MAKISA 16 - Disambi Dipyadipya

¹ YI akalwa ku Debe yi ku Lustula ; yi mona, mweyi akadi koku, dina dienci ene, Timoteo, mwana a mwamukaxi a bena Yuda, mwetabuxi, kaninga tetenci ndo muna Ngiliki.

² You akatôbôlebwa ntôbô yinengela kudi bakunyi ba ku Lustula yi ba ku Ikonyumu.

³ Paulu akananga kumwendesa yinanci, ndo biakamwangatayi yi akamwela bwadi ku bwalo bwa bena Yuda bakadi mu mbata yei ; bwalo bwakalubukwa bungi bwabo ene, tetenci udi muna Ngiliki.

⁴ Yi pakatangabo mu mala, bakabalongola milangu kunama yakalangibwa kudi batumibwi yi babakulu bakadi mu Yelusaleme.

⁵ Mbwôso bikokye biakasubixibwa mu kwetabusa, yi bakalunda ku bungi dituku dioso.

⁶ Yi bakadika mu mbata a Filingia yi Ngalatia, bwalo bwakalangibwabo mulangu kudi Mwoxixi a babala, kumoni kutôya diyi mu Asia ;

⁷ yi pakapwekabo pepe yi Misia bakapalala kuya ku Bitunia, yi Mwoxixi a Yisu akadi kasobayisa ;

⁸ pakadikabo Misia lolo, bakapweka ku Toloasa.

⁹ Yi dilu diakamoneka kudi Paulu ku butuku ; mwamulumi, muna Makyedonia, akadiko, amakwemana yi amamuxengula ene, Sabuka ku Makyedonia, utukwacisi.

¹⁰ Yi pakadi amamona dilu twakapalala mangwoso kwenda ku Makyedonia, twakalembetela ene, Ncembi aputubikila tubambili losangu lunengela.

¹¹ Mbwôso twakancuka lwa kibusu ku Toloasa, yi twakaxembama swi kuya ku Samotolaki, yi ku diba diamubidi ku Neapoli ;

¹² kunyuma ku Filipi, kudi bula bwa buxi bwa kicini kieki kia Makyedonia, kudi kingandu kia bena Loma, Yi twakasala ku bula bobu matuku mabende.

¹³ Yi ku diba dia sabado twakaya kunci kwa kibwelelu pepe yi ncedi, pakadi mwosambu ăbo ndo kulombela ; yi twakaxikama yi twakakwambila babakaxi bakadi bamasangilañana.

¹⁴ Yi mwamukaxi umoumwe, dina dienci ene, Lidia, mwodixi a bilamba, muna bula bwa Tiatila, akaxingiia Ncembi, akatwombwa ; akadipula Fumu mucima ănci ndo kwombwela bintu biakatôyebwa kudi Paulu.

¹⁵ Pakadi amanumeyebwa yi bena nkumbu anci, akatubondabonda ene, Ndo nwamangwenca ndi muna kibaku ku bwalo bwa Fumu, nulwi ku ncibo amene, nusali koku. Yi akatwetabuxisa.

¹⁶ Pakadi lolo tutanaya kuya lombela, mupika a babakaxi, akakala yi kidimu kia bubuki, akapomana yinecu, akafikixila bafumu banci bima bingi bwalo bwa bubuki bwanci.

¹⁷ You akalabela Paulu yi coco, yi akakwamena ene, Babalumi baba badi basadi ba Ncembi a kulu, bamanwambila dia ncila a kupandixibwa.

¹⁸ Nako kwakakwencayi matuku mangi. Kaninga Paulu akakwombwa buxitu bungi, akakulumuka, akatôyela kidimu ene, Nkwatôyela mu dina dia Yisu Kalistu, ene, batuka munda mwanci. Yi kiakabatuka pa ola you.

¹⁹ Bafumu banci lolo, pakamonabo mudingidilu ă bima biabo ămancuka, bakakwata Paulu yi Silasa, yi bakabaputulula ku dibanca dia kisalu, ku mpala ya bantu banene ;

²⁰ yi pakadi bamabafikisa kudi basambodi ba malo, bakatôya ene, Babalumi baba, badi bena Yuaa, bamanyingisa bula bwecu bongonco,

²¹ beyesa miesambu yitasolelekyela coco kwangata, ndo kwenca, badi bena Loma.

²² Yi kimbukuma kiakabasangila ndongo, yi basambodi ba malo bakabapulula bilamba biabo, yi bakatôya ene, bakakumi mici.

²³ Pakadi bamababaka miekolola mingi, bakabela mu ncibo a lukanu, bakatôyela munami a ncibo ene, abanami kunama kwa loko ;

²⁴ you noku, papwangatayi diyi diaku dedi, akabela mu ncibo a munda yi akasuka makasa abo mibumba nda.

²⁵ Kaninga pakacikaci pa butuku Paulu yi Silasa bakadi mu kulomba, yi bakakwembikixila Ncembi misambu, yi misungi yakabombwela.

²⁶ Yi loboko lwakatepa kutepa kungi mangwoso, biakanyingixibwa bibangolelu muxi mwa ncibo a lukanu ; yi mbelo mioso yakadipudibwa mangwoso, yi mixinga yabo ya bungi bwabo yakasudibwa.

²⁷ Yi munami a ncibo akabixibwa mu tulu, yi akamona mbelo ololwo ya ncibo a lukanu, akasomona mwele ănci, uxedixipa mikyenci, akakwenca ene, misungi yamakwongoloka.

²⁸ Mo Paulu akakwamena yi diyi dikola ene, Kuditatixi mikyebe, bwalo bututani kunu bungi bwecu kô.

²⁹ Yi akabikila minda, akalwa munda lubilu, udi mu kulukuta lukomba, akapona paxi ku mpala ya Paulu yi Silasa ;

³⁰ akababatusa lolo yi akatôya ene, Bakyelengi, nkisi beci ndo kupandixibwa môyo ?

³¹ Yi bakatôya ene, Etabuxila Fumu Yisu, yi unapandixibwa, owe yi nkumbu ebe.

³² Yi bakamwambila diyi dia Fumu, yi bantu boso bakadi mu ncibo anci.

³³ Yi akabangata pa ola you a butuku yi akakusula miekolola yabo ; yi akanumeyebwa, mikyenci yi bena nkumbu anci boso mangwoso.

³⁴ Yi akababwesa munda mwa ncibo anci, yi akakwadisa mesa, yi akaxekyelela, yi bungi bwa ncibo anci, amakwetabuxila Ncembi.

³⁵ Mo pakalwa munyinya, basambodi ba malo bakatuma masalai ene, Lekyela babalumi baba.

³⁶ Yi munami akasakolela Paulu meyi aa, ene, Basambodi ba malo bamatuma ene, nulekyelebwi ; mbwôso nkyekyu nubatuki, nuyi polo.

³⁷ Kaninga Paulu akabambila, ene, Bamatukuma ku mpala ya bantu, kutena twamabelebwa, coco badi bena Loma, yi bamatwela mu ncibo a lukanu ; nkyekyu lolo batwatenyeka ku busoko ? Kañana ; kumoni ; kate balwi mikyeabo batubatusi.

³⁸ Yi masalai akasakolela basambodi ba malo meyi aa, yi bakacina pakakwombwabo ene, badi bena Loma.

³⁹ Yi bakalwa babondabonda, yi pakadi bamababatusa kunci, bakabalomba babatuki mu bula.

⁴⁰ Yi bakabatuka mu ncibo a lukanu, yi bakalwa kwa Lidia ; yi pakadi bamamona bakunyi, bakababondabonda yi bakancuka.