MAKISA 24 - Disambi Dipyadipya

¹ YI kunyuma kwa matuku atano kwakalwa bokanda bunene Anania yi banga babakulu, yi kitenci yinabo dina dienci ene, Tetulo ; yi bakasanya Paulu ku mpala a mulopwe.

² Yi pakabikidibwayi, Tetulo akabanga kumusanya, ene, Bwalo butwamona polo mungi kudi, yi madi anengela amakwelebwa mu bubila bobu bwalo bwa lukanyi lwebe,

³ twaxinga matuku moso yi ku bidi bioso, idyanga Felixi, yi biloba bingi.

⁴ Kaninga bintaxedya kikondo kiebe kingi, nkwalomba unatwombwa kakondo kabende ku bonkangi bwebe.

⁵ Bwalo butwamasafiana muntu you muna mulaku mungi, mutombokyexi a bena Yuda ku bungi bwa loboko, yi muntu munene a kibumbu kia baNasalete ;

^6-7 akapalala lolo kwona tempelo ; utwakakwata coco kabidi ;

⁸ yi owe, ndo unamwapangusa mikyebe, unalubukwa kulembetela malo aa noku moso atwamamusanya.

⁹ Yi bena Yuda kabidi bakakwetabusafiana yi lusanyi, ene, malo aa adi mo nako.

¹⁰ Yi pakadi mulopwe amamusongela kianca, Paulu akakyata ene, Bwalo bunkwalubukwa ene, wapwakala musambodi a malo a bubila bobu mbula mingi, ndo bungwakyata ku bwalo bwamene yi mulukutu ;

¹¹ bwalo buxelubukwa ene, matuku atani mo disangi yi abidi, anakaya ku Yelusaleme kuya xingila ;

¹² yi ku tempelo kabasongusañana ngwelesafiana yi muntu mbata, ndo kuteka muyengi ă bantu kumoni, ndo munda mwa bixingidilu, ndo mu bula.

¹³ Kabasolubukwa pako kwebesa malo angwasanyilabo nkyekyu.

¹⁴ Kaninga nkwasakolela ene, Mu Ncila abikilabo ene, Busaluki, ndo mungwasadila Ncembi a batetecu, ndi mu kwetabusa bintu bioso biamafundibwa mu bwadi, yi kudi badimuxi ;

¹⁵ ndi yi mudingidilu ă Ncembi ădingidilabo mikyeabo, ene, Kubika kwa bafu kunalwa kwa bena nkwami yi kwa bena bubi.

¹⁶ Ku bwalo bobu ndo kungwapalala kwakala yi kilubukilu kia munda kitena kwona ku bintu bioso ku meso a Ncembi yi ku meso a bantu.

¹⁷ Pakamadika lolo mbula mingi, nakafika, ndi mu kucwadila bubila bwamene malongi a mwengo, yi amo malongi.

¹⁸ Mbwôso bakangusañana mu tempelo, namakusudibwa, kiena yi bantu, ndo yi muyengi kumoni.

¹⁹ Kaninga banga bena Yuda ba mu Asia :—baxemoneka kunu ku mpala ebe ndo kungusanya, ndo batani yi bwalo kutôya ku mucwe ămene.

²⁰ Kaninga babalumi baba mikyeabo batôyi dia kwona kwoso kwakamonabo panakakwemana ku kikokye,

²¹ kutena ambeci bwalo bwa diyi dedi dimodimwe dinakakwamena, binakakwemana pakacikaci pabo, ene, Ku bwalo bwa kubika kwa bafu ndo kunamasambolebwa kunudi lelo.

²² Mo Felixi, pakalubukwayi sôsôlwo dia Ncila, akabopisa, ene, Panapweka Lisiasa kiliaka, nakumana bwalo bwenu.

²³ Yi akatôyela kapalai ene, amunami, amwendesi bimpe, kamunyañanini muntu mwoso a bimbila bienci kumusadila.

²⁴ Mo kunyuma kwa matuku mabende kwakalwa Felixi yi Dusila mukasanci, akadi muna Yuda, akatuma ndo kwangata Paulu, yi akamwombwa bwalo bwa kwetabuxila Kalistu Yisu.

²⁵ Yi pakasakolayi dia nkwami, yi dia mulangu ku mucima, yi dia lopelo lutanalwa, Felixi akalukuta, yi akapingasa ene, Yaka biebe nkyekyu ; panamona kipoma kinengela nakukubikila kundi.

²⁶ Akadingila kabidi mpalata ambeci yinamupebwa kudi Paulu ; biakamubikilayi lolo mabikila mangi, yi akakwambilañana yinanci.

²⁷ Mo pakapwa mbula ibidi, Felixi akanyamunibwa kudi Pôkio Festo akamukita ; yi Felixi bwalo bwakakyebayi kumonebwa yi dikasa dinengela kudi bena Yuda, akaxiya Paulu ku lukanu.