LUKA 20 - Disambi Dipyadipya

¹ YI ku dinga diba dia matuku aa, pakakweyesayi bantu mu tempelo, yi pakakwambilayi losangu lunengela, pakalwa makanda manene yi bafundi ba mikanda kudiyi, yi babakulu,

² yi bakamutôyela ene, Utwambili dia bumanya bwencenca Owe bintu bebi yinabu, yi nani akakupa bumanya bobu ?

³ Yei akapingasa yi akabatôyela ene, Meme kabicu nakunwapangusa diapangusa dimodimwe, yi nungwambili ;

⁴ Kunumeya kwa Yoano kwakadi ndo kwa diulu sungu kwa bantu ?

⁵ Yi bakakwelesañana mbata mikyeabo ene, Ndo tuxetôya ene, Kwa diulu, yei unatôya ene, Kukai kanwamwetabusa ?

⁶ Mo ndo tuxetôya ene, Kwa bantu ; bungi bwa bantu banatwela mabwe, bwalo bwamakwetabuxixibwabo ene, Yoano akadi mudimuxi.

⁷ Yi bakapingasa ene, Katusolubukwa kwakadiku.

⁸ Yi Yisu akabatôyela ene, Meme kabidi kisonwambila pa bumanya bungwencenca bintu bebi yinabu.

⁹ Yi akabanga kutôyela bantu mwele ou ene, muntu akakuna kibidi kia finyo, yi akakixiya ku makaci a bena midimo, yi akancuka ku munga mbata kikondo kingi.

¹⁰ Yi ku kikondo kia mamoma kwakatumayi musadi kudi bena midimo bixemupabo mamoma a kibidi ; mo bena midimo bakamukuma, yi bakamuncula makaci matupu.

¹¹ Yi akatuma munga musadi kabidi ; mo bakamukuma yei kabidi, yi bakamukolomona yi bakamuncula makaci matupu.

¹² Yi akatuma munga amusatu ; yi bobo, pakadi bamamutapa kabidi, bakamutenyeka kunci.

¹³ Yi fumu a kibidi kia finyo akatôya ene, Nakukisa beci ? Nakutuma mwanami munangibwi ; ambeci banamunemeka.

¹⁴ Mo pakamumona bena midimo, bakakwelañana nkanyi ene, You ndo muna mwokito ; tumuxipi bixeakala mwokito ndo ěcu.

¹⁵ Yi bakamutenyeka kunci kwa kibidi yi bakamuxipa. Mbwôso fumu a kibidi unakwenca yinabo beci ?

¹⁶ Unalwa bumisa bena midimo baba, yi unapa banga bantu kibidi kia finyo. Yi pakakwombwabo bakatôya ene, Ai ! kumoni.

¹⁷ Mo yei akabatebela yi akatôya ene, Mbwôso kinani kieki kiakafundibwa ene, Dibwe diakanyañana babaki ba ncibo, kadedi diamalwa dibwe dia ku ilunga basodi ?

¹⁸ Muntu mwoso unapona kulu kwa dibwe dedi unaxipibwa bicini bicini ; mo muntu mwoso unapona dedi kulu kwanci, dinamupela bukula bea masangu.

¹⁹ Yi bafundi ba mikanda yi makanda manene bakapalala ku ola you ndo kumukwata ; yi bakacina bantu ; bwalo bwakalubukwabo mwakatôyayi mwele ou ku bwalo bwabo.

²⁰ Yi bakamuxexela yi bakatuma batebedi bakadielekyesa mikyeabo iuna bena nkwami, bixemutongolabo ku kutôya kwanci, bixemulongolabo kudi ngulu ya mulopwe yi ku bumanya bwanci.

²¹ Yi bakamwapangusa ene, Mweyexi, twalubukwa ene, Owe watôya tôya yi weyesa eyesa yi nkwami, yi kusotebela mumbidi ă muntu mwoso, kate weyesa eyesa mwosambu ă Ncembi yi sôsôlwo.

²² Kwalelekyela yi bwadi coco kulambula Kyesa, ndo kumoni ?

²³ Mo yei akalubukwa ncimi yabo, yi akabatôyela ene, Kukai nungwelekyesa ?

²⁴ Nungwebesi denalio. Udi kifwanisa kia ñani ? yi mukanda ă ñani udi kulu ? Yi bakapingasa ene, Kia Kyesa.

²⁵ Yei akabatôyela ene, Mbwôso nulongoli Kyesa bintu bia Kyesa, yi nulongoli Ncembi bintu bia Ncembi.

²⁶ Yi bakadi kabasolubukwa kumutongola ku diyi dedi ku mpala ya bantu ; yi bakakamina diyi diakapingasayi, yi bakapudikila.

²⁷ Yi banga baSaduki bakalwa, banyañana bwalo bwa kwombuludibwa kwa bafu ene, kakunako. Yi bakamwapangusa

²⁸ ene, Mweyexi, Mosese akatufundila ene, Ndo muntu mukulwanci unafwa, udi yi mukaxi, yi unafwa kutena amalela bana, mwakunyenci unangata mukaxi yi unalelela mukulwanci bana.

²⁹ Kwakadi lolo bana ba mama sambwali. Mwamukulu akangata mwamukaxi dibakwa, yi akafwa kutena bana.

³⁰ Yi you amubidi

³¹ yi you amusatu akamwangata ; yi mo nako kabidi babalumi sambwali ; bakadi kabasoxiya bana, yi bakafwa.

³² Kunyuma mwamukaxi akafwa kabidi.

³³ Mbwôso ku kwombuludibwa kwa bafu kunakalayi mukaxi a muntu kai ? bwalo bwakamwangata bantu sambwali.

³⁴ Yi Yisu akabapingasa ene, Bana ba mwociya ou bamangata mabakwa yi bamapebwa mabakwa ;

³⁵ mo bobo bamakwelekyexebwa ene, bamalelekyela yi kwangata kidi mu mwociya yiwa, yi mu kwombuludibwa kudi bafu, kabasoangata mabakwa yi kabasopebwa mabakwa.

³⁶ Bwalo butasolubukwabo kufwa kabidi, bwalo bwamalelekyelabo yi bangele, yi badi bana ba Ncembi, bwalo budibo bana ba kwombuludibwa.

³⁷ Mo bwalo bwa bafu, ene, banabixibwa, isanga Mosese akakwebesa noku mu diembi dia dibunca, pakabikilayi Fumu ene, Ncembi a Abalami yi Ncembi a Isaka yi Ncembi a Yakobo.

³⁸ Mo yei kiena Ncembi a bafu kate a bena môyo ; bwalo bwakala bantu boso yi môyo ku mpala anci.

³⁹ Yi banga bafundi ba mikanda bakamukulumuna ene, Mweyexi, wamatôya loko.

⁴⁰ Bwalo bwakacinabo pa kumwapangusa bunga bwalo kabidi nyô.

⁴¹ Yi akabatôyela ene, Kukai batôya ene, Kalistu udi Mwana a Dafidi ?

⁴² Yi Dafidi mikyenci amatôya mu mukanda ă Misambu ene, Fumu akatôyela Fumwami ene, Xikama pa kidyo kiamene

⁴³ binakuteka bantu batanda yinebe katanda ka makasa ebe.

⁴⁴ Dafidi lolo umwabikila ene, Fumu ; mbwôso yei udi mwananci beci ?

⁴⁵ Yi pakadi bungi bwa bantu badi mu kubaka macu, akatôyela beyi banci ene,

⁴⁶ Nudimuki bwalo bwa bafundi ba mikanda, bananga kwendakana yi mayanga malemale, yi bananga kubixibwa mu mabanca a bisalu, yi bananga nkwasa ya buxi mu bixingidilu, yi bidi bia buxi mu mbaki ;

⁴⁷ badedya ncibo ya bakaxi ba bafu, yi balomba lomba ndombu milemile yi mancanga. Kababa banabelebwa lopelo lunadika kukola.