LUKA 5 - Disambi Dipyadipya

¹ YI pakadi bantu badi mu kumufina mpika, yi badi mu kwombwa diyi dia Ncembi, yei akadi mu kwemana pepe yi kitelenena kia Ngenesalete ;

² yi akamona bibusu bibidi bidiko mu kitelenena, mo bena bibusu bakadi bamasabuka mu bibusu, badi mu kukusula matei abo.

³ Yi akabwela mu kinga kibusu kiakadi kia Ximono, yi akamulomba akinamuni kabende ku mwanca ă mai. Yi akaxikama yi akakweyesa bantu ku kibusu.

⁴ Mo pakadi amalekyela kutôya, akakwambila Ximono ene, Fikisa kibusu kutani ngidi, pwesa matei enu ndo kukwata yixi.

⁵ Yi Ximono akapingasa ene, Fumu, twapuiyomba iyomba butuku buncimancima, yi katuxindili yixi umoumwe ; kaninga ku diyi diebe ka kunapwesa matei.

⁶ Yi pakadi bamakwenca nako, bakakwata kibumbu kinene kia yixi, yi matei abo akalanda kupandika.

⁷ Yi bakabikila bena kwabo bakadi mu kinga kibusu kulwa bakwacisa. Yi bakalwa yi bakakwolubisa bibusu bubidi bwabio, biakabangabio kudiya.

⁸ Mo Ximono Pita, pakamonayi nako, akapona ku binu bia Yisu ene, Ncuka kundi, bwalo bundi muntu a bubi Fumu.

⁹ Bwalo bwakamukwata bowa yi bungi bwabo bakadi yinanci, bwaio bwa kibumbu kia yixi yakakwatabo ;

¹⁰ yi mo nako kabidi Yakobo yi Yoano, bana ba Sebede, bakasangiia yi Ximono ku mudimo. Yi Yisu akatôyela Ximono ene, Kucini ; pôi nkyekyu panakwata bantu.

¹¹ Yi pakadi bamafikisa bibusu ku mbata, bakaxiya bintu bioso yi bakamulandudila.

¹² Yi pakadiyi mu bunga bula, mona, muntu akadiko akakwolubila yi kusama kwa sudi ; yi pakamonayi Yisu, akapona ku mpala anci, yi akamulomba ene, Fumu, ndo wananga, ubili kungukusula babala.

¹³ Yi akaxombola kianca kienci yi akamubaka kianca ene, Ngwananga ; ukusuki. Yi kusama kwa sudi kwakamuncuka mangwoso.

¹⁴ Yi yei akamulanga kambidi muntu ; kate ene, Yaka ya diebesi mikyebe kudi bokanda, longola lolo difongi diakatôya Mosese bwalo bwa kukusudibwa kwebe, ndo kubatôbôlela ntôbô.

¹⁵ Yi mwoximo ănci ăkadika kucakana, yi bimbukuma binene biakasangila ndo kwombwa yi kupandixibwa masama abo.

¹⁶ Yi yei akadisokola kuya ku bidi biakadi kanana, yi akalomba.

¹⁷ Yi ku dinga dituku kwakadiyi mu kweyesa. Yi banga baFalixi yi beyexi ba bwadi bakaxikama koku, bamalwa ku bula bwoso bwa Ngalili yi bwa Yudiya, yi ku Yelusaleme ; yi ngulu ya Fumu yakadiko ndo kubapandisa.

¹⁸ Yi mona, babalumi bakacwala muna mbôyaponde pa bolelo ; yi bakapalala kumubwesa yi kumuteka ku mpala anci.

¹⁹ Yi pakadi kabasomona mubwexelu ă kumubwesa bwalo bwa kimbukuma kia bantu, bakabanda kulu kwa ncibo, yi bakamufundusa ku bikidi bia samba, yi bakamupwesa pa bolelo bwanci pakacikaci ku mpala a Yisu.

²⁰ Yi pakamonayi kwetabusa kwabo, akatôya ene, Muntu, mabi ebe amakulekyelebwa.

²¹ Yi i bafundi ba mikanda yi baFalixi bakabanga kwelesa mbata ene, Ñani you atangola Ncembi ? Ñani ubili kulekyela mabi utena Ncembi mutupu ?

²² Mo Yisu akalubukwa mbata yabo akapingasa yi akabambila ene, Nwelesa mbata mu micima yenu kukai ?

²³ Kinani kiamadika lungwoso, ndo kutôya ene, Mabi ebe adi malekyela ; ndo kutôya ene, Bika, enda ?

²⁴ Kaninga binuxelubukwa ene, Mwana a Muntu udi yi bumanya pa loboko bwa kulekyela mabi,—akatôyela muna mbôyaponde ene, Nkwatôyela ene, Bika, ongula bolelo bwebe, yi yaka ku ncibo ebe.

²⁵ Yi akakwombuluka mangwoso ku mpala kwabo, yi akakwombulula bolelo bwakalalayi kulu kwabu, yi akancuka ku ncibo anci udi mu kutumbisa Ncembi.

²⁶ Yi bakakama kama bungi bwabo, yi bakatumbisa Ncembi, yi bakakwolubixibwa yi bowa ene, Twamamona bikamakama lelo.

²⁷ Kunyuma kwa bintu bebi kwakabatukayi, yi akamona musangi a milambu, dina dienci ene, Lebi, uxikamini ku ncibo a milambu, yi akamwambila ene, Ungulandudili.

²⁸ Yi akaxiya bintu bioso, akakwombuluka, yi akamulandudila.

²⁹ Yi Lebi akamwencela lubaki lunene mu ncibo anci ; yi momu mwakadi kimbukuma kinene kia basangi ba milambu yi kia banga bantu bakadi yinabo ku bidya.

³⁰ Yi baFalixi yi bafundi babo ba mikanda bakapindudila beyi banci mapindu ene, Kukai nudedya yi nunonwa yi basangi ba milambu yi boni ?

³¹ Yi Yisu akapingasa yi akabambila ene, Bobo badi yi mpinyu kabasokwabila nanga ; kate bobo badi yi masama.

³² Meme kiluli kulwa bikila bena nkwami, kate boni, badibeli.

³³ Yi bakamwambila ene, Beyi ba Yoano bancila ncilu ya bidya yi balomba ndombu matuku mangi, yi mo nako kabidi beyi ba baFalixi, mo bebe badedya yi banonwa.

³⁴ Yi Yisu akabambila ene, Nubili kuncidika bana ba ncibo a dibakwa bidya pakala mwangaci a dibakwa ukidi yinabo ?

³⁵ Mo matuku analwa anabancudibwa mwangaci a dibakwa, kunyuma banancila ku matuku yia.

³⁶ Yi akabambila kabidi mwele ene, Kakuna muntu apanda kinkutu kipyakipya ndo kutombola kinkutu kia kalikali ; ximbi uxepanda kieki kipyapipya, yi kicini kipyakipya kakinalelekyela yi kinkutu kia kilikali.

³⁷ Yi kakuna muntu ateka malufu a finyo mapyamapya mu bixeba bia kalikali ; ximbi malufu mapyamapya axetondosa bixeba, yi mikyeao anakwecikila yi bixeba binaxipibwa.

³⁸ Kate malufu mapyamapya axebwexebwa mu bixeba bipyabipya.

³⁹ Yi kakuna muntu ndo apunwa malufu a finyo a kalikali unakyeba mapyamapya ; bwalo bwatôyayi ene, Aa a kalikali adi anengela.