MAKISA 12 - Disambi Dipyadipya

¹ KU kikondo kieki kwakaxombola Elodo fumu bianca ndo kukolomona banga bena kikokye.

² Yi akaxipa Yakobo, Yoano mukulwanci ku mwele.

³ Pakamonayi lolo nako kwamaxekyelesa bena Yuda, akaya bamba Pita kabidi. Aa ndo matuku a mampa atena kiolubixilu.

⁴ Pakadi amamukwata, akamuteka mu ncibo a lukanu, yi akamulongola kudi bibumbu binai bla masalai anai, anai, ndo kumunama ; akakwenca ndo kumubatusa kudi bantu kunyuma kwa Kidikixilu.

⁵ Mbwôso Pita akanamibwa mu ncibo a lukanu ; kaninga ndombu yakamulombelebwa kudi Ncembi yi mulukutu, kudi kikokye.

⁶ Yi pakakyeba Elodo kumubatusa, ku butuku bobu kwakalala Pita tulu pakacikaci pa masalai abidi, musuka yi nkanu ibidi ; yi banami ku mbelo bakanama ncibo a lukanu.

⁷ Yi mona, mwangele a Fumu akalwa koku, yi obo akalumuka mu ncibo ; yei lolo akakuma Pita lubalu, akamubisa ene, Ombuluka mangwoso. Yi nkanu yakaxelamuka ku bianca bienci.

⁸ Yi mwangele akamwambila ene, Lata, suka sabato yebe. Yi akakwenca nako. Akamwambila ene, Teka kinkutu kulu, ungulandudili.

⁹ Yi akabatuka, yi akamulanda ; akadi kabiyi ene, mudi sôsôlwo mwakakwencebwa kudi mwangele, mo akakwenca ene, amamona dilu dia mu tulu.

¹⁰ Pakadi bamadika kibumbu kia buxi yi kiamubidi kia masalai, bakalwa ku lukuki lwa kidimadima, lwa kuya ku bula, lwakabadipukila mikyelu ; yi bakabatuka, bakapweka pa mwolongo umoumwe, yi mwangele akamuxiya papa noku.

¹¹ Pita lolo, pakadilembetelayi, akatôya ene, Nkyekyu ngwalubukwa sôsôlwo ene, Fumu aputuma mwangele anci, apungupaula mu kianca kia Elodo, yi ku mudingidilu mwoso ă bantu ba bena Yuda.

¹² Pakalubukwayi loko, akalwa ku ncibo a Mali, Yoano mamanci, udi yi lukumbu ene, Maku ; kwakasangila bantu bangi, badi mu kulomba.

¹³ Pakakwakwalayi ku lukuki lwa kibwelelu, muxika akalwa ombwa, dina dienci ene, Loda.

¹⁴ Pakalembetelayi diyi dia Pita, akadi kasodipula mbelo bwalo bwa kiango, kaninga akaya munda lubilu, yi akatôya ene, Pita amakwemana ku kibwelelu.

¹⁵ Yi bakamwambila ene, Wamapasuka. Kaninga yei akatôya yi ngulu ene, Kudi mo nako. Yi bobo ene, Kudi mwangele anci.

¹⁶ Mo Pita akakwakwala kwakwala, yi pakadipulabo, bakamumona, yi bakakama kama.

¹⁷ Kaninga yei akabasongela kianca bakali polo, yi akabambila mwakamubatusa Fumu mu ncibo a lukanu. Akatôya lolo ene, Nwambili Yakobo bintu bebi, yi bakunyi. Yi akancuka, akaya ku kinga kidi.

¹⁸ Pakalwa munyinya pakadi muyengi mungi kudi masalai bwalo bwa Pita, kupai kwapuyayi.

¹⁹ Pakadi Elodo amamupalala, yi kamusañanini, akakwelela banami mwoxondo, yi akatôya ene, baxipibwi. Yi akapweka ku Yudiya kuya ku Kyesalia, yi akaxikama koku.

²⁰ Yi akakwombwela bena Tile yi bena Xidono bituku bingi ; mo bakalwa kudiyi bo-a-bwoso, yi pakadi bamakwetabuxisa Balasto, munami a ntangi a fumu, bakaiomba polo, bwalo bwakadixibwa mbata abo ku mbata a fumu.

²¹ Yi ku dituku diakatambibwa, Elodo akaiata bilatu bia bufumu, akaxikama ku nkwasa katakai, yi akabakwamina dikwami.

²² Yi bantu bakakwamena ene, Diyi dia Ncembi, kumoni dia muntu.

²³ Yi mwangele a Fumu akamukuma mangwoso, bwalo butapelayi Ncembi lotumbu, yi akadibwa kudi miengenyi, yi akakica dvendeli.

²⁴ Kaninga diyi dia Ncembi diakalunda, diakalelañana.

²⁵ Yi Banabasa yi Saulu bakapiñana ku Yelusaleme, pakadi bamamana mudimo ăbo, bakacwala yinabo Yoano udi yi lukumbu lwanci ene, Maku.