MAKISA 1 - Disambi Dipyadipya

¹ INAKAFUNDA diembi dia buxi, Teofilo, bwalo bwa bintu bioso biakabanga Yisu kwenca yi kweyesa,

² pôi dituku dedi diakangacibwayi kulu : pakadi amatôyela batumibwi kudi Mwoxixi a babala bamasungulayi ;

³ bakadiebesayi mikyenci yi môyo kudibo kunyuma kwa kutata kwanci, yi ntôbô mingi. Bwalo bwakamonekayi kudibo pa lwedi lwa matuku masangi anai, udi mu kwambila ambila dia bintu bia bufumu bwa Ncembi.

⁴ Yi pakasangilayi yinabo, akabambila ene, kabancuki ku Yelusaleme, kate bakungi kilaka kia Tete kinwamakwombwa kundi.

⁵ Bwalo bwakanumeya numeya Yoano mu mai sôsôlwo, mo nonu nunanumeyebwa yi Mwoxixi a babala, kumoni matuku mangi nkyekyu.

⁶ Mbwôso pakadi bamasangilañana, bakamwapangusa, ene, Fumu, ki ku kikondo kieki kunapingasa bufumu kudi Isalele ?

⁷ Akabambila lolo ene, Bwalo kabuna bwenu kulubukwa ndo bikondo ndo layinga, biamalungika Tete ku bumanya bwanci ;

⁸ mo nunangata ngulu palolwa Mwoxixi a babala kulu kwenu, yi nunakala batôbôdi bamene mu Yelusaleme, yi mu bungi bwa Yudiya yi Samalia, yi ku sula kwa loboko.

⁹ Pakadi amatôya bintu bebi, biakatebelabo, akangacibwa kulu, yi dibaxi diakamwangata ku meso abo.

¹⁰ Pakatebelabo mu diulu sosonyi biakakwendayi kulu, mona, bantu babidi bakakwemana padibo yi bilamba bia susu,

¹¹ bakatôya kabidi ene, Babalumi ba Ngalili, kukai nwamakwemana, nudi mu kutebela kulu ku diulu ? Yisu you apununcudibwa ku diulu unalwa mo nako bea luna binwapumumona amabwela mu diulu.

¹² Biakapinanabo ku Yelusaleme ku lupongo lwabikidibwa ene, Olife, ludi pepe yi Yelusaleme, lwedi lwa Iwendo lwa dituku dia Sabado.

¹³ Yi pakabwelabo bakabanda mu ngumbu a ncibo a kulu, mwakakalabo yi Pita, yi Yoano, yi Yakobo, yi Andelo, Filipi yi Tomasa, Batolomo yi Mateyo, Yakobo a Alifayo, yi Ximono Selote yi Yude a Yakobo.

¹⁴ Baba noku bakakala bungi bwabo yi mucima umoumwe badi mu kulomba lomba, yi babakaxi, yi Mali, Yisu mamanci, yi bana ba mamanci.

¹⁵ Ku matuku yia loio kwakakwemana Pita pakacikaci pa bakunyi, (mena abo a kibumbu kiakasangila akadi bea nkama yi masangi abidi), yi akatôya ene,

¹⁶ Bena kwecu, diyi dia mukanda ă Ncembi dixefikixibwa diakatôya Mwoxixi a babala kalikali ku musuku ă Dafidi, bwalo bwa Yudaxi, akaxiyaxiya bantu bakakwata Yisu.

¹⁷ Bwalo bwakabadibwayi yinecu yi akangata kienci kicini kia mudimo ou.

¹⁸ (You muntu lolo akakwola kibidi yi sayi ya kwona kwanci, yi akapona paxi kabungu, yi akatondoka pakacikaci ; yi mala anci moso akancuka kunci.

¹⁹ Yi kwakalubukibwa noku kudi bungi bwa bena Yelusaleme, biakabikilabo kibidi kieki ku lubendu lwabo ene, Akyeledama ; ene, Kibidi kia maxi).

²⁰ Bwalo bwakafundibwa mu mukanda a Misambu ene, Ncibo anci akalemi kanana, momu kamwakadi muntu ; yi, bunami bwanci, munga abwangati.

²¹ Mbwôso bwalo bwa bantu bamasangila yinecu ku kikondo kioso kiakabwela Fumu Yisu kutudi, kiakabatukayi kabidi,

²² (pôi kunumeya kwa Yoano pôi dituku diakatwangacibwayi kulu), muntu abo umoumwe uxeakala mutôbôdi yinecu a kwombuluka kwanci.

²³ Yi bakateka babidi, Yosefe abikilabo Basabasa, atambibwa ene, Yustusu, yi Matiasa.

²⁴ Yi bakalomba yi bakatôya ene, Owe Fumu, mulubukwi a micima ya bantu boso, ebesapo muntu amasungula Owe, a babidi baba,

²⁵ angati kidi ku mudimo ou, yi ku butumibwi bobu, kwakasaluka Yudaxi kuya ku kidi kienci.

²⁶ Yi bakacwa lubexi ku bwalo bwabo, yi bwalo bwakakwacila Matiasa, yi yei akabadibwa yi batumibwi disangi yi umoumwe.