LUKA 17 - Disambi Dipyadipya

¹ YI akatôyela beyi banci ene, Biponexelu kabisolubukwa kulekyela kulwa, mo mpeya kudi muntu ulolwa biponexelu kudiyi.

² Kuxeakala loko ku bwalo bwanci ndo dibwe dinene dixemusukibwa ku xingu anci, yi uxekwelebwa mu mai ; kumoni kuponesa mwana umoumwe a babaki baba babende.

³ Nudinami mikyenu ; ndo muna kwebe onona, umukami dikamu ; yi ndo udiabela umulekyeli.

⁴ Yi ndo amakwonena mona sambwali ku dituku dimodimwe, yi ndo amakulumuka kudi makulumuka sambwali ene, Namadibela, owe unamulekyela.

⁵ Yi batumibwi bakatôyela Fumu ene, Lundisapo kwetabusa kwecu.

⁶ Yi Fumu ene, Nonu ndo nwakala yi kwetabusa luna mutongu ă mutadi, nuxetôyela muci ou ă kikuyi ene, Kondowa, udikuni mu mai manene, yi uxenwedeya.

⁷ Mo muntu kai udi yinenu, ndo udi yi musadi amadima ndo amanama mikwakwa, papinanayi ku mbata, uxemutôyela ene, Lwaka lwa xikami ku mesa ?

⁸ Ki unamutôyela ene, Lungika bidya biamene, lata kilamba kiebe, ungusadili binxedya yi binxenwa ; yi kunyuma owe lolo unadya yi unanwa.

⁹ Yei axingila musadi biloba bwalo bwamakwencayi mwapulangibwa ?

¹⁰ Mo nako nonu kabidi, panakala nwamakwenca bintu bioso biamanulangibwa, nutôyi ene, Tudi basadi ba kanana ; twamakwenca bintu bitwakadi yi bwalo bwa kwenca.

¹¹ Yi pakakwendayi lwa Yelusaleme, akadika pakacikaci pa Samalia yi Ngalili.

¹² Yi pakabwelayi mu bunga bula, bena sudi disangi bakapomana yinanci, bakakwemana kulekule.

¹³ Yi bakakwamena diyi ene, Yisu Mweyexi, utwombwelipo mwengo.

¹⁴ Yi pakabamonayi, akabatôyela ene, Nuyi diebesa mikyenu kudi makanda. Yi pakadi batanaya bakasusudibwa.

¹⁵ Yi umoumwe abo, pakamonayi amapandixibwa, akapiñana yi akatumbisa Ncembi yi diyi dikola ;

¹⁶ akapona mpala muxi ku makasa anci yi akamuxingila biloba ; yi yei akadi muna Samalia.

¹⁷ Yi Yisu akakulumuna ene, Ki bantu disangi bamasusudibwa ? Kaninga bantu dibwa badi kupai ?

¹⁸ Muntu kasosafianibwa amapinana kulwa tumbisa Ncembi utena muntu you abene.

¹⁹ Yi akamutôyela ene, Emana, enda ; kwetabusa kwebe kwamakupandisa.

²⁰ Yi pakadi amakwapanguxibwa kudi baFalixi pa kikondo kixelwa bufumu bwa Ncembi, akabapingasa ene, Bufumu bwa Ncembi kabusolwa yi kuxexelebwa kwa bantu ;

²¹ yi kabanatôya ene, Mona kunu ! ndo ene, Mona koku ! bwalo, mona, bufumu bwa Ncembi budi pakacikaci penu.

²² Yi akatôyela beyi ene, Matuku analwa anunakyeba kumona dituku dimodimwe dia matuku a Mwana a Muntu, yi kanunadimona.

²³ Yi bananutôyela ene, Mona koku ! Mona kunu ! Mo kanuyi, kanubalandudidi.

²⁴ Bwalo bea bialumuka musadi ă kapenya, mu kicini kimokimwe kia diulu kuya teka obo pôi ku kinga kicini muxi mwa diulu, ndo binakala Mwana a Muntu mu dituku dienci.

²⁵ Mo buxi uxetata bintu bingi yi uxenyananibwa kudi mwociya ou.

²⁶ Yi luna biakadi ku matuku a Noa binakala kabidi ku matuku a Mwana a Muntu.

²⁷ Bakadya, bakanwa, bakangata mabakwa, yi bakapebwa mabakwa, pôi dituku diakabwela Noa mu kibusu, yi muyi ăkalwa yi ăkababumisa bungi bwabo.

²⁸ Bea biakadi ku matuku a Loto kabidi ; bakadya, bakanwa, bakakwola, bakakwodisa, bakakuna, bakakwabaka ncibo ;

²⁹ mo ku dituku diakabatuka Loto mu Sodomo kwakaloka mudilu yi sulufa mu diulu, biakababumisa bungi bwabo.

³⁰ Kunakala mo nako kabidi ku dituku dinakwebexebwa Mwana a Muntu.

³¹ Ku dituku dedi, you unakala kulu kwa ncibo, yi bima bienci munda mwa ncibo, kapweki kuya bincula ; yi mo nako you unakala ku mbata kapinani.

³² Nweli Loto mukasanci lukanyi.

³³ Muntu mwoso unapalala kubumba môyo ănci unauncimisa, yi muntu mwoso unauncimisa unaubumba.

³⁴ Nwatôyela ene, Ku butuku bobu kunakala babidi pa ntangi umoumwe, umoumwe unancudibwa yi munga unaxiyibwa.

^35-36 Babakaxi babidi banacusañana ku kinu ; umoumwe unancudibwa yi munga unaxiyibwa.

³⁷ Yi bakamupingasa ene, Kupai, Fumu ? Yi akabambila ene, Kwoso kudi mumbidi mufu, koku kabidi kunasangixibwa mpungu.