LOMA 13 - Disambi Dipyadipya

¹ MUNTU mwoso adipwesi ku mpala a mamanya adi kulu kwanci. Bwalo butenako bumanya bwoso butasopebwa kudi Ncembi ; yi mamanya aa adi paxi amalungikibwa kudi Ncembi.

² Mbwôso you atombokyela mamanya amatanda yi mulungikilu ă Ncembi ; yi bobo batanda banadiangacila lopelo.

³ Bwalo butasoakala basambodi bowa ku bwalo bunengela, kate ku bwalo bubi. Owe wakyeba lolo kumoni kucina bumanya ? Enca kunengela yi unakala yi mwalakanu kudibu ;

⁴ bwalo budibu musadi a Ncembi ku bwalo bwebe ndo kukwencela kunengela. Mo ndo owe wencenca bwalo bubi, cina ; bwalo butasocwalabu mwele kanana ; bwalo budibu musadi a Ncembi, musombodi a kuponesa bisusu kulu kwa you akisa bubi.

⁵ Mbwôso tudi yi dibambu dia kudipwesa kumoni ku bwalo bwa bisusu bitupu, kate ku bwalo bwa kilubukilu kia munda kabidi.

⁶ Ku mucwe ou ndo kunwalambula milambu kabidi ; bwalo budibo milopwe ya Ncembi badi mu kwekyela ekyela yi bwalo bobu.

⁷ Nufuti bantu boso bintu bixefucibwabo ; mulambu kudi fumu a mulambu ; sayi kudi muna sayi ; bowa kudi muna bowa ; kinemu kudi muna kinemu.

⁸ Kanwakadi yi muntu mwoso mbata utena kunangañana ; bwalo bwamalelekyela yi bwadi you ananga muna kwanci.

⁹ Milangu yei noku ene, Kunakwendela mukaxi abene, kunaxipa, kunakweba, kunakyeba, yi munga mulangu mwoso ndo udiko, ămafukudibwa mu diyi dedi ene, Unananga muna kwebe bea mikyebe.

¹⁰ Nyinga kayisokwencela muna kwanci bubi ; mbwôso nyinga idi kulelekyela yi bwadi.

¹¹ Ngwatôya noku, bwalo bunwalubukwa kikondo kieki, bwalo bwamafika ola nkyekyu coco kubika mu tulu ; bwalo bwamakokyela kupandixibwa kwecu pepe pôi kikondo kitwakakwetabusa.

¹² Butuku butani pepe yi kukya, yi munyinya ămakokyela pepe ; mbwôso tuncuii makisa a mwedima luna kilamba, tulati lolo micwala ya bipiko bia obo.

¹³ Twendi yi mwosambu unengela bea ku munyinya ; kumoni yi masa yi nkolwa ya malufu, kumoni yi xindilu mibi yi budibi, kumoni yi bitumba yi mwokunyo.

¹⁴ Kate nulati Fumu Yisu Kalistu, yi kanwedi munyu ěnu lukanyi bwalo bwa nyinga yau kuyidisa.