LOMA 1 - Disambi Dipyadipya

¹ PAULU, musadi a Yisu Kalistu, amabikidibwa mutumibwi, amabalolebwa bwalo bwa losangu lunengela lwa Ncembi,

² (lwakaxiyilayi kilaka kalikali kudi badimuxi banci mu mikanda ya babala).

³ Losangu ludi bwalo bwa Mwananci, mulu kudi bana ba Dafidi ku bwalo bwa munyu,

⁴ yi amakwebexebwa udi Mwana a Ncembi yi ngulu, bwalo bwa Mwoxixi you udi a babala, ku kubisa kwa bafu ; isanga Yisu Kalistu Fumwecu.

⁵ Kudiyi ndo kutwamangata lwoxixi yi butumibwi bobu ku mucwe ă dina dienci, bwalo bwa diedya dia kwetabusa, mu mabila moso.

⁶ Pakacikaci pabo ndo panudi kabidi bantu bamabikidibwa kudi Yisu Kalistu.

⁷ Kudi bantu boso badi ku Loma, banangibwi ba Ncembi, bamabikidibwa bena babala ; lwoxixi Iwakali yinenu yi polo kudi Ncembi Tetecu yi kudi Fumu Yisu Kalistu.

⁸ Ku buxi, ngwaxinga Ncembi amene biloba kudi Yisu Kalistu ku micwe yenu bungi bwenu, bwalo bwamasakolebwa kwetabusa kwenu ku loboko luncimancima.

⁹ Bwalo budi Ncembi mutôbôdi amene, umwa sadila mudimo ănci ku kidimu kiamene mu losangu lunengela lwa Mwananci, a kutôbôla bingwatamba bwalo bwenu kangala kangala matuku moso ku ndombu yamene,

¹⁰ ndi mu kulomba lomba ndo ambeci nkyekyu nxekwendexebwa bimpe ku nyinga ya Ncembi ndo kulwa kunudi.

¹¹ Bwalo bungwakyeba kungi kunumona, binxenulongola dinga dilongi dia Mwoxixi ndo kunusubisa ;

¹² nako kubondañana yinenu kwenu, you yi kwetabusa kwa muna kwana, you yi kwetabusa kwa muna kwanci, yi kwenu yi kwamene.

¹³ Mo kisoli nonu kwakala kutena kulubukwa, bakunyi, munakadi matuku mangi ene, ndu kunudi (yi namaximbibwa pôi nkyekyu), binxeakala yi mamoma kwenu pako, bea mu manga mabila kabidi.

¹⁴ Ndi muna mbata yi kudi bena Ngiliki yi kudi Basenci ; yi kudi bantu yi bwinu yi kudi bantu batena yi bwinu.

¹⁵ Mbwôso, ku lwedi fwamene ndo kuntanalanda kunwambila losangu lunengela kabidi badi ku Loma.

¹⁶ Bwalo buntasokwombwela losa ngu lunengela bundu ; bwalo budilu ngulu ya Ncembi ku kupandixibwa kwa môyo kwa muntu mwoso a-etabusa ; kwa muna Yuda buxi, mo kwa muna Ngiliki kabidi.

¹⁷ Bwalo bwamakwebexebwa nkwami ya Ncembi momu, ku kwetabusa, kwoso kudi kwetabusa ; bea biakafundibwa ene, Kaninga muna nkwami unakala yi môyo ku kwetabusa.

¹⁸ Bwalo bwamakwebexebwa bisusu bia Ncembi pôi diulu bwalo bwa mwosambu mwoso ă bantu utena ă Ncembi, yi kwona kwoso kwa bantu babamba sôsôlwo yi kwona kwabo ndongo.

¹⁹ Bwalo bwa kilubukilu kioso kialubukwa bantu kia Ncembi kiamakwebexebwa munda mwabo ; bwalo bwamabebesakio Ncembi.

²⁰ Pôi kipangilu kia loboko, pamaxinguludibwa bintu bienci bitasomonebwa, bwalo bwamalembetelebwabio ku bintu bebi biamapangibwa ; ngulu yenci ya kô kô yi butonga bwanci bwa Ncembi ; mbwôso bantu kabena bena bisuwa pô.

²¹ Bwalo kabidi butamutumbisabo bea Ncembi, pakadi bamalubukwa Ncembi, yi bakadi kabasomuxinga biloba ; kate bakaungaunga kanana mu nkanyi yabo yakamwelelabo, yi mucima ăbo utena yi lukanyi ăkapindixibwa ku mwedima fu.

²² Bakaditôyela ene, badi bena bwinu, kate bakatulowa badibi,

²³ yi bakasumbanya dikai dia Ncembi utena yi musalu, ku mucwe ă kifwanisa kiafwana muntu udi muna musalu, yi kifwanisa kia nyonyi, yi kia nyama ya mikolo inai, yi kia bintu bialamba lamba paxi.

²⁴ Mbwôso Ncembi akabalongola ku malo a mbindu, akalelekyela yi xindilu ya micima yabo, ndo kukyesolañana ku mimbidi yabo ;

²⁵ bwalo bwakasumbanyabo sôsôlwo a Ncembi ku mucwe ă ncimi ; yi bakadika kunemeka yi kusadila kipangu kiakapangibwa, kumoni Mupangi, uxetumbixibwa mieciya mioso. Amen.

²⁶ Ku mucwe ou kwakabalongola Ncembi ku xindilu ya bundu. Isanga babakaxi babo bakasumbanya mwosambu ă bwabukaxi ku mucwe ă munga mwosambu utena ă bwabukaxi ;

²⁷ yi mo nako babalumi kabidi bakaxiya mwosambu ăbo yi mwamukaxi, yi bakalandañana mikyeabo ku bwefi ; yi babalumi bakakwenca yi babalumi bundu, yi bakadiangacila munda mwabo sayi ya kwona kwabo yakalelekyela yi mwosambu ou.

²⁸ Yi bea bitamonabo loko kwakala yi Ncembi mu kilubukilu kiabo, ndo biakabalongola Ncembi ku lukanyi lusaluki lwa kwenca malo atasolelekyela.

²⁹ Bakakwolubixibwa yi bwalo bwoso butena yi nkwami, yi bubi, yi bwefi, yi mwoxingi. Bakakwolubila yi mwokunyo, yi kwonda, yi bitumba, yi ncimi, yi bonkomba. Bakadi bena mieñonuñonu,

³⁰ batendañani ba bantu, bena yangonye ku meso a Ncembi, bena ntamu, bena disasa, bena mwanu, bapangi ba bipangu bibi, badiudi ba bateteabo yi bamamabo,

³¹ batena yi lukanyi, batena yi kibaku kia malo, batena yi nyinga mioso ya bantu, batena yi mwengo.

³² Baba noku, isanga balubukwa mulangu ă Ncembi, ene, bobo bencenca malo aa bamalelekyela yi lufu, kabasoxikila yi kwenca kwa noku, kate baxekyelelañana kabidi yi banga bantu bencenca noku.