MAKISA 14 - Disambi Dipyadipya

¹ KU Ikonyumu lolo kwakabwelabo ndongo mu kixingidilu kia bena Yuda, yi bakatôya kutôya kwa noku, biakakwetabusa kibumbu kinene kia bena Yuda yi baNgiliki.

² Kaninga bena Yuda batakwetabusa bakanyingisa nkanyi ya bena mabila yi bakabanyañanisa bakunyi.

³ Mbwôso bakasala koku kikondo kingi, badi mu kutôya yi mucima mu Fumu, akakwencañana yi diyi dia lwoxixi lwanci, akapa bilayixilu yi bikamakama kwencebwa ku makaci abo.

⁴ Mo bungi bwa bula bakakwatolañana : banga bakadi yi bena Yuda, yi banga yi batumibwi.

⁵ Yi pakadi bamasangilañana yi bena mabila yi bena Yuda yi bantu babo banene, kulwa bakolomona, yi kubela mabwe,

⁶ bakalubukwa, yi bakacina ku mala a Lukaonia, ku Lustula yi ku Debe, yi ku mbata papa,

⁷ yi bakakwambila losangu lunengela koku.

⁸ Ku Lustula lolo kwakaxikama muntu amafwa mikolo, kikomo pôi difu dia mamanci, utakwenda pô.

⁹ Yei akakwombwa Paulu udi mu kutôya ; you noku akamuxingulula akamumona udi yi kwetabusa kwa kupandixibwa,

¹⁰ akatôya yi diyi dikola ene, Emana ku makasa ebe mwema. Yi akatamba kulu, akakwenda.

¹¹ Pakamona bimbukuma mwakakwenca Paulu, bakabandisa meyi abo Luna Lukaonia ene, Bancembi bamakwelekyexebwa luna bantu bamapweka kutudi.

¹² Yi bakabikila Banabasa ene, Seusu, yi Paulu ene, Eleme, bwalo bwakadikayi yi kutôya.

¹³ Yi bokanda bwa Seusu akakala ku mpala a bula, bwakacwala ñombi yi bidinga bia masusu ku bibwelelu, buxelongola malongi mosa yi bimbukuma.

¹⁴ Kaninga pakadi batumibwi Banabasa yi Paulu bamakwombwa, bakapanda bilamba biabo yi bakabatuka mbilu pakacikaci pa kimbukuma, badi mu kwamena

¹⁵ ene, Babalumi, kukai nwencenca bintu bebi ? Coco kabidi badi bantu butonga bumobumwe yinenu, twamaiwa nwambila losangu lunengela ene, nukulumuki kudi bintu bebi bia kanana kudi Ncembi a môyo, akapanga diulu yi loboko yi mai manene, yi bintu bioso bidi munda mwabio ;

¹⁶ yei, ku mieciya ya kalikali, akalekyela mabila moso ayi yi miesambu yabo mikyeabo.

¹⁷ Kaninga kadixiyili mikyenci kutena ntôbô, bwalo bwakakwencayi kunengela, akanupela mu diulu yi mbula yi layinga ya loko, akakwolubisa micima yenu yi bidya yi kiango.

¹⁸ Kaninga isanga ku meyi aa kuxepwangwabo kuximba bimbukuma, kababalongodi malongi mosa.

¹⁹ Mo koku kwakalwa bena Yuda ba ku Antioko yi ba ku Ikonyumu ; yi pakadi bamakwetabuxisa bimbukuma, bakakwela Paulu mabwe, yi bakamuputulula kunci kwa bula, bakakisa ene, afufwa.

²⁰ Kaninga pakamudinga beyi, yei akabika yi akabwela munda mwa bula. Mankyelo lolo akancuka yi Banabasa kuya ku Debe.

²¹ Yi pakadi bamakwambila bula bobu losangu lunengela, yi bamakwetabuxisa beyi bangi, bakapiñana ku Lustula yi ku Ikonyumu yi ku Antioko,

²² yi bakakolesa micima ya beyi, bakababondabonda baxini yi kwetabusa, ene lolo, ku mpeya mingi ndo kutwabwela mu bufumu bwa Ncembi.

²³ Yi pakadi bamabasungudila babakulu mu kikokye kioso, yi bamalomba yi kuncila kwa bidya, bakabateka ku makaci a Fumu akakwetabuxilabo

²⁴ Yi bakatanga mbata a Pisidia yi bakalwa ku Pamafilia.

²⁵ Yi pakakwambilabo diyi mu Penge bakapweka ku Atalia ;

²⁶ bakasabuka koku lolo ku Antioko, kwakatekyebwabo mu lwoxixi lwa Ncembi, bwalo bwa mudimo ăkamanabo.

²⁷ Pakadi bamafika, yi bamakokyeya kikokye, bakasakola bintu bioso biakakwenca Ncembi yinabo, mwakadipudilayi mabila mbelo a kwetabusa.

²⁸ Yi bakasala yi beyi kikondo kingi.