LUKA 4 - Disambi Dipyadipya

¹ YISU lolo, akakwolubila yi Mwoxixi a babala, akapiñana ku Yôdana, yi akaxiyibwa kudi Mwoxixi mu mbata a kisobe,

² pa lwedi lwa matuku masangi anai, akakwelekexebwa kudi diabolo ; yi akadi kasodya kintu ku matuku yia, yi pakadi amapwa, akakwombwa ncala.

³ Yi diabolo diakamwambila ene, Ndo Owe udi Mwana a Ncembi, langa dibwe dedi ditulowi ku dimpa.

⁴ Yi Yisu akamupingasa ene, Kwamafundibwa ene, Muntu kanakala yi môyo ku dimpa ditupu.

⁵ Yi akamubandisa, yi akamwebesa mafumu moso a loboko lwa bantu ku kikondo kimokimwe.

⁶ Yi diabolo diakamwambila ene, Nakukupa bumanya bwoso bobu noku, yi dikai dia mafumu aa, bwalo bwamangulongolebwabu ; yi muntu mwoso ungwananga kumupabu, meme mupapabu.

⁷ Mbwôso ndo Owe unanguxingila, bunakala bwebe bungi bwabu.

⁸ Yi Yisu akapingasa yi akamwambila ene, Kwamafundibwa ene, Unaxingila Fumu Ncembi ebe, yi unamusadila yei mutupu.

⁹ Yi akamuxiya ku Yelusaleme, yi akamuteka kulu kwa kitutu kia tempelo, yi akamwambila ene, Ndo Owe udi Mwana a Ncembi, udieli mikyebe pôi kunu paxi,

¹⁰ bwalo bwamafundibwa ene, Unalanga bangele banci ku bwalo bwebe, bakunami ;

¹¹ yi banakwombulula pa makaci abo, ximbi ambeci uxekuma dikasa diebe ku dibwe.

¹² Yi Yisu akapingasa yi akamwambila ene, Kwamatôyebwa ene, Kwelekyexi Fumu Ncembi ebe.

¹³ Yi diabolo, pakadi diamamana kwelekyesa kwoso, diakancuka kudiyi pôi kinga kikondo.

¹⁴ Yi Yisu akapifiana mu Ngalili yi ngulu ya Mwoxixi, yi mwoximo ănci ăkacakana ku mbata muncimancima.

¹⁵ Yi akakweyesa mu bixingidilu biabo, udi mu kutumbixibwa kudi bantu boso.

¹⁶ Yi akalwa ku Nasalete kwakalundixibwayi ; yi akabwela mu kixingidilu bea biakadi mwosambu ănci, ku dituku dia Sabado, yi akakwemana ndo kubala.

¹⁷ Yi mwobotaku ăkamupebwa ă mudimuxi Esaya. Yi akabotola mwobotaku yi akasafiana kidi kiakafundibwa ene,

¹⁸ Mwoxixi a Fumu udi kulu kwamene, bwalo bwamanguxingayi, ngwambili bakombi losangu lunengela ; amangutuma ndo kwambila misungi dia kupaudibwa ; yi bafofo dia meso kuaipudibwa ; kubabatusa kanana bamafinibwa,

¹⁹ yi kwambila bantu dia mwociya ă kumonebwa yi dikasa dinengela kudi Fumu.

²⁰ Yi akabotaka mwobotaku, yi akaulongola kudi munami a kixingidilu, yi akaxikama. Yi meso a bantu boso bakadi mu kixingidilu akamudingila sosonyi.

²¹ Yi akabanga kubatôyela ene, Lelo diyi dedi dia mukanda ă Ncembi diamafikixibwa ku macu enu.

²² Yi bungi bwa bantu bakamutôbôlela ntôbô, yi bakakamina meyi a lwoxixi akancuka ku musuku ănci. Yi bakatôya ene, Ki you ndo mwana a Yosefe ?

²³ Yi akabambila ene, Nunangutôyela mwele ou sôsôlwo ene, Ñanga, udipandisi mikyebe ; makisa moso atwamakwombwa ene, amakwencebwa mu Kapenaumu, enca kunu kabidi mu mbata ebe.

²⁴ Yi akatôya ene, Nwatôyela sôsôlwo ene, Kakuna mudimuxi umoumwe amamonebwa yi dikasa dinengela mu mbata anci.

²⁵ Mo nwatôyela sôsôlwo ene, Ku matuku a Eliya kwakadi bakaxi ba bafu bangi mu Isalele ku kikondo kiakancibikibwa diulu mbula isatu yi ngondo isambomo, biakafika lukombo lunene lwa ncala mu mbata muncimancima ;

²⁶ yi Eliya akadi kasotumibwa kudi muntu mwoso abo mo ku Salefata a ku Xidono, kudi mwamukaxi akadi mukasa a mufu.

²⁷ Yi ku kikondo kia Elixa mudimuxi kwakadi bena sudi bangi mu Isalele, yi kakwakadi muntu abo amakusudibwa mo Namana muna Silia.

²⁸ Yi bungi bwabo bakakwolubixibwa yi bisusu munda mwa kixingidilu pa kwombwa malo aa ;

²⁹ yi bakakwemana, bakamutenyeka kunci kwa bula, yi bakamucwala ku mwolombo ă mbeki akapikibwa bula bwabo kulu, bixemwelabo muxi kabungu.

³⁰ Mo yei akadika pakacikaci pabo, yi akaya bienci.

³¹ Yi akapweka ku Kapenaumu, bula bwa Ngalili, yi akabeyesa ku dituku dia Sabado.

³² Yi bakakamina kweyesa kwanci, bwalo bwakadi diyi dienci yi bumanya.

³³ Yi munda mwa kixingidilu mwakadi muntu utani yi kidimu kia kidimu kibi kia mbindu, yi akakwamena yi diyi dikola,

³⁴ ene, O o! Tudi yinebe bwalo kai, Yisu a Nasalete ? Owe wamalwa ndo kutuxipa ? Namakulubukwa ; udi muna babala you a Ncembi.

³⁵ Yi Yisu akamukama dikamu ene, Ikala polo, yi pauka munda mwanci. Yi kidimu kibi, pakadi kiamamuntuntula paxi pakacikaci pabo kiakapauka munda mwanci kutena kumwombwesa kusama kwoso.

³⁶ Yi bakakama makamu bo-a-bwoso, yi bakatôyelañana, ene, Diyi kai dedi ? Bwalo bwalangayi bidimu bia mbindu yi bumanya yi ngulu, yi bebi biamapauka.

³⁷ Yi mwoximo ăkacakana ku bwalo bwanci ku kidi kioso kia mbata koku.

³⁸ Yi akakwombuluka mu kixingidilu, yi akabwela mu ncibo a Ximono. Mo Ximono mukwanci akadi mu kutata yi kusama kungi kwa mudilu, yi bakamwapangusa ku bwalo bwanci.

³⁹ Yi akakwemana kulu kwanci, akakama mudilu dikamu, yi ăkamuncuka ; yi akakwombuluka mangwoso yi akabasadila.

⁴⁰ Yi pakadi diba ditanabwela, bungi bwabo bakadi yi batati ba masama manga bakabacwala kudiyi, yi akabaka bianci bienci kulu kwa muntu mwoso abo, yi akabapandisa.

⁴¹ Yi bidimu bibi kabidi biakapauka kudi bantu bangi, bidi mu kwamena ene, Owe udi Mwana a Ncembi. Yi akabikama makamu, akabilanga kabitôyi, bwalo bwakamulubukwabio, ene, udi Kalistu.

⁴² Yi pakakya butuku, akabatuka yi akaya ku kidi kiakadi kanana, yi bimbukuma biakamupalala, yi biakalwa kudiyi ; yi baxemuximba kancuki kudibo.

⁴³ Mo yei akabambila ene, Ndi yi bwalo bwa kwambila losangu lunengela lwa bufumu bwa Ncembi ku manga mala kabidi, bwalo bunamatumibwa ndo kwenca nako.

⁴⁴ Yi akadi mu kwambila ambila bantu mu bixingidilu bia mu Ngalili.