LOMA 14 - Disambi Dipyadipya

¹ KU bwalo bwa muntu udi yi kwetabusa kulebela, numwangati, mo kumoni kumusambolesa malo amakwelexebwa mbata.

² Muntu umoumwe amakwetabusa dia kudya bintu bioso ; mo you udi kulebela udedya bidibwa bitena munyenye.

³ You udedya katamuni you utasodya, yi you utasodya kabedi you udedya ; bwalo bwamamwangata Ncembi.

⁴ Owe udi ñani abela musadi a munga muntu ? Ndo amakwemana ndo amapona, kudi bwalo bwa Fumwanci. Yi unakwemanikibwa, bwalo bubili Fumu kumwemanika.

⁵ Muntu umoumwe encenca ene, dituku dimodimwe diamaxiyañana yi dinga ; munga encenca ene, dituku dioso dilexi. Muntu mwoso a-etabuxixibwi dyendeli mu lukanyi Iwanci mikyenci.

⁶ You anama dituku dioso amadinama ku bwalo bwa Fumu ; yi you udedya udedya ku bwalo bwa Fumu, bwalo bwamaxingayi Ncembi biloba ; yi you utasodya kasodya ku bwalo bwa Fumu, yi amaxinga Ncembi biloba.

⁷ Bwalo butasoakala muntu umoumwe yinecu yi môyo ku bwalo bwanci mikyenci, kumoni muntu mwoso ufofwa ku bwalo bwanci mikyenci.

⁸ Ndo tuxeakala yi môyo, twamakala yi môyo ku bwalo bwa Fumu ; yi ndo tuxefwa, twamafwa ku bwalo bwa Fumu. Mbwôso ndo tuxeakala yi môyo, sungu ndo tuxefwa, tudi bantu ba Fumu.

⁹ Ku mucwe ou kwakafwa Kalistu yi akabika yi môyo, bixeakalayi Fumu a bafu yi a bena môyo.

¹⁰ Mo owe kukai wabela muna kwebe ? Ndo owe munga, kukai watamuna muna kwebe ? Bwalo butunakwemana bungi bwecu ku kisambolelu kia Ncembi.

¹¹ Bwalo bwakafundibwa ene, Fumu ndo atôya ene, Bea bingwakala yi môyo binakonyama kinu kioso ku mpala amene, yi ludimi lwoso lunasakola kudi Ncembi.

¹² Mbwôso tunasakola muntu bwalo bwanci muntu bwalo bwanci kudi Ncembi.

¹³ Mbwôso katubelañani kabidi nyô, kate nutungi kusambola noku ene, muntu mwoso kateki kipuminu kia diya ndo kiponexelu mu ncila a muna kwanci.

¹⁴ Ngwalubukwa yi namakwetabuxixibwa mu Fumu Yisu, ene, kakuna kidibwa kioso kidi lobindu mikyekio ; mo kudi muntu amabala dia kintu kioso, ene, kidi lobindu, kudiyi ndo kudikio lobindu.

¹⁵ Bwalo ku mucwe ă bidya, ndo muna kwebe amatekyebwa yi buxitu, owe kusokwenda mu nyinga nyô. Kumuxipixi yi munyenye ebe, you akafwila Kalistu.

¹⁶ Bwalo bwenu bunengela kabutangolebwi ;

¹⁷ bwalo butasoakala bufumu bwa Ncembi kudya yi kunwa ; kate nkwami, yi polo, yi kiango mu Mwoxixi a babala.

¹⁸ You asadila Kalistu mu bwalo bobu, udi yi nonu ku mpala a Ncembi, yi udi yi mwalakanu kudi bantu.

¹⁹ Mbwôso tulandi bintu bia polo, yi bintu bia kwabakanana yinabio muntu muna kwanci muntu muna kwanci.

²⁰ Kanwoni mudimo ă Ncembi ku mucwe ă munyenye. Bintu bioso bidi susu sôsôlwo ; kate bubi budi yi muntu you amateka kipuminu kia diya pa kudya.

²¹ Kudi loko kumoni kudya munyenye, kumoni kunwa malufu, kumoni kwenca kintu kioso pako, kiamapuma muna kwebe diya kudikio, ndo amaponexebwa kudikio, ndo amalebexebwa kudikio.

²² Owe udi yi kwetabusa ? Ikala yinaku owe mikyebe ku mpala a Ncembi. Kiango kidi yinanci utasodibela mikyenci ku kintu kiamakwetabuxilayi.

²³ Mo you axitaxita, akali yei udedya, amabelebwa, bwalo butasokwencayi ku kwetabusa ; yi bwalo bwoso butena bwa kwetabusa budi kwona.