MAKISA 13 - Disambi Dipyadipya

¹ KU Antioko lolo, ku kikokye kiakadi koku, kwakadi badimuxi yi beyexi ; Banabasa, yi Sumeono akabikidibwa ene, Ningele, yi Lukio muna Kulene, yi Manene, akalundixibwa mu ncibo umoumwe yi Elodo, tetelaka, yi Saulu.

² Yi pakasadilabo Fumu, badi mu kundia bidya, Mwoxixi a babala akatôya ene, Nungunamunini Banabasa yi Saulu bwalo bwa mudimo unamababikidila.

³ Pakadi lolo bamandla bidya, yi bamalomba, yi bamabaka bianca biabo kulu kwabo, bakabalekyela.

⁴ Mbwôso bobo, bakatumibwa kudi Mwoxixi a babala, bakapweka ku Selukia, yi bakasabuka koku kuya ku Kupuloso.

⁵ Pakadibo ku Salamisi bakakwambila diyi dia Ncembi mu bixingidilu bia bena Yuda, yi bakadi lolo yi Yoano musadi abo.

⁶ Pakadi bamatanga mu bungi bwa kisala pôi ku Pafo, bakasañana muntu, mubuki, mudimuxi a ncimi, muna Yuda, dina dienci ene, Bayisu,

⁷ akadi yi mulopwe munene Sengio Paulu, muntu a bwinu. You noku akabikila Banabasa yi Saulu kudiyi, akakyeba kwombwa diyi dia Ncembi,

⁸ Mo Elumasa, mubuki, (bwalo budi sakolo a dina dienci noku) akatanda yinabo, akapalala kuungisa mulopwe munene kudi kwetabusa.

⁹ Kaninga Saulu, abikidibwa kabidi ene, Paulu, akakwolubixibwa yi Mwoxixi a babala, akamuxingulula,

¹⁰ yi akatôya ene, Owe wamakwolubilañana yi ncimi mioso yi mancanga moso ; mwana a Diabolo, mutandañani yi nkwami mioso ; kunalekyela kupeteya ncila yinengela ya Fumu ?

¹¹ Nkyekyu, mona, kianca kia Fumu kidi kulu kwebe, unakala mufofo, kunamona diba kikondo. Yi lubungi lwakamuponena mangwoso yi mwedima ; yi akababata babata ndo kupalala bantu bamuxiyixiyi ku kianca.

¹² Mulopwe munene lolo, pakamonayi mwakakwencebwa, akakwetabusa, amakamina kweyesa kwa Fumu.

¹³ Yi Paulu yi kibumbu kienci bakasabuka ku Pafo, yi bakalwa ku Penge mu Pamafilia ; yi Yoano akancuka kudibo kuya piñana ku Yelusaleme.

¹⁴ Kaninga bakadika Penge, yi bakalwa ku Antioko a Pisidia ; yi bakabwela mu kixingidilu ku diba dia sabado, yi bakaxikama.

¹⁵ Yi kunyuma kwa kubala kwa bwadi yi kwa badimuxi, bafumu ba kixingidilu bakatuma kudibo ene, Bena kwecu, aka nudi yi diyi dioso dia kubondabonda bantu, nutôyi.

¹⁶ Yi Paulu akakwemana, akasonga kianca, yi akatôya ene, Bena Isalele, yi nonu bacina Ncembi, nwombwi.

¹⁷ Ncembi a bubila bobu bwa Isalele akasungula batetecu, akabandisa bantu pakakalabo mu mbata a Ecipito ; yi ku kiboko kia bukalanga kwakababatusayi momu.

¹⁸ Yi pa lwedi lwa mbula masangi anai, pakababungulayi ku kisobe.

¹⁹ Yi pakadi amabidisa mabila sambwali mu mbata a Kyenene, akababanyisa mbata abo mwokito ;

²⁰ yi kunyuma kwa bintu bebi kwakapayi basambodi ba malo pôi Samwele mudimuxi, lwedi lwa mbula nkama inai yi mbula masangi atano.

²¹ Kunyuma bakalomba fumu, yi Ncembi akabapa Saulu, mwana a Kisi, muntu a bulungu bwa Bencamini, pa kikondo kia mbula masangi anai.

²² Yi pakadi amamuncula, akababandixila Dafidi fumu ; akatôbôlelayi ntôbô kabidi ene, Napusañana Dafidi, mwana a Yese, muntu atwañanana yi mucima amene, unakwenca nyinga yamene bungi bwayo.

²³ Kudi bana ba muntu you kwamafikixila Isalele Ncembi Mupandixi, mwakaxiyayi kilaka, isanga Yisu ;

²⁴ pakadi Yoano amakwambila, buxi bwa kibwelelu kienci, dia kunumeyebwa kwa kudibela kudi bungi bwa bantu ba Isalele.

²⁵ Yi pakamana Yoano mudimo ănci, akatôya ene, Nonu nungwencenca meme ndi ñani ? Meme kiena you. Kate, mona, munga ulolwa kunyuma kwamene, untasolelekyela yi kusula makaka a makasa anci.

²⁶ Bena kwecu, bana ba bulungu bwa Abalami, yi bobo badi yinenu bamacina Ncembi, kunudi kwamatumibwa diyi dia kipandilu kieki.

²⁷ Bwalo bwa bantu bakala ku Yelusaleme, yi bafumu babo batamulubukili, bamafikisa kabidi meyi a badimuxi abadibwa ku sabado mwoso, bwalo bwamamubelabo.

²⁸ Isanga bakadi kabasosañana bwalo bwa kufwa, bakalomba kudi Pilata ene, axipibwi.

²⁹ Yi pakadi bamafikisa bintu bioso biakafundibwa ku bwalo bwanci, bakamupwesa ku muci yi bakamuladika mu lukita.

³⁰ Kaninga Ncembi akamubisa kudi bafu,

³¹ yi akamonebwa matuku mangi kudibo bakaximuna yinanci ku Ngalili pôi ku Yelusaleme, badi batôbodi banci nkyekyu kudi bantu.

³² Yi coco tunwasakolela losangu lunengela lwa kilaka kiakaxiyibwa batetecu,

³³ kiamatufikixila Ncembi coco badi bana babo, bwalo bwamabandisayi Yisu ; bea biakafundibwa kabidi ku Musambu ămubidi ; ene, Owe udi Mwanami, ku dituku dedi ndo kunapukulela,

³⁴ Kaninga ku bwalo bwamamubisayi kudi bafu, kumoni kupiñana kabidi ku kubola nyô, akatôya noku ene, Nakunupa bintu bia Dafidi bia babala yi bia sôsôlwo ko.

³⁵ Bwalo bwakatoyayi kabidi mu munga Musambu ene, Kunabolesa Muntu ebe a babaia kuboia pô.

³⁶ Dafidi sôsôlwo, pakadi amasadila nyinga ya Ncembi ku mwociya ănci, akalala tulu, yi akabakibwa kudi batetenci, yi akalwa bola.

³⁷ Mo you akabisa Ncembi akadi kasobola.

³⁸ Mbwôso nulubukwi, bena kwecu, ene, kudi muntu you kwamanwambidibwa dia kulekyela kwa mabi ;

³⁹ munda mwanci lolo, muntu mwoso amakwetabusa amasuwixibwa malo moso, anutabiyi kusuwixibwa ku bwadi bwa Mosese.

⁴⁰ Mbwôso nudimuki ximbi muxenuponena mwakatôyebwa kudi badimuxi,

⁴¹ ene, Numoni, bena ntamu, nukami, nuncimini ; bwalo bungwakisa mudimo ku matuku enu, mudimo unutasokwetabusa pô, isanga muntu unwambila.

⁴² Yi pakabatukabo bakalomba meyi aa abambidibwi ku sabado a nyuma.

⁴³ Pakacakana lolo bena kixingidilu, bena Yuda bangi yi betabusañani yinabo bakacina Ncembi bakalandudila Paulu yi Banabasa ; bobo bakakwambilañana yinabo, bakababondabonda baxini yi lwoxixi lwa Ncembi.

⁴⁴ Yi ku sabado a nyuma kwakasangila pepe yi bungi bwa bula kulwa ombwa diyi dia Ncembi.

⁴⁵ Kaninga bena Yuda pakamonabo bimbukuma, bakakwolubixibwa miekunyo, yi bakakwelesa malo mbata akatôyebwa kudi Paulu, yi bakatangola mietangu.

⁴⁶ Yi Paulu yi Banabasa bakasakola yi mucima, yi bakatôya ene, Kwakadi loko, diyi dia Ncembi dixenwambidibwa nonu buxi ; kaninga bwalo bunudianamuna kunudi, yi nwamadienca mikyenu ene, kanusolelekyela yi môyo ă kô kô, mona, twakulumuka ndo kuya kudi mabila.

⁴⁷ Bwalo bwamatutôyela Fumu nako, ene, Namakuteka obo a mabila, bixeakala owe yi bupandixi pôi ku sula kwa loboko.

⁴⁸ Yi pakakwombwa mabila noku, bakaxekyelela, yi bakatumbisa diyi dia Fumu, yi bakakwetabusa, isanga bobo bakalungikidibwa môyo ă kô kô.

⁴⁹ Yi diyi dia Fumu diakacwadibwa mu bungi bwa mbata you.

⁵⁰ Kaninga bena Yuda bakanyingisa babakaxi ba bikupu bakaxingila Ncembi, yi bantu banene ba bula, yi bakabafinisa Paulu yi Banabasa, yi bakabatenyeka mu mbata yabo.

⁵¹ Kaninga bobo bakabakupuludila makasa abo yimbwi, yi bakalwa ku Ikonyumu.

⁵² Yi beyi bakakwolubixibwa yi kiango yi Mwoxixi a babala.