LOMA 4 - Disambi Dipyadipya

¹ MBWÔSO tunatôya beci ku bwalo bwa Abalami, tetecu a ku munyu ? Yei akasafiana beci ?

² Ndo Abalami akasuwixibwa ku makisa, udi yi mwanu ă kwana ; kate ku mpala a Ncembi kumoni.

³ Bwalo bwatôya mukanda ă Ncembi beci ? Ene, Yi Abalami akakwetabuxila Ncembi ; yi kwakamubadidibwa ku nkwami.

⁴ Mo ku bwalo bwa muntu akisa mudimo, difuto kadisobadibwa bea ku lwoxixi, kate bea ku mbata.

⁵ Kaninga you utasosala, mo amakwetabuxila you asuwisa bantu batena yi mwosambu ă Ncembi, kwetabusa kwanci kwamamubadidibwa ku nkwami.

⁶ Bea biatôya Dafidi kabidi dia kulwangwasanibwa kwa muntu you amamubadila Ncembi nkwami kutena makisa,

⁷ ene, Balwangwasanibwi bobo bamalekyelebwa mona abo yi badi yi mabi abo amancibikibwa ;

⁸ mulwangwasanibwi ndo muntu you utasomubadila Fumu bubi nyô.

⁹ Kulwangwasanibwa koku kulolwa lolo kudi bantu bamakwelebwa bwadi batupu, sungu kudi bena mientonto kabidi ? Bwalo butwatôya ene, Kwetabusa kwakabadidibwa Abalami ku nkwami.

¹⁰ Kwakabadibwa lolo beci ? Pakadi amakwelebwa bwadi, sungu pakadi ukidi muna mwontonto ? Kumoni mwelebu bwadi, kate muna mwontonto.

¹¹ Yi akangata kimonenu kia bwadi kwelebwa, bea kilembetelu kia nkwami ya kwetabusa yakadiyi yinaku pakadi ukidi muna mwontonto ; bixeakalayi tete a bantu boso bamakwetabusa, isanga badi bena mientonto ; bixebabadidibwa nkwami yei.

¹² Bixeakalayi lolo tete a bena bwadi kudi bantu bamakwelebwa bwadi, batasokwelebwa kanana, kate bendenda kabidi mu bipokye bia kwetabusa koku kwa tetecu Abalami kwakadiyi yinaku, pakadi ukidi muna mwontonto.

¹³ Kakwakadi ku bwalo bwa bwadi bwa Mosese kwakalwa kilaka kudi Abalami ndo kudi mwananci, ene, uxekita loboko mwokito ; kate ku bwalo bwa nkwami ya kwetabusa.

¹⁴ Ndo bobo bakala bena bwadi badi bena mwokito, kwetabusa kwamalengolebwa, yi kilaka kiamatekyebwa kanana.

¹⁵ Bwadi ndo bwamalelesa bisusu ; mo kutasoakala bwadi kakuna kabidi kuxipa kwa bwadi.

¹⁶ Mbwôso bwalo budi bwa kwetabusa bixeakalabu bwa lwoxixi ; bixeakala kilaka ko ku bwalo bwa bungi bwa bana ; kumoni kudi bantu ba bwadi bwa Mosese batupu, kate kudi bantu kabidi badi bena kwetabusa kwa Abalami. Yei udi tetecu a bungi bwecu,

¹⁷ bea biakafundibwa ene, Namakuteka tete a mabila mangi. Udi noku ku meso a Ncembi akakwetabusayi, upapa bafu môyo, yi atamba bintu bikidi kabinako bea ndo bidiko.

¹⁸ Isanga akadi kutena mudingidilu akakwetabusa yi mudingidilu, bixeakalayi tete a mabila mangi, bea biakafundibwa ene, Bana bebe banakala bungi noku.

¹⁹ Kutena kupwangwa yi kwetabusa, yei akakwela mumbidi ănci lukanyi ăkadi luna mufu, (bwalo bwakadiyi yi mbula yenci nkama muncimancima), yi bokuta bwa Sala.

²⁰ Akadi kasoxitaxita bwalo bwa kilaka kia Ncembi ku mucwe ă kusaka yi kwetabusa kumoni ; kate akasubixibwa ku kwetabusa, yi akatumbisa Ncembi ;

²¹ bwalo bwakakwetabusayi dyendeli ene, kilaka kioso kiamaxiyayi, yei ubili kukifikisa.

²² Mbwôso kabidi kwakamubadidibwa ku nkwami.

²³ Kaninga diyi dedi kadiafundibwa ku bwalo bwanci kutupu, ene, kwakamubadidibwa noku ;

²⁴ kate ku bwalo bwecu kabidi banabadidibwaku ku nkwami bamakwetabuxila you akabisa Yisu Fumwecu kudi bafu,

²⁵ akalongolebwa ku bwalo bwa mona ecu atwamakwona, yi akabixibwa ku bwalo bwa kusuwixibwa kwecu.