LUKA 12 - Disambi Dipyadipya

¹ KU kikondo kieki, pakakokama bimbukuma bia bantu nkone yi nkone biakanyatañanabo, kwakabangayi kutôyela beyi banci buxi ene, Nudimuki bwalo bwa kiolubixilu kia baFalixi kidi mancanga.

² Mo kakuna bwalo buncibika butasokwebexebwa, ndo bwa busoko butasolubukibwa.

³ Mbwôso bwalo bwoso bunwamatôya ku mwedima bunakwombwebwa ku obo ; yi meyi moso anwamatôya ku macu mu ngumbu ya munda anasakolebwa kulu kwa ndbo.

⁴ Yi nwatôyela nonu nudi bimbila biamene ene, Kanucini bantu baxipa mumbidi, yi kunyuma kabena yi kinga kintu kialubukwabo kwenca.

⁵ Mo nakunwebesa you unuxecina. Numucini yei udi yi bumanya bwa kwela bantu mu dilungu dia mudilu kunyuma kwamabaxipayi ; ya, nwatôyela ene, Numucini yei.

⁶ Ki bisompwodya bitano biamakwodixibwa ku diso dia tumpalata tubidi ? Yi kakuna kimokimwe kiabio kiamakwelwebwa bwilwa kudi Ncembi.

⁷ Kate isanga nyonyi ya micwe yenu yamabadibwa bungi bwayo. Kanucini ; bwalo bunwadika bisompwodya bingi diso.

⁸ Mo nwatôyela ene, Muntu mwoso unangusakola ku mpala ya bantu, Mwana a Muntu unamusakola kabidi ku mpala ya bangele ba Ncembi ;

⁹ mo muntu ungwanyañana ku mpala ya bantu, unanyananibwa ku mpala ya bangele ba Ncembi.

¹⁰ Yi muntu mwoso unancula diyi dibi bwalo bwa Mwana a Muntu, dinamulekyelebwa ; mo you atangola Mwoxixi a babala mwotangu, kaunamulekyelebwa.

¹¹ Yi pananucwalabo ku bixingidilu yi ku mpala ya milopwe yi ya bena bumanya, kanufwi mutete munuxepingasa, ndo binuxepingasa, ndo binuxetôya ;

¹² bwalo bunanweyesa Mwoxixi a babala bixetôyebwa ku ola you.

¹³ Yi muntu a mu kimbukuma akamutôyela ene, Mweyexi, tôyela mukulwami abanyanani yinami mwakito.

¹⁴ Kaninga yei ene, Muntu, nani amanguteka musambodi ndo mukwami kulu kwenu ?

¹⁵ Yi akabatôyela ene, Nudimuki, nudinami ku luxindilu lwoso, bwalo isanga muntu udi yi bima bingi, môyo ănci kauna mu bintu bidiyi yinabio.

¹⁶ Yi akabatôyela mwele ene, Bibidi bia mwodidi biakalelañana bongonco.

¹⁷ Yi akakwela lukanyi munda ene, Nkisi beci ? Bwalo buntena yi kidi kia kubumba mixekye yamene.

¹⁸ Yi akatôya ene, Nakwenca nako ; nakusasula bibumbilu biamene yi nakwabaka binga binabidika binene, yi nakubumba mixekye yamene mioso momu, yi bima biamene ;

¹⁹ yi nakutôyela mucima ămene ene, Mucima, udi yi bima bingi biamakutekyelebwa bwalo bwa mbula mingi ; omowa, dyaka, nwaka, xekyelela.

²⁰ Mo Ncembi akamutôyela ene, Mudibi, ku butuku bobu kunadilabo kidimu kiebe ; yi bintu biamalungika owe binakala bia nani ?

²¹ Kudi mo nako bwalo bwa muntu udiabumbila mikyenci bima, yi kiena yi bodidi ku mpala a Ncembi.

²² Yi akatôyela beyi banci ene, Mbwôso nwatôyela ene, Kanwakadi yi mutete bwalo bwa môyo, binuxedya ; ndo bwalo bwa mumbidi, binuxelata.

²³ Môyo ămadika bidya, yi mumbidi ămadika bilamba.

²⁴ Nweli binkalankata nkanyi ; kabisokuna yi kabisobuka ; kabisoakala yi kibumbilu ndo yi mbutu ; yi Ncembi ubiadisa. Yi nonu, ki nonu nwamadika nyonyi ?

²⁵ Mo nani udi yinenu, isanga uxekwela lukanyi, ubili kudilundisa kubiti umoumwe ku lwedi lwanci ?

²⁶ Mbwôso ndo kanusolubukwa kwenca kintu kieki isanga kidi kibende nci, kukai nudi yi mutete ku bwalo bwa binga bintu ?

²⁷ Nweli masusu nkanyi, mwalundao ; kasokamba yi kasokuma nkumena ; mo nwatôyela ene, Isanga Solomono mu dikai dienci dincimancima akadi kasolacibwa bea luna dimodimwe dedio.

²⁸ Mo ndo Ncembi amalatisa bilo nako bidi ku mbata lelo, yi binakwelebwa mu dilungu mankyelo, ki unadika kunulatisa nonu, bena kwetabusa kubende ?

²⁹ Yi nonu, kanupaladi binuxedya yi binuxenwa, yi kanwakadi yi mutete ;

³⁰ bwalo bwapalala mabila a loboko bintu bebi bioso, yi Tetenu amalubukwa ene, nuxeakala yi bintu bebi.

³¹ Kaninga nupalali bufumu bwanci, yi bintu bebi binanubodeyebwa.

³² Kanucini, kibumbu kibende kia mikwakwa, bwalo bwamaxekyelela Tetenu ndo kunupa bufumu.

³³ Nwodisi bintu bidi yinenu, yi nulongoli malongi a bonkangi ; nudipangili nkonka yitasofwa, bodidi butasoxikila, munda mwa diulu ; mutasokokyela mwefi pepe, yi mutasoxipañana bixi pô.

³⁴ Ku kidi kitani ngombo yenu, koku kabidi kunakala mucima ěnu.

³⁵ Makondu enu akobebwi bilamba loko, yi minda yenu yalumuki ;

³⁶ yi nonu nwakali bea luna bantu badingila fumwabo ku kikondo kinapiñanayi ku bidya bia dibakwa ; mbwôso palolwayi yi pakwakwalayi, banamudipudila mangwoso.

³⁷ Balwangwasanibwi basadi baba, banasafiana fumu palolwayi, badi mu kutebela ; nwatôyela sôsôlwo ene, unakoba kilamba kienci, unabaxikika ku bidya, yi unalwa basadila.

³⁸ Yi ndo ulolwa ku kilo kiamubidi yi ndo ku kilo kiamusatu, yi unabasafiana mo nako, balwangwasanibwi ndo basadi baba.

³⁹ Mo nulubukwi nako, ene, ximbi fumu a ncibo amalubukwa pa ola ulolwa mwefi, uxetebela, kaxelekyela ncibo anci atubudibwi.

⁴⁰ Mbwôso nonu nwakali loko ; bwalo bulolwa Mwana a Muntu ku ola unutasokwenca.

⁴¹ Yi Pita akatôya ene, Fumu, wamatutôyela coco mwele ou ; sungu bungi bwa bantu kabidi ?

⁴² Yi Fumu akatôya ene, Ñani lolo udi nkôngôlo you, muna kibaku yi muna lukanyi, unateka fumwanci kulu kwa ncibo anci, abapi lwedi lwa bidya ku kikondo ku kikondo ?

⁴³ Mulwangwasanibwi ndo musadi you unasañana fumwanci, palolwayi, udi mu kwenca nako.

⁴⁴ Nwatôyela sôsôlwo ene, unamuteka kulu kwa bintu bioso bidi yinanci.

⁴⁵ Kaninga ndo musadi you uxetôya mu mucima ănci ene, Fumwami amakwopisa kulwa, yi unabanga kukuma basadi ba babalumi yi ba babakaxi, yi unabanga kudya yi kunwa, yi kukolwa nkolwa ya malufu ;

⁴⁶ fumu a musadi you unalwa ku dituku ditasodingilayi, yi ku ola utasolubukwayi, yi unamukuma bintu bongonco, yi unamulungikila kidi kienci yi bantu batena yi kwetabusa.

⁴⁷ Kaninga musadi you akalubukwa nyinga ya fumwanci, yi akadi kasodilungika mikyenci yi akadi kasokwenca nyinga yenci, unakumibwa bintu bingi ;

⁴⁸ mo you akadi kasolubukwa, yi akakwenca makisa amalelekyela yi kukuminibwa bintu, unakumibwa bintu bibende. Yi muntu mwoso amapebwa bintu bingi, kudiyi kunadidibwa bintu bingi ; yi kudiyi amalongolabo bintu bingi kunadikabo kumulomba bintu bingi.

⁴⁹ Nakalwa ndo kwela mudilu pa loboko ; yi ngwakyeba kai ? Mudilu kunamikibwa isanga nkyekyu

⁵⁰ Kaninga ndi yi kunumeyebwa kunumeyebwa yinaku, yi kusama kwa bubi kudi yinami binamanibwaku!

⁵¹ Nonu nwencenca ene, Namafika ndo kuteka polo ku loboko ? Nwatôyela ene, kumoni ; kate kunamuna namuna bantu.

⁵² Bwalo pôi nkyekyu, bantu batano mu ncibo umoumwe bañanamukanana ; basatu banatanda yi babidi, yi babidi yi basatu.

⁵³ Tete unatanda yi mwana, yi mwana yi tete ; mama yi mwana a babakaxi, yi mwana yi mamanci ; mwamukaxi yi mukaxi a mwananci, yi mukaxi yi mukwanci.

⁵⁴ Yi akatôyela bimbukuma kabidi ene, Oka nwamona dilendi didi mu kubanda ku bolongye buyeya munyinya, nwamatôya mangwoso ene, mbula yilolwa ; yi kulolwa mo nako.

⁵⁵ Yi oka nwamona lupepele lwa ku sudu lutanapupuya, nwamatôya ene, Munyinya ă bubi ulolwa ; yi kulolwa mo nako.

⁵⁶ Bena mancanga, nwalubukwa mwa kwelekyesa mpala a loboko yi a diulu ; mo kanusolubukwa kwelekyesa kikondo kieki beci ?

⁵⁷ Yi ku bwalo kai isanga mikyenu kanusosambola sambo udi yi nkwami ?

⁵⁸ Pakala udi mu kuya yi muntu udi yinebe kimu ku mpala a musambodi, palala kumubonda mu ncila, ximbi ambeci uxekucwala kudi musambodi yi musambodi unakulongola kudi disalai, yi disalai dinakwela mu ncibo a lukanu.

⁵⁹ Nkwatôyela ene, kunabatuka momu pô binakala wamafuta mpalata mioso nya.