MAKISA 10 - Disambi Dipyadipya

¹ KU Kyesalia kwakadi muntu, dina dienci ene, Kônelio, kapalai ka kibumbu kia masalai kiabikidibwa ene, kia Italia ;

² muna nkwami, akacina Ncembi yi bungi bwa ncibo anci, akapa bantu malongi a mwengo mangi, yi akalombela Ncembi matuku moso.

³ Akamona loko mu dilu, pa ola dibwa a munyinya, mwangele a Ncembi utanabwela kudiyi, akamutôyela ene, Kônelio.

⁴ Yei lolo akamunamacisa meso, yi akacina bowa, akatôya ene, Kiñani, Fumu ? Akamwambila, ene, Ndombu yebe yi makisa ebe a mwengo amaximuna kimonenu ku mpala a Ncembi.

⁵ Nkyekyu lolo tuma bantu ku Yopa kuya angata Ximono, udi yi lukumbu ene, Pita.

⁶ Udi pa kidi kia Ximono, mweni a makoba, udi yi ncibo anci ku mwanca ă mai manene.

⁷ Pakadi mwangele amakwambila yinanci apuncuka, akabikila basadi babidi ba ncibo anci, yi disalai dia nkwami dia bantu bakamusadila matuku moso ;

⁸ yi pakadi amăbasakolela bintu bioso, akabatuma kuya ku Yopa.

⁹ Mankyelo lolo, pakakwendabo ku lwendo lwabo, yi bamafika pepe yi bula, Pita akabanda kulu kwa ncibo kuya lomba, pa ola amusambomo.

¹⁰ Yi akakwombwa ncala, akakyeba kudya ; mo pakalambabo, yei akamona bea dilu dia tulu ;

¹¹ yi akamona diulu diamadipudibwa, yi kintu kinene kiamapweka, bea mbuxa munene, kiamapwexebwa paxi pa macu akio anai ;

¹² kiakadi nyama mioso munda ya mikolo inai, yi bintu bialambalala paxi, yi nyonyi ya kulu.

¹³ Yi diyi diakalwa kudiyi ene, Emana Pita, xipa, dyaka.

¹⁴ Mo Pita ene, Kañana, Fumu, bwalo buntadili kintu pô kia kanana ndo kia mbindu.

¹⁵ Yi diyi diakalwa kudiyi diamubidi, ene, Bintu biamakusula Ncembi, owe kutambi ene, bia kanana.

¹⁶ Nako kwakakwencebwa menca asatu, yi kintu kiakangacibwa mangwoso munda mwa diulu.

¹⁷ Pakadi Pita ukielela lukanyi munda, lwa dilu dicina diadio diapumonayi, mona, bantu bakatumibwa kudi Kôneliô, bamapalala ncibo a Ximono, bakakwemana ku mbelo,

¹⁸ bakakwela diyi, bakakwapangusa ndo Ximono abikidibwa ene, Pita udiko.

¹⁹ Mo pakakwela Pita dilu lukanyi, Mwoxixi akamwambila ene, Mona, bantu basatu bakwapalala.

²⁰ Kate emana, pweka, sangila yinabo kutena kuxitaxita, bwalo bunapubatuma mikyemi.

²¹ Pita lolo akapweka kudi bantu, yi akatôya ene, Mona, meme ndi you unwapalala ; bwalo bunwapulwa budi beci ?

²² Yi bakatôya ene, Kônelio, kapalai, muna nkwami acina Ncembi, amatôbôlelebwa ntôbô kudi bungi bwa bubila bwa bena Yuda, akakwebexebwa kudi mwangele a babala akubikili ku ncibo anci, a-ombwi meyi kudi.

²³ Mbwôso akababwesa munda yi akabaladisa momu. Mankyelo akabika, akaya yinabo, yi banga bakunyi ba ku Yopa bakaya yinanci.

²⁴ Mankyelo bakabwela mu Kyesalia. Mo Kônelio akabadingidila, amabikila bilungu bienci, yi bimbila bienci.

²⁵ Pakadi Pita udi mu kubwela, Kônelio akapomana yinanci, akapona paxi, akamuxingila.

²⁶ Kaninga Pita akamwombulula ene, Emana, meme kabidi ndi muntu mikyemi.

²⁷ Akabwela lolo, udi mu kwambilañana yinanci, yi akasañana bangi bamasangila.

²⁸ Yi akabambila ene, Nonu nwalubukwa ene, kakusolelekyela yi bwadi, muna Yuda kunamatañana ndo kusangilañana yi muna bubila bunga, mo Ncembi apungwebesa meme, kibikidi muntu mwoso ene, muntu a kanana ndo a mbindu.

²⁹ Mbwôso kabidi, binapubikidibwa, napulwa kutena kwelesa mbata. Ngwapangusa lolo, kukai nwamangubikila ?

³⁰ Yi Kônelio ene, Matuku amadika anai, nakadi namancila bidya pôi ola you, yi pa ola dibwa nakadi mu kulomba mu ncibo amene ; yi mona, muntu akakwemana ku mpala amene yi mbuxa a dikai obo,

³¹ akatôya ene, Kônelio, lulombu lwebe lwapwombwebwa, yi makisa ebe a mwengo amakwelebwa lukanyi ku mpala a Ncembi.

³² Mbwôso tuma ku Yopa, kuya angata Ximono, abikidibwa ene, Pita ; axikama mu ncibo a Ximono, mweni a makoba, ku mwanca ă mai manene.

³³ Binakatuma kudi mangwoso, yi owe wapwenca loko bwalo bwapulwa. Mbwôso tutani kunu cu-a-bwoso ku mpala a Ncembi ndo kwombwa bintu bioso biamakutôyelebwa kudi Ncembi.

³⁴ Yi Pita akadipula musuku ăncl yi akatôya ene, Ngwalembetela sôsôlwo ene, Ncembi kiena munamuni a bantu pô,

³⁵ kate ku bubila bwoso, muntu umwacina, yi encenca yi nkwami, udi yi dikasa dinengela ku mpala anci.

³⁶ Diyi diakatumayi kudi bana ba Isalele, dia kwambila polo kudi Yisu Kalistu, (yei ndo Fumu a bantu boso),—

³⁷ nwamalubukwa bwalo bobu, bwamacakana mu bungi bwa Yudiya, bwakabanga ku Ngalili kunyuma kwa kunumeyebwa kwakakwambila Yoano ;

³⁸ bwa Yisu a Nasalete ; mwakamuxinga Ncembi yi Mwoxixi a babala yi ngulu ; akadikanana udi mu kwenca kunengela, yi kupandisa bantu boso bakafinibwa kudi diabolo ; bwalo bwakadi Ncembi yinanci.

³⁹ Coco kabidi badi batôbôdi ba ntôbô ba bintu bioso biakakisayi yi mu mbata a bena Yuda yi ku Yelusaleme ; akaxipabo kabidi, bamamukopeka kulu kwa muci.

⁴⁰ You, Ncembi akamubisa ku dituku diamusatu, akamupa amonebwi ku meso,

⁴¹ kumoni kudi bantu boso, kate kudi bena ntôbô bakasungudibwa buxi kudi Ncembi, isanga coco, bakadya yi bakanwa yinanci kunyuma kwakakwombulukayi kudi bafu.

⁴² Akatulanga lolo dia kwambila bantu, yi dia kutobôla ene, mikyenci ndo you akasungudibwa kudi Ncembi akali musambodi a bena môyo yi a bafu.

⁴³ Ku bwaio bwanci kwamatôbôla bungi bwa badimuxi ntôbô, ene, ku dina dienci, muntu mwoso umwetabuxila unangata kulekyelebwa kwa mabi.

⁴⁴ Pakadi Pita ukiatôya meyi aa, Mwoxixi a babala akapona pa bantu boso bakakwombwa diyi.

⁴⁵ Yi betabuxi ba bena bwadi bakakama kama, bakadi bamalwa yi Pita, bwalo bwakapanguludibwa dilongi dia Mwoxixi a babala pa mabila kabidi ;

⁴⁶ bwalo bwakabombwabo badi mu kutôya yi ndimi, badi mu kutumbisa Ncembi.

⁴⁷ Yi Pita akapingasa ene, Muntu udiko ubili kunyañana mai, baba kabanumeyebwi bapwangata Mwoxixi a babala bea coco kabidi ?

⁴⁸ Yi akatôya ene, banumeyebwi mu dina dia Yisu Kalistu. Kunyuma bakamulomba asali matuku mabende.