LUKA 7 - Disambi Dipyadipya

¹ YI pakadi amamana meyi anci moso ku macu a bantu, akabwela mu Kapenaumu.

² Yi musadi a kapalai ka nkama a masatai akanangibwa kudiyi, akadi yi kusama yi akadi pepe yi kufwa.

³ Yi pakakwombwayi dia Yisu, akatuma babakulu ba bena Yuda kudiyi, badi mu kulomba abelwa pandisapo musadi anci.

⁴ Mo bobo, pakafikabo kudi Yisu, bakamuxengula kungi ene, Yei amalelekyela Owe kumwencela nako,

⁵ bwalo bwanangayi bubila bwecu, yi mikyenci amatwabakila kixingidilu.

⁶ Yi Yisu akaya yinabo. Yi pakadi utani nkyekyu pepe yi ncibo, kapalai kakatuma bimbila bienci kudiyi ene, Fumu, kudinyingixi, bwalo buntasolelekyela bixebwela Owe muxi mwa samba amene.

⁷ Mbwôso nakadi kisodienca ene, namalelekyela yi kulwa kudi. Kate tôyapo diyi ditupu, yi musadi amene unapandixibwa.

⁸ Bwalo bundi meme kabidi muntu amatekyebwa muxi mwa bumanya, ntani yi masalai muxi mwamene mikyemi ; yi ngwatôyela you ene, Yaka, yi uyeya ; yi munga ene, Lwaka, yi ulolwa ; yi musadi amene ene, Kisa kintu kieki, yi ukiakisa.

⁹ Pakakwombwa Yisu nako, akamukamina dikamu, yi akakulumuka kudi kimbukuma kia bantu bakamulandudila ene, Nwatôyela ene, Kiasañana kwetabusa bungi noku, kumoni isanga mu Isalele.

¹⁰ Yi bobo bakatumibwa, pa kupiñana ku ncibo bakasañana musadi udi bimpe akadi yi kusama.

¹¹ Kunyuma kwakayayi ku bula bwabikidibwa ene, Naini ; yi beyi banci bakaya yinanci yi kimbukuma kinene kia bantu.

¹² Yi pakakokyelayi pepe yi kibwelelu kia bula, mona, mufu udi mu kucwadibwa kunci ; mwana a ditôi a mamanci, yi yei akadi mukasa a mufu ; yi kimbukuma kinene kia bena bula bakadi yinanci.

¹³ Yi pakamumona Fumu akamwombwela mwengo, yi akamutôyela ene, Kudidi.

¹⁴ Yi akalwa pepe yi akakwata kitandalo, yi bacwadi bakakwemana. Yi akatôya ene, Dipulwa, nkwatôyela ene, Bika.

¹⁵ Yi mufu akaxikama yi akabanga kutôya ; yi akamulongola kudi mamanci.

¹⁶ Yi bowa bwakabakwata bungi bwabo, yi bakatumbisa Ncembi ene, Mudimuxi munene amabandixibwa pakacikaci pecu, yi Ncembi amalwa dingila bantu banci.

¹⁷ Yi mwoximo ou ăkacakana ku bungi bwa Yudiya ku bwalo bwanci, yi ku bungi bwa mbata akadi pepe.

¹⁸ Yi beyi ba Yoano bakmucwadila diyi dia bintu bebi bioso.

¹⁹ Yi Yoano akabikila banga beyi banci babidi, yi akabatuma kudi Fumu ene, Owe ndo you ulolwa, sungu tudingili munga ?

²⁰ Pakafika babalumi baba kudiyi, bakatôya ene, Yoano Munumeyi apututuma kudi, ene, Owe ndo you ulolwa sungu tudingili munga.

²¹ Ku ola you kwakapandisayi bantu bangi masama yi bipekye yi bidimu bibi, yi akapa bafofo bangi meso.

²² Yi akapingasa yi akabambila ene, Nuyi ambila Yoano bintu binwamamona yi binwamakwombwa ; ene, bafofo bamangata meso abo, bena bitumbi bendenda, bena sudi bamasusudibwa, yi bena bicu bombomwa, bafu bamabixibwa, yi bakombi bamakwambidibwa losangu lunengela.

²³ Yi mulwangwasanibwi ndo muntu mwoso utasosañana kiponexelu kundi.

²⁴ Yi pakadi mikyenci ya Yoano yamancuka, akabanga kutôyela bimbukuma dia Yoano ene, Kiñani kinwakaya ku mbata a kisobe kuya tebela ? Muxembi ămanyingixibwa kulupepele ?

²⁵ Kate kinani kinwakaya kuya mona ? Muntu ulete bilamba bia lwoxixi ? Mona, bobo badi yi bilamba bia dikai yi bamafwombuka yi bintu badi mu bimana bia bafumu.

²⁶ Kate kiñani kinwakaya kuya mona ? Mudimuxi ? Ya, nwatôyela ene, muntu amadika mudimuxi kungi.

²⁷ You ndo yei akafundibwa ku bwalo bwanci ene, Mona, ngwatuma mukyenci amene ku mpala ebe, unalungika ncila ebe ku buxi bwebe.

²⁸ Meme nwatôyela ene, Padi bantu bamalelebwa kudi babakaxi, kapasoakala muntu adika Yoano munene ; kaninga muntu mwoso udi mwamuki mu bufumu bwa Ncembi amamudika munene.

²⁹ (Yi bungi bwa bantu, pakakwombwabo, yi basangi ba mifambu bakasuwisa Ncembi, bwalo bwakamanumeyebwabo ku kunumeyebwa kwa Yoano.

³⁰ Mo baFalixi yi beyexi ba bwadi bakadilengolela lukanyi lwa Ncembi ku bwalo bwabo, bwalo butanumeyebwabo kudiyi.)

³¹ Mbwôso nakwelekyesa bantu ba mwociya ou yi luna kiñani, yi balexi yi beci ?

³² Balexi yi luna babaki baxikama mu dibanca dia kisalu, badi mu kubikilañana ; batôya ene, Twamanukumina mixembi, mo nonu kanuxili masa ; twamadila bidilu, mo nonu kanudidili masonci.

³³ Bwalo bwamalwa Yoano munumeyi kumoni yi kudya kwa bidya ndo yi kunwa kwa finyo, yi nonu nwatôya ene, Udi yi kidimu kibi.

³⁴ Mwana a Muntu amalwa yi kudya yi kunwa, yi nonu ene, Mona muna ndôi a kudya yi muna nkolwa ya malufu, kimbila kia basangi ba milambu yi boni.

³⁵ Yi bwinu bwamasuwixibwa kudi bana babu boso.

³⁶ Yi munga muFalixi akamuswala adi yinanci. Yi akabwela mu ncibo a muFalixi yi akaxikama ku mesa.

³⁷ Yi mona, mwamukaxi a mu bula akadi mwoni akalubukwa ene, udi mu kuxikama ku bidya mu ncibo a muFalixi, akacwala mulondo ă alabasta ă manyi a ncobo,

³⁸ yi akakwemana ku makasa anci kunyuma kwanci, udi mu kudila masonci ; yi akabanga kukusuia makasa anci yi masonci ; yi akakupulula yi nyonyi ya ku mucwe ănci ; yi akanyita nyita makasa anci yi akaxinga manyi a ncobo.

³⁹ Yi muFalixi akamuswala pakamonayi nako, akaditôyela munda ene, Muntu you ndo mudimuxi, uxelubukwa mwamukaxi you udiyi amamubaka kianca, yi butonga bwanci, ene, udi mwoni.

⁴⁰ Yi Yisu akamupingasa ene, Ximono, meme ndi yi diyi dia kukutôyela. Yei ene, Mweyexi, tôya.

⁴¹ Musombwexi umoumwe akadi yi bena mbata babidi ; umoumwe akadi muna mbata a denalio nkama itano, yi munga a masangi atano.

⁴² Mo bwalo butakadibo yi kintu kia kumufuta, akabalekyela bubidi bwabo. Mbwôso ñani a babidi baba unadika kumunanga ?

⁴³ Ximono akapingasa ene, Ngwencenca ene, you akalekyelayi mpalata mingi. Yi akamwambila ene, Wamasambola loko.

⁴⁴ Yi akakulumuka kudi mwamukaxi, yi akatôyela Ximono ene, Wamona mwamukaxi you ? Napubwela mu ncibo ebe ; wakadi kusompa mai a kukusula makasa amene, mo yei aputopesa makasa amene yi masonci, yi apwakupulula yi nyonyi yenci.

⁴⁵ Owe wakadi kusongunyita pô, mo yei kalekyela kunyita nyita makasa amene pôi kikondo kinapubwela.

⁴⁶ Owe wakadi kusoxinga mucwe ămene manyi, mo yei apuxinga makasa amene manyi a ncobo.

⁴⁷ Ku mucwe ou nkwatôyela ene, Mabi anci isanga ndo mangi amalekyelebwa ; bwalo bwamanangayi nyinga mingi ; mo you amalekyelebwa mabende amananga nyinga mibende.

⁴⁸ Yi akamwambila ene, Mabi ebe amalekyelebwa.

⁴⁹ Yi bobo bakadi yinanci ku mesa bakabanga kuditôyela munda ene, Ñani you alekyela mabi pako ?

⁵⁰ Yi akatôyela mwamukaxi ene, Kwetabusa kwebe kwamakupandisa ; yaka polo.