MAKISA 22 - Disambi Dipyadipya

¹ BENA kwami yi batete, nwombwi bwalo bwamene bunwasakolela nkyekyu.

² Pakakwombwabo utanabambila diyi dia luna Ebeleo, bakapudikila nya, yi yei akatôya ene,

³ Meme ndi muna Yuda, nakalelebwa ku Taso mu Kilikia, kaninga nakabungudibwa ku bula kunu ku makasa a Ngamaliele, nakakweyexebwa bea luna mwosambu ă bwadi bwa batetecu, yi nakakala yi mulukutu ku bwalo bwa Ncembi, bea binudi nu-a-bwoso lelo ;

⁴ nakakolomona bena Ncila you isanga ku lufu, ndi mu kusuka yi kuteka mu ncibo ya nkanu yi babalumi yi babakaxi.

⁵ Byekyene binangutôbôlela bokanda bunene ntôbô yi bungi bwa bwabukulu. Yi nakangata mikanda kudibo kabidi ya kuya kudi bena kwecu ; yi nakaya ku Damasako kuya cwala bobo kabidi bakadi koku, ku Yelusaleme, basuka, kulwa kumibwa.

⁶ Pakadi ndi mu kwenda lwendo lwamene, yi namakokyela pepe yi Damasako, pa munyinya pakacikaci, pakalumuka obo munene mangwoso munda mwa diulu akangudinga kô.

⁷ Yi nakapona paxi pa loboko, yi nakakwombwa diyi diakangutôyela ene, Saulu, Saulu, kukai ungwakolomona meme ?

⁸ Yi nakapingasa ene, Owe ndo ñani, Fumu ? Yi akangwambila ene, Meme ndi Yisu a Nasaiete akolomona owe.

⁹ Yi bobo bakadi yinami bakamona obo sôsôlwo, mo kabombweli diyi dienci dia you akatôya yinami.

¹⁰ Yi nakatôya ene, Nakukisa kai, Fumu ? Yi Fumu akangwambila ene, Emana, yaka munda mwa Damasako ; momu munakwambidibwa dia bintu bioso biamakusungudibwa ndo kwenca.

¹¹ Binakadi kibiyi kumona bwalo bwa dikai dia obo you, nakaxiyibwa ku kianca, kudi bantu bakadi yinami, yi nakalwa munda mwa Damasako.

¹² Yi Anania, muna nkwami ya bwadi, akakala yi dina dinengela kudi bena Yuda boso bakadi koku,

¹³ akalwa kundi, yi akakwemana pepe yinami, yi akatôya ene, Muna kwami Saulu, angata meso ebe. Yi meme nakangata meso amene pa ola you, yi nakamumona.

¹⁴ Yi yei ene, Ncembi a batetecu amakusungula ndo kulubukwa nyinga yenci, yi kumona Muna nkwami yiwa, yi kwombwa diyi ku musuku ănci.

¹⁵ Bwalo bunakala owe mutôbôdi ku bwalo bwanci kudi bantu boso, a bintu biapumona, yi biapwombwa.

¹⁶ Nkyekyu lolo, kukai wakunga ? Emana, numeyebwa, kusula mabi ebe, pa kwabila dina dienci.

¹⁷ Yi pakadi namapiñana ku Yelusaleme, binakadi mu kulomba mu tempelo, nakalwa bea mu dilu dia tulu,

¹⁸ yi nakamumona utanangwambila ene, Sangola, ncuka mangwoso mu Yelusaleme bwalo butasoangatabo ntôbô yebe ku bwalo bwamene.

¹⁹ Yi nakatôya ene, Fumu, bamalubukwa mikyeabo ene, nakateka bantu ku lukanu yi nakakuma bantu ku kixingidilu kioso, bamakwetabuxila ;

²⁰ yi pakancudibwa maxi a Stefano mutôbôdi ebe, meme kabidi nakakwemana papa, yi nakakwetabusa, yi nakanama bilamba bia bantu bakamuxipa.

²¹ Yi akangwambila ene, Yaka, bwalo bunakutuma kulekule kunu kudi mabila.

²² Yi bakamwombwa pôi diyi dedi ; yi bakakwamena diyi diabo ene, Xakwala muntu a noku ku loboko, bwalo butasolelekyelayi yi kwakala yi môyo.

²³ Yi pakakwamenabo, yi bakapulula bilamba biabo, yi bakakwela yimbwi kulu,

²⁴ kiliaka kiakatôya ene, abwexebwi munda mwa lumbu lwa masalai, akwakwadibwi bwalo bwanci pa kukumibwa, bixelubukwayi bwalo bwamamubandixilabo meyi nako.

²⁵ Yi pakamusukabo miekaba, Paulu akatôyela kapalai kakakwemana papa, ene, Kwalelekyela yi bwadi, nonu kukuma muntu, muna Loma, utena mubela ?

²⁶ Yi pakakwombwa kapalai noku akaya kudi kiliaka yi akamutôyela ene, Utanakyeba kwenca kiñani ? bwalo budi muntu you muna Loma.

²⁷ Yi kiliaka kiakalwa yi kiakamwambila ene, Ungwambili, udi muna Loma ? Yi akatôya ene, Ya.

²⁸ Kiliaka kiakapingasa ene, Ku dipiko dikola ndo kunakakwola bwana bwa bula bobu. Yi Paulu ene, Kaninga meme nakalelebwa noku.

²⁹ Bobo lolo baxemukwakwala bakancuka kudiyi mangwoso, yi kiliaka kabidi kiakacina pakalembetelayi ene, udi muna Loma, yi bwalo bwakamusukayi.

³⁰ Kaninga ku diba diamubidi, bwalo bwakakyebayi kulubukwa sôsôlwo ku bwalo kai kwakasanyibwayi kudi bena Yuda, akamusula, yi akatôyela makanda manene yi bungi bwa kikpkye ene, bakokami ; yi akafikisa Paulu, yi akamuteka ku mpala yabo.