KOLOSAI 2 - Disambi Dipyadipya

¹ BWALO bungwakyeba nuxelubukwa munwatandila mbita mingi, yi ku micwe ya bena Laodikia, yi ku micwe ya bantu boso batamonene mpala amene mu munyu ;

² bixekolexebwa micima yabo, bamasambikibwa mu nyinga, yi ku bodidi bwoso bwa kilayisu kia lukanyi, bixelubukwabo bwalo bwa Ncembi bwa bwisa dyendeli, budi Kalistu,

³ amasokokyebwa bima bioso bia bwinu yi bia kilubukilu munda mwanci.

⁴ Ngwatôya noku bitaxenudimba muntu mwoso yi buxelu bwa meyi.

⁵ Bwalo isanga ndi kunga ku munyu, kaninga ndi yinenu ku mucima, ndi mu kuxekyelela yi mu kumona kiekyelo kienu kia diedya, yi mwoxinu ă kwetabusa kwenu mu Kalistu.

⁶ Mbwôso luna binwakangata Kalistu Yisu Fumu, nwendi mo nako munda mwanci,

⁷ nwamancikibwa dicina, nudi mu kwabakibwa kulu munda mwanci, nwamasubixibwa ku kwetabusa bea binwakakweyexebwa, nudi mu kulekola momu yi kuxinga kwa biloba.

⁸ Nudimuki, ximbi muntu uxeakala udiko utananusanca ku bwinu bwa paxi yi ku lodimbu lwa kanana, ku muxiyilu ă bantu, ku bikoma bia loboko, yi kumoni luna mu Kalistu.

⁹ Bwalo bwamaxikama Kiolubilu kincimancima kia buNcembi munda mwanci mu mumbidi ;

¹⁰ yi nonu nwamakwolubixibwa munda mwanci, udi Mucwe ă bukalanga bwoso yi ă bumanya bwoso ;

¹¹ unwakakwelebwa bwadi munda mwanci yi bwadi butasokwelebwa ku makaci, ku kuncudibwa kwa mumbidi ă munyu, ku bwadi bwakakwelebwa Kalistu.

¹² Nwakancikibwa yinanci pa kunumeyebwa, kunwakabixibwa yinanci kabidi bwalo bwa kwetabusa kwa mukixilu ă Ncembi akamubisa kudi bafu.

¹³ Yi nonu, bakadi bafu ku mona enu anwakakwona yi ku mwontonto ă munyu ěnu,—nonu pako ndo bakatekayi yi môyo yinanci ndongo, yi amatulekyela mona ecu moso ;

¹⁴ akalengola mukanda ă milangu ăkadi ku mpala ecu, ăkatanda yinecu ; yi amauxakwala mu ncila pa kuukwaka ku nkulusu ;

¹⁵ akancula makalanga yi mamanya yi akabebesa ku mpala ya bantu, udi mu kubadika bumanya koku noku.

¹⁶ Mbwôso muntu kanubedi lopelo bwalo bwa bidya, ndo bwa kunwa, ndo bwa dituku dia kitula, ndo bwa ngondo kubala, ndo bwa dituku dia sabado ;

¹⁷ bebi bintu bidi mudingidingi ă bintu bilolwa ; mo mumbidi udi ă Kalistu.

¹⁸ Muntu kanwebi sayi yenu ku kudipwesa kwa kanana, yi ku kuxingila kwa bangele, udi mu kudinana bwalo bwa bintu biamamonayi, amakwolubixibwa disasa ku lukanyi lwanci lwa munyu ;

¹⁹ yi kasobamba Mucwe nda, utanalunda mumbidi muncimancima kudiu yi kulunda kwa Ncembi, bwalo bwamapebwau ngulu, yi bwalo bwamasambikibwau ku manyungu yi ku misisa.

²⁰ Ndo nwakafwa yi Kalistu bwalo bwa bikoma bia loboko, kukai nudiapwesa mikyenu (luna ndo kwakala yi môyo ku loboko) ku mixiyilu yakaxiyabo ?

²¹ Luna kutôya, ene, Kanukwaci ku makaci, kanukikixi, kanubaki bianca ;

²² (idi yi bwalo bwa kuncimina bungi bwayo pa kwencebwa) ; bea biatoya milangu ya bantu yi bikoma biabo.

²³ Bintu bebi biapwakala luna bwinu ku meso sôsôlwo, bwalo bwa kixingilu kia nyinga ya muntu mikyenci, yi bwa diedya, yi bwa bukitu bwalo bwa mumbidi ; kate kabisolelekyela pô ndo kukanda ndôi a munyu.