LUKA 6 - Disambi Dipyadipya

¹ YI ku dituku dia Sabado amubidi kwakadiyi mu kudika mu bibidi bia miebele, yi beyi banci bakanyowa mbusu yi bakadya, badi mu kusisa mitongu mu bianca biabo.

² Yi banga baFalixi bakabambila ene, Kukai nwencenca bwalo butasolelekyela yi bwadi kwencebwa ku dituku dia Sabado ?

³ Yi Yisu akabapingasa ene, Nonu kanwabala isanga noku, mwakakwenca Dafidi pakadiyi yi ncala, yei yi bobo bakadi yinanci ;

⁴ mwakabwelayi mu ncibo a Ncembi, yi akangata mampa madisa yi akadya, yi akapa kabidi bobo bakadi yinanci ; atasolelekyela yi bwadi kudya kutena kudi makanda matupu ?

⁵ Yi akabambila ene, Mwana a Muntu udi Fumu a Sabado kabidi.

⁶ Yi ku munga Sabado kwakabwelayi mu kixingidilu yi akakweyesa. Yi momu mwakadi muntu yi kianca kienci kia kidyo kiamakwoma.

⁷ Yi bafundi ba mikanda yi baFalixi bakatebela ndo uxepandisa ku Sabado, bixesañanabo bwalo bwa kumusanya.

⁸ Mo yei akalubukwa nkanyi yabo ; yi akatôyela muntu akadi yi kianca kiomu ene, Bika, emana pakacikaci. Yi akakwombuluka yi akakwemana.

⁹ Yisu lolo akabambila ene, Meme nwapangusa ndo kwalelekyela yi bwadi kwenca kunengela ku Sabado, ndo kwenca bubi ? Ndo kupandisa môyo, ndo kuncimisa môyo ?

¹⁰ Yi akabatebela bungi bwabo bakamudinga, yi akamutôyela ene, Xombola kianca kiebe. Yi akakwenca noku, yi kianca kienci kiakancincidixibwa.

¹¹ Kaninga bakakwolubixibwa yi bisusu, yi bakakwelañana nkanyi muxekwencabo kudi Yisu.

¹² Yi ku matuku yia kwakabatukayi ku lupongo kuya lomba, yi akakyesa butuku yi ndombu kufomba kudi Ncembi.

¹³ Yi pakaiwa munyinya pakabikilayi beyi banci, yi akasungula disangi yi babidi kudibo bakabikilayi kabidi ene, Batumibwi ;

¹⁴ Ximono, akabikilayi kabidi ene, Pita, yi Andelo mwakunyenci ; yi Yakobo yi Yoano, Filipi yi Batolomo,

¹⁵ Mateyo yi Tomasa, Yakobo a Alifayo yi Ximono akabikidibwa ene, Seloto,

¹⁶ Yude a Yakobo, yi Yudaxi a Ixikalioto, akadi mwengi akamwsnga.

¹⁷ Yi akapweka yinabo yi akakwemana ku kidi kia makalikali, yi kibumbu kinene kia beyi banci ; yi kimbukuma kinene kia bantu ba ku bungi bwa Yudiya yi Yelusaleme, yi ba ku mwanca a mai manene ku Tile yi Xidono, bakalwa ndo kumwombwa yi kupandixibwa masama abo ;

¹⁸ yi bobo bakafinibwa kudi bidimu bia mbindu bakapandixibwa.

¹⁹ Yi bungi bwa kimbukuma kia bantu bakapalala kumubaka bianca biabo, bwalo bwakancuka ngulu kudiyi yakapandisa bungi bwabo.

²⁰ Yi akasangola meso anci ndo kutebela beyi banci, yi akatôya ene, Balwangwasanibwi nonu bakombi, bwalo budi bufumu bwa Ncembi bwenu.

²¹ Balwangwasanibwi nonu bombombwa ncala nkyekyu bwalo bununakwokutixibwa. Balwangwasanibwi nonu badila nkyekyu, bwalo bununaxeka.

²² Balwangwasanibwi ndo nonu, oka bantu bananunyafiana yi bananunamuna kudibo, yi bananudidika yi banapaula dina dienu luna ndo dibi, ku mucwe ă Mwana a Muntu ;

²³ nuxekyeleli ku dituku dedi, nuditambisi kulu bwalo bwa kiango ; bwalo budi sayi yenu minene mu diulu, bwalo bwakakwenca bateteabo nako kudi badimuxi.

²⁴ Kaninga mpeya kunudi, bena madidi, bwalo bunwamangata kibondelu kienu.

²⁵ Mpeya kunudi bamakwokutixibwa nkyekyu, bwalo bununakwombwa ncala. Mpeya kunudi baxeka nkyekyu, bwalo bununadila bidilu yi nunancula masonci.

²⁶ Mpeya kunudi pananusosola bantu boso, bwalo bwakakwenca bateteabo nako kudi badimuxi ba mancanga.

²⁷ Kate nwatôyela nonu bombombwa ene, Nunangi bantu batanda yinenu ; nubenceli kunengela banwanyañana ;

²⁸ nubalwangwasani banwafinga ; nubalombeli banwakolomona.

²⁹ Muntu mwoso ukwakuma lupi ku ditama, umukulumunini dinga kabidi ; yi muntu uxencula kilamba kiebe, kumunyananini kinkutu kiebe kabidi.

³⁰ Longola kudi muntu mwoso ukwalomba ; yi you ancula bintu biebe, kumunani mbata.

³¹ Luna binwakyeba bantu banukixili, nonu nubakixili nako kabidi.

³² Yi nonu ndo nwananga bantu banwananga nonu, nuxexingibwa biloba kukai ? Bwalo bwananga isanga boni bantu babananga bobo.

³³ Yi ndo nubencela bobo kunengela banwencela kunengela nonu, nuxexingibwa biloba kukai ? Bwalo bwencenca isanga boni nako.

³⁴ Ndo nubasombwesa bintu banubadingidila bintu kabidi, nuxexingibwa biloba kukai ? Isanga boni basombwesa bintu kudi boni, bixeangatabo lwedi lolu kabidi.

³⁵ Kaninga nunangi bantu batanda yinenu, yi nwenci kunengela yi nusombwesi kutena kudingidila kintu kioso kabidi ; yi sayi yenu yinakala minene, yi nunakala bana ba You adika kulu ; bwalo budiyi yi bonkangi kudi bena nkolwa batasomuxinga, yi kudi bantu babi.

³⁶ Mbwôso nonu nwakali yi mwengo bea bidi Tetenu kabidi yi mwengo.

³⁷ Kanusambodi, yi kanunasambolebwa pô ; kanubedi, yi kanunabelebwa pô. Nulekyeli bantu mabi abo, yi nunalekyelebwa.

³⁸ Nupi, yi nunapebwa ; lwedi lwa tô, lunyaka, luntuntula, lutanapulowa, lunalongolabo mu mwopu ěnu. Bwalo bwa lwedi lolu lunwelekyesa yinalu nonu, lunanwelekyexebwa kabidi.

³⁹ Yi akabambila kabidi mwele ene, Mufofo ubili kuxiya xiya mufofo ? Ki banapona bubidi bwabo mu mulenda ?

⁴⁰ Mweyi kasodika mweyexi anci, mo muntu mwoso amakweyexebwa nya unakala luna mweyexi anci.

⁴¹ Mo kukai owe watebela kangungu katani mu diso dia muna kwebe, kaninga kusoxixima kibambu kitani ku diso diebe mikyebe ?

⁴² Owe unatôyela muna kwebe beci ene, Mbenculapo kangungu kadi mu diso diebe yi owe kusoxixima kibambu kidi mu diso diebe mikyebe. Muna mancanga, ncula kibambu buxi mu diso diebe, kunyuma lolo unaxingulula bimpe ndo kuncula kangungu kadi mu diso dia muna kwebe.

⁴³ Kakuna muci unengela akama bimoma bibi, yi kakuna muci mubi kabidi akama mamoma anengela.

⁴⁴ Bwalo bwamalubukibwa muci mwoso ku mamoma anci, bwalo butasokulabo mamoma a kikuyi kia maxika ku mieba, ndo mamoma a finyo ku kikwa.

⁴⁵ Muntu unengela ndo abatusa bwalo bunengela munda mwa ngombo unengela a mucima ănci ; yi muntu mubi ndo abatusa bwalo bubi munda mwa ngombo mubi ; bwalo bwasakola musuku ănci malo adi mu mucima ănci bungi tô.

⁴⁶ Yi kukai nungwatamba ene, Fumu, Fumu, yi kanusokwenca bintu bingwatôya ?

⁴⁷ Muntu mwoso ulolwa kundi, ombombwa meyi amene yi encenca, nakunwebesa muntu afwanayi.

⁴⁸ Amafwana muntu amakwabaka ncibo, akakwemba yi akakitelesa mena kulekule, yi akabangola kibangolelu kia ncibo ku lubwe ; mo pakafika muyi ă bubi, mai akakyela ku ncibo you, yi akadi kasolubukwa kumunyingisa, bwalo bwakakwabakibwayi loko.

⁴⁹ Mo you amakwombwa kutena kwenca, ulexi yi muntu amakwabaka ncibo anci ku yimbwi kanana, kutena kibangolelu muxi ; yi mai akakyela kudiyi, yi akapona mangwoso, yi kubuka kwakabuka ncibo you kwakadi kwa bubi.