LUKA 19 - Disambi Dipyadipya

¹ YI akabwela mu Yeliko yi akadi mu kudika momu.

² Yi mona, mwamulumi akabikidibwa ene, Sakayo ; akadi mwamukulu a basangi ba milambu, yi akadi muna bodidi.

³ Yi akapalala kumona Yisu bidiyi, yi akadi kasolubukwa bwalo bwa kimbukuma kia bantu, bwalo bwakadiyi muntu mwepe.

⁴ Yi akaya lubilu ku buxi, akabanda mu muci ă kikuyi bixemumonayi ; bwalo buxedikayi pa ncila you.

⁵ Yi pakafika Yisu ku kidi, akasangola meso anci yi akamutôyela ene, Sakayo, pweka mangwoso ; bwalo bunxesala lelo mu ncibo ebe.

⁶ Yi akapweka mangwoso yi akamwangata yi kiango.

⁷ Yi pakamonabo, bakapindula bungi bwabo ene, Amaya lala kwa muntu udi mwoni.

⁸ Yi Sakayo akakwemana yi akatôyela Fumu ene, Mona, Fumu, mpapa bakombi lwedi lwa bima biamene pakacikaci ; aka lolo namancula kintu kimokimwe kudi muntu mwoso ku bumanya, ngwapingasa Iwedi lwa bintu binai.

⁹ Yi Yisu akamwambila ene, Kupandixibwa kwa môyo kwamafika lelo ku ncibo you, bwalo budiyi kabidi mwana a Abalami.

¹⁰ Bwalo bwamalwa Mwana a Muntu kulwa palala you ăkabungwa yi kumupandisa.

¹¹ Yi pakakwombwabo bintu bebi, akatôya kabidi yi akabambila mwele, bwalo bwakadiyi pepe yi Yelusaleme, yi bakakwenca ene, bufumu bwa Ncembi buxemoneka nkyekyu nkyekyu.

¹² Ka biakatôyayi ene, Muntu munene akaya ku munga mbata kulekule kuya diangacila bufumu yi kulwa pinana.

¹³ Yi akabikila basadi banci disangi, yi akabapa mpalata disangi, yi akabatôyela ene, Nuleki pôi kikondo kinapinana.

¹⁴ Mo bangongo banci bakamunyañana, yi bakatuma lutumu lwa kumulanda kunyuma ene, Katusoli muntu you uxeakala fumwecu.

¹⁵ Yi pa kipinaninu kienci, pakadi amadya bufumu bwanci, pakatôyayi ene, basadi baba bakapayi mpalata babikidibwi kudiyi, bixelubukwayi biakatetowabo pa kuleka yinayo.

¹⁶ You a buxi akalwa ene, Fumu, mpalata ebe amasomboka sombo a mpalata disangi.

¹⁷ Yi akamutôyela ene, Kunengela, musadi unengela ; bwalo bwamakwenca yi kibaku ku kintu kibende, ikala owe yi bumanya kulu kwa mala disangf.

¹⁸ Yi you amubidi akalwa ene, Fumu, mpalata ebe amasomboka sombo a mpalata itano.

¹⁹ Yi akamutôyela kabidi ene, Ikala owe kabidi yi bumanya kulu kwa mala atano.

²⁰ Yi munga akalwa ene, Fumu, mona, mpalata ebe kayou, unakabumba musuka mu kitambala.

²¹ Bwalo bunakakucina, bwalo budi owe muntu ukola ; wamakwongula kintu kitaladika owe, yi wamabuka bintu bitakuna owe.

²² Yei akamutôyela ene, Nakukubela ku diyi dia musuku ebe mikyebe, musadi mubi ; wakalubukwa ene, meme ndi muntu ukola, namakwongula kintu kintaladikili, yi namabuka bintu bintakunini.

²³ Mbwôso kukai wakadi kusolongola mpalata amene kudi basumbanyanani ? yi meme nxemwangata yi kiepe ku kipinaninu kiamene.

²⁴ Yi akatôyela bantu bakakwemana pepe ene, Nunculi mpalata kudiyi, numulongoli kudi you udi yi mpalata disangi.

²⁵ Yi bakamutôyela ene, Fumu, yei udi yi mpalata disangi.

²⁶ Nwatôyela ene, Muntu mwoso apwangata, unapebwa bintu ; mo you utena yi kintu, kudiyi kunancudibwa isanga bintu bidi yinanci.

²⁷ Kaninga bwalo bwa bantu baba batanda yinami, batasokyeba meme kwakala yi bufumu kulu kwabo, nubafikisi kunu, nubaxipi ku mpala amene.

²⁸ Yi pakadi amatôya nako, akalwangwala ku buxi, udi mu kuximuna ku Yelusaleme.

²⁹ Yi pakakokyelayi pepe yi Betefange yi Betani ku lupongo lwabikidibwa ene, lwa Olife, akatuma bantu babidi ba beyi banci

³⁰ ene, Nuyi mu kala kabende kadi ku mpala enu ; yi panunabwela nunasañana mwana a mpundu momu musuka, utakwapemeni muntu kulu kwanci pô ; numusuli, yi numucwali kunu.

³¹ Yi ndo muntu mwoso unanwapangusa ene, Numwasula kukai ? nunatôya noku ene, Fumu umwabila.

³² Yi bobo bakatumibwa bakancuka, yi bakasañana isanga bea biakabatôyelayi.

³³ Yi pakadi badi mu kusula mwana a mpundu, bafumu banci bakabatôyela ene, Nwasula mwana a mpundu kukai ?

³⁴ Yi bobo ene, Fumu umwabila.

³⁵ Yi bakamucwala kudi Yisu ; yi bakakwela bilamba biabo kulu kwa mwana a mpundu, yi bakakwapeya Yisu kulu kwanci.

³⁶ Yi pakakwendayi bakakwadisa bilamba biabo mu ncila.

³⁷ Pakadi lolo utanakokyela pepe, ku mpulumuku a lupongo lwa Olife, kibumbu kincimancima kia keyi banci bakabanga kuxekyelela yi kutumbisa Ncembi yi diyi dikola, bwalo bwa makisa moso a ngulu akamamonabo ;

³⁸ ene, Fumu atumbixibwi ulolwa ku dina dia Fumu ; polo mu diulu, yi dikai mu kidi kiadika kulu.

³⁹ Yi banga baFalixi ba ku kimbukuma bakamutôyela ene, Mweyexi, kama beyi bebe dikamu.

⁴⁰ Yi akapingasa ene, Nwatôyela ene, ndo bantu baba banapudikila, mabwe anakwamena.

⁴¹ Yi pakakokyelayi pepe akamona bula, yi akabuncudila masonci,

⁴² ene, Ximbi wamalubukwa ku dituku dedi, isanga owe, bintu bebi bidi bwalo bwa polo ebe ; kaninga nkyekyu bidi bisokoka ku meso ebe.

⁴³ Bwalo bunalwa matuku kudi anakudinga bantu batanda yinebe kimana kô, banakubukila munda, yi banakubamba ku mwanca mwoso,

⁴⁴ banakuntuntula paxi yi bana bebe munda mwebe ; yi kabanaxiya munda mwebe dibwe kulu kwa dibwe ; bwalo bwakadi kusolubukwa kikondo kia kilulu kiakakulubwa.

⁴⁵ Yi akabwela mu tempelo yi akabanga kubapaula bakaleka munda,

⁴⁶ yi akabatôyela ene, Kwamafundibwa ene, Ncibo amene unakala ncibo a lulombu, mo nonu nwamamuteka kisokomenu kia oefi.

⁴⁷ Yi akaxweyesa eyesa mu tempelo ku dituku ku dituku ; mo makanda manene yi bafundi ba mikanda yi bantu banene ba bantu bakapalala kumuxipa,

⁴⁸ yi bakadi kabasosañana mwa kwenca, bwalo bwakabaka bungi bwa bantu macu abo ndo kumwombwa.