KIEBEXELU 20 - Disambi Dipyadipya

¹ YI nakamona mwangele udi mu kupweka mu diulu, udi yi lufungula lwa dina twakô, yi lukanu lunene mu kianca kienci.

² Yi akakwata Cici, Nyoka a kalikali, udi Diabolo yi Satana, yi akamusuka lokone lwa mbula tô,

³ yi akamwela mu dina twakô, yi akadincibika ; yi akadibaka kilembetelu, bitaxedimbayi mabila kabidi pôi kikondo kixemanibwa lokone lwa mbula tô ; kunyuma lolo uxepaudibwa kakondo kabende.

⁴ Yi nakamona nkwasa ; yi bantu bakaxikama kulu kwayo, yi bakapebwa ndo kusambola bantu. Yi nakamona bidimu bia bantu bakaxakibwa micwe yabo bwalo bwa ntôbô ya Yisu, yi bwalo bwa diyi dia Ncembi ; yi bidimu bia bantu bataxingidili Nyama ndo kifwanisa kienci, yi batangacili kilembetelu kienci ku mpala yabo yi ku kianca kiabo ; yi bakakala yi môyo yi bakadi yi bufumu yi Kalistu ndongo lokone lwa mbula tô.

⁵ Banga bafu lolo bakasala bakadi kabasoakala yi môyo pôi kikondo kixemanibwa lokone lwa mbula. Kunu kudi kubixibwa kwa buxi kwa bafu

⁶ Mulwangwasanibwi, yi muna babala, ndo you udi ; yi dikapa mu kubixibwa kwa buxi. Lufu lwamubidi kalusoakala yi bumanya kulu kwabo, kate banakala makanda a Ncembi yi a Kalistu, yi banakala yi bufumu yinanci ndongo lokone lwa mbula tô.

⁷ Yi panakala lokone lwa mbula lwamakukixibwa, Satana unapaudibwa ku ncibo anci a lukanu,

⁸ yi unabatuka kuya dimba mabila adi ku macu anai a loboko, Ngongo yi Mangongo, yi kubasangisa ku mbita ; lubadi lwabo ludi bea yimbwi ya mai manene.

⁹ Yi bakaximuna ku bunene bwa loboko, yi bakadinga kingandu kia bena babala, yi bula bunangibwi ; yi mudilu ăkapweka mu diulu yi ăkabancimisa.

¹⁰ Yi diabolo diakabadimba diakakwelebwa mu kiteleñ ena kia mudilu yi kia sulufa, mutani Nyama yi mudimuxi a mancanga kabidi ; yi banatatixibwa kusama ku munyinya yi ku butuku ku mieciya ya mieciya.

¹¹ Yi nakamona lukwasa lunene lwa susu, yi You akaxikama kulu kwalu, akacina loboko yi diulu ku mpala anci, yi kidi kakiasananibwa ku bwalo bwabio.

¹² Yi nakamona bafu, yi banene yi babende, badi mu kwemana ku buxi bwa lukwasa ; yi mikanda yakadipudibwa ; yi munga mukanda ăkadipudibwa, udi ou ă moyo. Yi bafu bakasambolebwa mu bintu biakafundibwa mu mikanda bea biamalelekyela yi makisa abo.

¹³ Yi mai manene akalongola bafu bakadi momu ; yi lufu yi Adese biakalongola bafu bakadi momu ; yi bakasambolebwa muntu bea makisa anci, muntu bea makisa anci.

¹⁴ Yi lufu yi Adese biakakwelebwa mu kitelenena kia mudilu. Nako kudi lufu lwamubidi, kitelenena kia mudilu.

¹⁵ Yi ndo muntu mwoso akadi kasosananibwa yi dina difunda mu mukanda ă moyo, akakwelebwa mu kitelenena kia mudilu.