LUKA 23 - Disambi Dipyadipya

¹ YI bakakwombuluka kimbukuma kiabo kincimancima, yi bakamucwala kudi Pilata.

² Yi bakabanga kumusanya ene, Twamasañana you muntu udi mu kuungisa ungisa bubila bwecu, amakanda bantu kabalambudi Kyesa milambu, yi amatôya ene, mikyenci udi Kalistu, Fumu.

³ Yi Pilata akamwapangusa ene, Owe udi fumu a bena Yuda ? Yi akamupingasa, ene, Wamatôya sôsôlwo.

⁴ Yi Pilata akatôyela makanda manene yi bimbukuma ene, Kisosañana bubi yi muntu you.

⁵ Mo bobo bakaxengula ene, Amanyingisa nyingisa bantu ku kweyesa kwanci mu bungi bwa Yudiya ; akabanga ku Ngalili yi amalwa pôi kunu.

⁶ Mo pakakwombwa Pilata, akakwapangusa ndo muntu you udi muna Ngalili ;

⁷ yi pakalubukwayi ene, akadi muna mbata a bumanya bwa Elodo, akamutuma kudi Elodo, akadi mikyenci kabidi ku Yelusaleme ku matuku aa.

⁸ Yi Elodo, pakamonayi Yisu, akaxekyelela kungi ; bwalo bwakakyebayi kumumona kikondo kingi, bwalo bwakamakwombwayi malo mangi ku bwalo bwanci ; yi akadingila ambeci kumona kilayixilu kixekwencebwa kudiyi.

⁹ Yi akamwapangusa lolo miapangusu mingi, mo yei akadi kasopingasa diyi dimodimwe.

¹⁰ Yi makanda manene yi bafundi ba mikanda bakakwemana yi bakamusanya yi ngulu.

¹¹ Elodo lolo yi masalai anci bakamutamuna yi bakamukyeca, yi bakamulatisa bilatu bia lwoxixi, yi bakamupingasa kudi Pilata.

¹² Yi Pilata yi Elodo bakadyañana bwenyi ku dituku dedi ; bwalo bwakakwombwelañanabo mwoxingi buxi.

¹³ Pilata lolo akakokyeya makanda manene yi milopwe yi bantu,

¹⁴ yi akabatôyela ene, Nwamacwala muntu you kundi bea muntu amaungisa bantu ; yi mona, meme binamamukwakwala ku mpala yenu, nakadi kisosañana kwona kwoso yi muntu you bwalo bwa malo anwamamusanya ;

¹⁵ yi Elodo mo nako kabidi. Bwalo bwapumupingasayi kutudi ; yi mona, kakuna kintu kialelekyela yi lufu kiapwencebwa kudiyi.

^16-17 Ndo binakumukuma bintu yi nakumupaula.

¹⁸ Mo bakakwamena bo-a-bwoso ene, Xakwala muntu you ; utupaudili Balaba.

¹⁹ Yei ndo muntu akakwelebwa ku lukanu bwalo bwa munyingu ăkatekayi mu bula, yi bwalo bwa kwonda kwa bantu.

²⁰ Mo Pilata akatôya yinabo kabidi, udi mu kukyeba kulekyela Yisu.

²¹ Mo bakakwamena ene, Umukopeki ku nkulusu, umukopeki ku nkulusu.

²² Yi akabatôyela diamusatu ene, Kukai ? Muntu you amakwenca bubi kai ? Kiasañana bwalo bwoso yinanci bwa kufwa ; ndo binakumukuma yi nakumulekyela.

²³ Mo bakaxengula xengula yi meyi akola, badi mu kulomba ene, Axipibwi ku nkulusu. Yi meyi abo akapila.

²⁴ Yi Pilata akasambola ene, mwalombabo mwencebwi.

²⁵ Yi akapaula you akakwelebwa ku lukanu bwalo bwa munyingu yi bwa kwonda, akalombabo ; mo Yisu ndo akalongolayi ku nyinga yabo.

²⁶ Yi pakamunculabo bakabamba muntu dina dienci ene, Ximono, muna Kulene udi mu kulwa ku mbata, yi bakabaka nkulusu kulu kwanci bixemwombululayi kunyuma kwa Yisu.

²⁷ Yi kimbukuma kinene kia bantu bakamulanda, yi kia babakaxi, bakadikuma biedi yi bakamudidila.

²⁸ Mo Yisu akakulumuka kudibo yi akatôya ene, Bana ba Yelusaleme, kanungudididi ; kaninga nudididili mikyenu yi bana benu.

²⁹ Bwalo, mona, matuku alolwa anatôyabo ene, Balwangwasanibwi ndo bikuta, yi mafu atalela bana, yi mabele atanusa i bana.

³⁰ Ku kikondo kieki kunabangabo kutôyela bipongopongo ene, Nuponi kulu kwecu ; yi mpongo ene, Nutubukiii muxi.

³¹ Ndo bencenca malo aa ku muci ukidi mai, banakwenca kai ku muci mwomu ?

³² Yi banga bantu babidi, boni, bakacwadibwa yinanci kabidi kuya xipibwa.

³³ Yi pakafikabo ku kidi kiabikidibwa ene, Kibwongwasa, pakamukopekabo ku nkulusu koku, yi boni, umoumwe ku kidyo yi munga ku kimoso.

³⁴ Yi Yisu akatôya ene, Tete, ubalekyeli bwalo butasolubukwabo mwencencabo. Yi bakakwabanyañana bilamba bienci, yi bakacwa lubexi.

³⁵ Bantu lolo bakakwemana badi mu kutebela ; yi bantu banene kabidi bakamudidika ene, Akapandisa banga bantu ; adipandisi mikyenci ndo yei udi Kalistu a Ncembi, amasungudibwa kudiyi.

³⁶ Yi masalai kabidi akamukyeca, yi akalwa kudiyi adi mu kumulongola finika,

³⁷ ene, Ndo Owe udi Fumu a bena Yuda, udipandisi mikyebe.

³⁸ Yi mukanda ăkafundibwa kabidi kulu kwanci ku meyi a luna Ngiliki yi a luna Loma, yi a luna Ebeleo, ene, You udi Fumu a bena Yuda.

³⁹ Umoumwe lolo a boni bakakopekyebwa akamutangola ene, Owe ka kalistu ? Udipandisi mikyebe yi coco.

⁴⁰ Mo munga akakulumuna diyi, akamukama dikamu ene, Owe, kabidi kusocina Ncembi ? owe wamabelebwa lopelo lumolumwe yinanci.

⁴¹ Yi coco twamabelebwa yi nkwami sôsôlwo, bwalo butwamangata sayi alelekyela yi makisa ecu ; mo you muntu kakixili bubi bwoso pô.

⁴² Yi akatôyela Yisu ene, Ungwellpo lukanyi palolwa Owe ku bufumu bwebe.

⁴³ Yisu akamutôyela ene, Nkwatôyela sôsôlwo ene, Lelo unakala yinami mu Paladisi.

⁴⁴ Kwakadi lolo pa ola amusambomo, yi mwedima ăkalwa kulu kwa mbata muncimancima pôi ku ola a dibwa.

⁴⁵ Diba diakapindixibwa, yi mbuxa a ngumbu a tempelo akasambudibwa pakacikaci.

⁴⁶ Yi pakadi Yisu amakwamena yi diyi dikola akatôya ene, Tete, ku makaci ebe ndo kungwateka kidimu kiamene. Yi pakadi amatôya nako akakica.

⁴⁷ Pakamona kapalai ka masalai mwakapona, akatumbisa Ncembi ene, Sôsôlwo, you akadi muna nkwami.

⁴⁸ Yi bimbukuma bioso biakakokama ku kimonenu kieki, pakamonabo bintu biakapona, bakapiñana badi mu kudikuma biedi.

⁴⁹ Yi bungi bwabo bakamulubukwa, yi babakaxi bakamulandudila pôi ku Ngalili, bakakwemana kulekule, badi mu kutebela bintu bebi.

⁵⁰ Yi mona, mwamulumi, dina dienci ene, Yosefe, akadi nkolomo, muntu unengela yi a nkwami,

⁵¹ akadi kasokwetabusafiana yi lukanyi Iwabo ndo yi dikisa diabo ; yei ndo muna Alimatea, bula bwa tena Yuda, akadingidila bufumu bwa Ncembi.

⁵² Yei akaya kudi Pilata yi akalomba mumbidi ă Yisu.

⁵³ Yi akaupwesa, yi akaudinga mbuxa a susu ; yi akamuladika mu lukita lukulula mu lubwe, lutalala muntu mwoso munda mwalu.

⁵⁴ Kwakadi lolo dituku dia kulungika Kidikixilu, yi Sabado akadi mu kukokyela pepe.

⁵⁵ Yi babakaxi bakadi bamasangila yinanci pôi ku Ngalili bakalanda, bakamona lukita yi mwakatekyebwa mumbidi ănci.

⁵⁶ Yi bakapiñana yi bakalungika manonu yi manyi. Yi bakakwomowa ku Sabado bea biakalangibwa mulangu.