MAKISA 17 - Disambi Dipyadipya

¹ PAKADI bamadika mu Amafipoli yi Apolonia, bakalwa ku Tesalonika kwakadi kixingidilu kia bena Yuda.

² Yi Paulu akabwela kudibo bea biakadi mwosambu ănci, yi ku matuku asatu a sabado kwakakwambilayi yinabo mu mukanda ă Ncembi,

³ akatôya yi akakwebesa ene, Kalistu akadi yi bwalo bwa kutata yi bwa kubika kabidi kudi bafu ; yi, ene, Yisu you ungwasakola kunudi udi Kalistu.

⁴ Yi banga bakakwetabusa, yi bakasangilañana yi Paulu yi Silasa, yi bena Ngiliki bakadi yi bowa bwa Ncembi kibumbu kinene, yi babakaxi banene bangi.

⁵ Kaninga bena Yuda bakatepexebwa yi mwokunyo, bakasangisa banga babalumi babi ba kanana, yi bakakokyeya kimbukuma kia bantu, yi bakateka bula muyengi mutupu ; bakadinga ncibo a Yasono, bakapalala kubabatusa kudi bantu.

⁶ Kaninga pakadi kabasobasañana, bakaputulula Yasono yi banga bakunyi kudi milopwe ya bula, badi mu kwamena ene, Bantu baba bamapudeya loboko mpala muxi bamalwa kunu kabidi ;

⁷ yi Yasono apubangata ; baba noku boso bamatanda yi madi a Kyesa, ene, munga fumu udiko, Yisu.

⁸ Yi bakanyingisa bantu yi milopwe ya bula, pakakwombwabo bintu bebi.

⁹ Yi pakadi bamancudisa Yasono yi bena kwanci luba, bakabalekyela.

¹⁰ Mo bakunyi bakatuma Paulu yi Silasa mangwoso ku butuku ku Belea ; bobo, pakafikabo, bakabwela mu kixingidilu kia bena Yuda.

¹¹ Baba noku bakadika bena Tesalonika nkwami, bwalo bwakangatabo diyi yi mulukutu mwoso, bakapalala mu mukanda ă Ncembi ku dituku ku dituku, ndo bintu bebi bitani noku.

¹² Ndo biakakwetabusa bantu bangi kwabo ; babakaxi ba bena Ngiliki lolo ba bena bikupu, yi babalumi bangi.

¹³ Mo pakalubukwa bena Yuda ba ku Tesalonika ene, diyi dia Ncembi diamakwambidibwa ku Belea kabidi kudi Paulu, bakalwa koku kabidi, kulwa nyingisa yi kutepesa bimbukuma.

¹⁴ Ku kikondo kieki lolo, bakunyi bakancula Paulu mangwoso bea kuya ku mai manene ; kaninga Silasa yi Timoteo bakasala koku.

¹⁵ Mo bobo bakaxiyaxiya Paulu bakamucwala pôi ku Atene ; yi pakangatabo diyi bwalo bwa Silasa yi Timoteo ene, baxelwa kudiyi mangwoso mangwoso, bakancuka.

¹⁶ Kaninga, pakabakungila Paulu ku Atene, mucima ănci ăkaputowa munda mwanci, pa kumona bula bwamakwolubila yi ngixi.

¹⁷ Biakakwambilayi mu kixingidilu yi bena Yuda, yi bena bowa bwa Ncembi, yi ku dibanca dia kisalu diba dioso yi bantu bakapomana yinanci.

¹⁸ Yi banga bena nkanyi kabidi ba bena i Epikulo yi baStoiki bakafwilañana yinanci. Yi banga bakatôya ene, You mutabakani akyeba kutoya kai ? Banga ene, Ulexi yi luna mwambidi a ngixi ya babene ; bwalo bwakakwambilayi dia Yisu yi dia kwombuludibwa kwa bafu.

¹⁹ Yi bakamukwata yi bakamucwala ku Aleopango ene, Twanangapo kulubukwa kweyesa koku kupyakupya, kwamakwambidibwa kudi.

²⁰ Bwalo bwafikisa mambi ku macu ecu atutasolembetela. Mbwôso twakyebapo kukita ku dicina dia mambi aa.

²¹ (Kaninga bungi bwa bena Atene yi bantu babene baxikama koku bamana kikondo kiabo, kumoni ku bunga bwalo mo kwambila ndo kwombwa munga mwoximo.)

²² Yi Paulu akakwemana pakacikaci pa Aleopango, yi akatôya ene, Bena Atene, ngwamona ene, ku bintu bioso nwamalekola yi kixingilu kia ngixi.

²³ Panakadika, nakamona nkinda yenu, nakasañana kabidi kilongolelu kiakafundibwa mukanda ene, KUDI NCEMBI UTASOLUBUKIBWA. Mbwôso you unwanemeka kutena kumulubukwa, udi you unwasakolela.

²⁴ Ncembi you akapanga loboko yi bintu bioso bidi momu, kayou, apwakala Fumu a diulu yi a loboko, kasoakala munda mwa tempelo yamapangibwa ku makaci,

²⁵ kasosadidibwa yi bianca bia bantu bea ndo amakwabila kintu, bwalo bupapayi bantu boso môyo mikyenci, yi lomo, yi bintu bioso ;

²⁶ yi akapanga lolo bubila bwoso bwa bantu butonga bwabo bumobumwe bakali ku bungi bwa mpala a loboko ; akalungika lwedi lwa mieciya yabo, yi mielelo ya mbata yabo ;

²⁷ bixepalalabo Ncembi, ndo ambeci baxebabata, baxemusokolola, isanga kiena kulekule kudi muntu mwoso kutudi ;

²⁸ bwalo butudiko, yi twendenda, yi twakala yi môyo munda mwanci ; bea biamatôya banga bapangi benu ba misambu kabidi ene, Bwalo bututani coco kabidi bana banci.

²⁹ Mbwôso bwalo butwakala bana ba Ncembi, katuxekwenca ene, Buncembi budi luna ôlo, ndo mpalata, ndo dibwe, kifwanisa kisonga kia bwanya bwa muntu yi kia lukanyi lwanci.

³⁰ Mbwôso Ncembi amadikisa bikondo bia bwilwa ; kaninga nkyekyu udi mu kutôyela bantu ene, bungi bwabo badi mu bidi bioso badibeli :

³¹ bwalo bwamalungikayi diba dinasamboiayi loboko kusambola kwa nkwami kudi muntu you amasungulayi ; yi amaiayisa bantu boso noku bwaio bwamamubisayi kudi bafu.

³² Yi pakakwombwabo dia kubisa kwa bafu, banga bakakyeca ; kaninga banga ene, Tunakwombwa kabidi dia bwalo bobu.

³³ Mo nako Paulu akancuka kudibo.

³⁴ Mo banga bantu bakasangila yinanci yi bakakwetabusa ; Dionisio akadi yinabo kabidi, muna Aleopango, yi mwamukaxi dina dienci ene, Damalisi, yi banga yinabo.