KIEBEXELU 19 - Disambi Dipyadipya

¹ KUNYUMA kwa bintu bebi, nakakwombwa luna diyi dikola dia kimbukuma kinene kia mu diulu ene, Aleluya ; kipandilu, yi dikai, yi ngulu, bidi bwalo bwa Ncembi ecu ;

² bwalo budi sambo yenci sôsôlwo yi nkwami yasambolayi ; bwalo bwamasambolayi mudibi munene akasalula loboko yi budibi bwanci, yi amamusambolesa maxi a basadi banci.

³ Yi bakatôya kabidi ene, Aleluya. Yi munyinga ănci ăkaximuna ku mieciya ya mieciya.

⁴ Yi babakulu masangi abidi yi banai yi bipangu binai bia môyo bakapona paxi yi bakaxingila Ncembi amaxikama ku lukwasa, ene, Amen, Aleluya.

⁵ Yi diyi diakabatuka mu lukwasa ene, Nutumbisi Ncembi ecu, nonu basadi banci boso, nonu numwacina, yi babende yi banene.

⁶ Yi nakakwombwa luna diyi dia kimbukuma kinene, yi luna diyi dia mai mangi, yi luna diyi dia makongola manene, ene, Aleluya, bwalo bwamadya Fumu Ncembi ecu bufumu, Ncembi Xadai.

⁷ Tuxekyeleli, twakali yi kiango, tumutumbisi ; bwalo bwamalwa dibakwa dia Mwana a mukwakwa, yi mukasanci amadilungika.

⁸ Yi kwakamupebwa ndo kulatixibwa mbuxa a susu a bwinu, a obo yi a babala, bwalo budi mbuxa a susu a bwinu makisa a nkwami a bena babala.

⁹ Yi akangwambila ene, Funda ene, Balwangwasanibwi ndo baba bamaswadibwa ku kitula kia dibakwa kia Mwana a mukwakwa. Yi akangwambila ene, Aa ndo meyi a sôsôlwo a Ncembi.

¹⁰ Yi nakapona paxi ku makasa anci ndo kumuxingila. Yi yei akangwambila ene, Kwenci noku. Meme ndi musadi amasalañana yinebe mudimo, yi bena kwebe badi yi ntôbô ya Yisu. Xingila Ncembi. Bwalo budi ntôbô ya Yisu ku dicina dia kidimuxilu.

¹¹ Yi nakamona diulu diamadipudibwa, yi mona, kabala ka susu, yi you akaxikama kulu kwako akabikidibwa ene, Kibaku, yi Sôsôlwo ; yi amasambola sambo yi amatanda mbita yi nkwami.

¹² Meso anci alexi yi mwanga ă mudilu, yi kulu kwa mucwe ănci kutani bilongo bingi, yi udi yi dina difunda ditasolubukwa muntu mwoso utena yei mikyenci.

¹³ Yi akalatixibwa kilamba kiamanumeyebwa mu maxi, yi dina dienci diamabikidibwa ene, Diyi dia Ncembi.

¹⁴ Yi masalai adi mu diulu akamulandudila kulu kwa tubala twa susu, bamalatixibwa mbuxa a susu a bwinu, obo yi babala.

¹⁵ Mu musuku ănci mwakabatuka mwele ă kucwa, bixekumayi mabila yinau ; yi unabumba yi kita kia kidimadima ; yi amanyata kinyacilu kia finyo kia bukitu bwa bisusu bia Ncembi Xadai.

¹⁶ Yi ku kilamba kienci yi ku kidimba kienci kudiyi yi dina difunda ene, FUMU A BAIFUMU YI YANGABITA A BAYANGABITA.

¹⁷ Yi nakamona mwangele udi mu kwemana mu diba ; yi akakwamena diyi dikola, akakwambila nyonyi mioso yamapumbuka pakacikaci pa diulu ene, Nulwi, nusangili ku kidilu kinene kia butuku kia Ncembi,

¹⁸ binuxedya nyama a bafumu, yi nyama a biliaka, yi nyama a bena ngulu, yi nyama a tubala, yi a bantu bamaxikama kulu kwatu, yi nyama a bantu boso, ndo bena bula ndo bapika, ndo babende ndo banene.

¹⁹ Yi nakamona Nyama, yi bafumu ba loboko, yi masalai abo, bamasangila ndo kutanda yi you amaxikama kulu kwa kabala, yi masalai anci.

²⁰ Yi Nyama akakwacibwa, yi mudimuxi a mancanga yinanci, akakwenca bilembetelu ku mpala anci, biakadimbayi yinabio bantu bakangata kilembetelu kia Nyama, yi bobo bakaxingila kifwanisa kienci. Bubidi bwabo bakakwelebwa yi môyo mu kiteleñena kia mudilu kiamalumuka yi sulufa.

²¹ Yi banga bakasala bakaxipibwa yi mwele ă you amaxikama kulu kwa kabala, ămabatuka mu musuku ănci ; yi nyonyi mioso yakakwolubila yi nyama abo.