwabo kwebesa ;

⁸ yi Paulu akatôya ku bwalo bwanci ene, Kionene pô ndo bwalo bwa bwadi bwa bena Yuda, ndo bwalo bwa tempelo, ndo bwalo bwa Kyesa.

⁹ Mo Festo akapalala kunonebwa nonu kudi bena Yuda, akapingasa Paulu ene, Wananga kuya ku Yelusaleme, kuya sambolebwa malo aa koku ku mpala amene ?

¹⁰ Kaninga Paulu akatôya ene, Ntanakwemana ku buxi bwa kisambolelu kia Kyesa, kunxesambolebwa ; ku bwalo bwa bena Yuda, meme kienceli bubi, bialubukwa mikyebe bimpe.

¹¹ Aka lolo namakwona bwalo bwoso, yi namakwenca kintu kioso kialelekyela yi kufwa, kisonyañana kufwa ; kaninga aka malo aa kayenako amangusanyabo, muntu kabiyi kungulongola kudibo. Ngwabila Kyesa.

¹² Kunyuma Festo, pakadi amakwambilañana yi kikokye, akapingasa ene, Wamakwabila Kyesa ? Kudi Kyesa ndo kunaya.

¹³ Pakadika lolo amo matuku, fumu Angilipa akafika ku Kyesalia yi Beniki, yi bakakwela Festo môyo.

¹⁴ Yi pakasalabo koku matuku mangi, Festo akakwebesa fumu bwalo bwa Paulu, ene, Muntu udiko amaxiyibwa ku lukanu kudi Felixi ;

¹⁵ ku bwalo bwanci, binakadi ku Yelusaleme, makanda manene yi babakulu ba bena Yuda bakatôya, badi mu kulomba, ene, abelebwi.

¹⁶ Nakabatôyela ene, kakuna mwosambu ă bena Loma ndo kulongola muntu mwoso buxi bwamamonañana musanyibwi yi basanyi ku mpala, yi amamona kipoma kia kukyata ku bwalo bwanci.

¹⁷ Mbwôso pakasangilabo kunu, kiakwopisa, mo ku diba diamubidi nakaxikama mu kisambolelu, yi nakatôya ene, mwamulumi acwadibwi.

¹⁸ Ku bwalo bwanci, pakakwemana basanyi, bakadi kabasomusanya dia malo mabi anakakwela lukanyi,

¹⁹ kaninga bakakwelesañana yinanci mbata dia kixingilu kiabo, yi dia muntu Yisu akamafwa, akatôya Paulu ene, udi yi môyo.

²⁰ Yi binakadi mikyemi kisolubukwa loko kwapangusañana dia malo aa, nakamwapangusa ndo ananga kuya ku Yelusaleme, kuya sambolebwa koku pa malo aa.

²¹ Mo pakakwabila Paulu kunamibwa ku diyi dia Angusto, nakatôya ene, anamibwi binxemutuma kudi Kyesa.

²² Yi Angilipa akatôyela Festo ene, Mikyemi kabidi namananga kwombwa muntu you. Yei ene, Mankyelo lolo, unamwombwa.

²³ Mbwôso ku diba dia mankyelo, pakalwa Angilipa yi Beniki yi dikai dingi, bamabwela lolo mu kidi kia kwombwa malo, yi biliaka, yi bena bikupu bia mu bula,—ku diyi dia Festo kwakacwadibwa Paulu munda.

²⁴ Yi Festo akatôya ene, Fumu Angilipa, yi bantu boso bamasangila yinecu kunu, nwamona mwamulumi you, amangulula bungi bwa kimbukuma kia bena Yuda, ku bwalo bwanci, yi ku Yelusaleme yi kunu, badi mu kwamena ene, kaxesala yi môyo kabidi pô.

²⁵ Kaninga meme nakamusañana kakixili bwalo bwoso bwa kufwa ; yi bwalo bwamakwabilayi Angusto mikyenci, namakwenca ene, mutumi.

²⁶ Ku bwalo bwanci, kiena yi diembi dia loko dia kutumina fumwami. Binamamucwala ku mpala enu, yi ku buxi bwebe mikyebe, fumu Angilipa ; bitwamamana kukwakwala bwalo loko, nakwakala yi diyi dia kufunda.

²⁷ Bwalo bungwakisă ene, kakuna bwinu pô kutuma musungi, kutena lolo kwebesa malo amamusanyabo.