LOMA 16 - Disambi Dipyadipya

¹ MEME nwebesa Fibi ku mukanda ou, ngasanecu, udi musadisañani a kikokye kidi ku Kyenkyelea ;

² binuxemwangata mu Fumu yi mwangacilu ălelekyela yi bena babala, yi binuxemukwacisa ku bwalo bwoso bunanudilayi. Bwaio bwapwakalayi munami mikyenci kabidi a bantu bangi yi amene mikyemi.

³ Nubisi Pilisikila yi Akwila, bakisañani yinami mu Kalistu Yisu,

⁴ bakaladika xingu abo ku bwalo bwa môyo ămene ; bangwaxinga biloba mo kumoni meme mutupu kate bungi bwa bikokye bia mabila kabidi ;

⁵ yi nubisi kikokye kidi mu ncibo abo. Nubisi Epaineto munangibwi amene, udi somo a Asia ku bwalo bwa Kalistu.

⁶ Nubisi Maii akanukambila mudimo mungi.

⁷ Nubisi Andoniko yi Yunia, bilungu biamene, bakadi yinami misungi, badi bena nkumbu pakacikaci pa batumibwi, yi bakadi mu Kalistu buxi bwamene.

⁸ Nubisi Ampiliato, munangibwi amene mu Fumu.

⁹ Nubisi Ulubanu, mukisañani yinecu mu Kalistu, yi Staki, munangibwi amene.

¹⁰ Nubisi Apele amakwalakanibwa mu Kalistu. Nubisi bena Alistobulo.

¹¹ Nubisi Elodiono, kilungu kiamene. Nubisi bena Nakiso badi mu Fumu.

¹² Nubisi Tilifaina yi Tilifosa bencenca mudimo mu Fumu. Nubisi Pesisi, munangibwi, amakwenca mudimo mungi mu Fumu.

¹³ Nubisi Lufo, musungula mu Fumu, yi mamanci yi amene.

¹⁴ Nubisi Asankilito yi Felengono yi Eleme yi Pataloba yi Elema, yi bakunyi badi yinabo.

¹⁵ Nubisi Filolongo yi Yulia yi Neleo yi ngasananci, yi Olimpa yi bungi bwa bena babala badi yinabo.

¹⁶ Nubisañani yi kunyita kwa babala. Bungi bwa bikokye bia Kalistu binwabisa.

¹⁷ Kaninga meme nwabondabonda bakunyi, ene, nuxiximi bantu bateka bixe bixe yi biponexelu, kutena kwedeya kweyesa koku kunwamakweya nonu ; yi nukulumuki kudibo.

¹⁸ Bwalo butasosadilabo Fumwecu Kalistu kudi bena noku, kate difu diabo mikyeabo ; yi ku meyi abo a buxelu yi ku soso yasosolabo ndo kwadimbabo micima ya bena ngiya.

¹⁹ Bwalo bwamacakana mwoximo ă diedya dienu kudi bantu boso. Mbwôso meme nwaxekyelela, mo ngwakyeba nonu kwakala yi bwinu mu bwalo budi bunengela, yi kutena kulubukwa bwalo budi bubi.

²⁰ Mo Ncembi a polo unaminya Satana muxi mwa makasa enu mo nkyekyu. Lwoxixi lwa Fumwecu Yisu Kalistu lwakali yinenu.

²¹ Timoteo akisañana yinami, yi Lukio yi Yasono, yi Sosipatelo, badi bilungu biamene, banwabisa.

²² Meme Teletio, amafunda mukanda ou, nwabisa mu Fumu.

^23-24 Ngayo, you ungwangata meme yi bungi bwa kikokye mu ncibo anci, unwabisa. Elasto munami a bula unwabisa yi munga mwakunyi Kwato.

²⁵ Kudiyi lolo ubili kunusubisa luna bialelekyela yi losangu lwamene lunengela yi diembi dia Yisu Kalistu ; bea bialefekyela yi kiebexelu kia bwalo busokoka bwakabucikibwa ku mieciya ya kalikali kô kô,

²⁶ mo bwamakwebexebwa nkyekyu, bwalo bobu bwamasakolebwa kudi mabila moso ku mikanda ya badimuxi, bwalo bwa kwedeya kwa kwetabusa, luna bidi mulangu ă Ncembi a kô kô,—

²⁷ kudi Ncembi umoumwe a bwinu kwakali dikai kudi Yisu Kalistu mieciya mioso. Amen.