KOLOSAI 4 - Disambi Dipyadipya

¹ BAFUMU ba bena midimo, nufuti basadi benu difuto didi yi nkwami, diamalelekyela bileli, bwalo bunwalubukwa ene, nonu kabidi nudi yi Fumu mu diulu.

² Nuxini mwoxinu ă ndombu kulomba, nudingili mu bwalo bobu yi biloba ;

³ nutulombeli lolo coco kabidi, bixetudipudila Ncembi mbelo a diyi, a kutôya bwalo busokoka bwa Kalistu, bundi meme kabidi ku lukanu ku mucwe ăbu ;

⁴ binxebwebesa bea binxetôya.

⁵ Nwendi yi bwinu ku bwalo bwa bantu badi kunci, nudi mu kwololola bipoma.

⁶ Kutôya kwenu kwakali yi lwoxixi matuku moso, kwamacudibwa yi mukyeli, binuxelubukwa kupingaxila muntu mwoso diyi.

⁷ Tikiko unanulubukisa malo amene moso, udi mwakunyi munangibwi, yi musadi a kibaku, yi musadisañani yinami mu Fumu ;

⁸ unaputuma kunudi ku mucwe ou binuxelubukwa mwakadilu ecu, yi bixebondabondayi micima yenu ;

⁹ yi Onesimo ndongo, mwakunyi a kibaku munangibwi, udi muna kwenu. Bananulubukisa bintu bioso bidi kunu.

¹⁰ Alistako, udi yinami musungi, unwabisa, yi Maku, Banabasa mwakunyenci, unwakangata milangu ku bwalo bwanci ; akali yei ulolwa kunudi, numwangati.

¹¹ Yi Yisu you amabikidibwa ene, Yustusu ; baba badi bena bwadi ; baba batupu ndo basadisanani yinami ku bwalo bwa bufumu bwa Ncembi bapwakala kibondelu kiamene kia kungubondabonda.

¹² Epafalasa, udi muna kwenu, musadi a Kalistu Yisu, unwabisa. Yei udi mu kunutandila mu ndombu yenci matuku moso, binuxekwemana babakulu, nwamalubukixibwa nyinga mincimancima ya Ncembi yamakyebayi.

¹³ Bwalo bumwatôbôlela ntôbô ene, udi yi nkambi mingi ku micwe yenu, yi ku micwe ya bena Laodikia, yi ya bena Yelapoli.

¹⁴ Luka ñangabuka munangibwi, yi Demasa, banwabisa.

¹⁵ Nubisi bakunyi badi ku Laodikia, yi Numpa, yi kikokye kidi mu ncibo abo.

¹⁶ Yi panakala mukanda ou ămabadibwa kwenu, nubabadisi badi mu kikokye kia bena Laodikia kabidi ; yi nonu kabidi nubali mukanda ulolwa ku Laodikia.

¹⁷ Nutôyeli Akipo ene, Nama busadi bwapwangata mu Fumu, ubukukisi dyendeli.

¹⁸ Kwela kwa môyo kudi ndo kwamene, meme Paulu, ku kianca kiamene mikyemi. Nweli nkanu yamene nkanyi. Lwoxixi lwakali yinenu.