KIEBEXELU 17 - Disambi Dipyadipya

¹ YI munga a bangele sambwali bakadi yi mpamba sambwali akalwa, yi akatôya yinami yi akangwambila ene, Lwaka kunu, yi nakukwebesa lopelo iwa mudibi munene amaxikama kulu kwa mai mangi,

² akamwendela bafumu ba loboko mendela ; yi bantu bamaxikama ku loboko bakakolexebwa nkowa ku malufu a budibi bwanci.

³ Yi akangucwala mu mwoxixi ku mbata a kisobe ; yi nakamona mwamukaxi uxikamini pa Nyama a mumbidi ă maxi, amakwolubila yi mena a mietangu, yi udi yi micwe sambwali yi xiba disangi.

⁴ Mwamukaxi akalatixibwa mbuxa a tululu a bwinu yi a mumbidi ă maxi, yi akabongexebwa yi ôlo yi mabwe a mapiko yi mabwe a mayamba. Mu kianca kienci mwakadi mpamba a ôlo amakwolubila yi nyete, yi bintu bia mbindu bia budibi bwanci.

⁵ Yi ku mpala anci kwakadi dina difunda, ene, “ BWALO BUSOKOKA, BABELONO MUNENE, MAMA A BADIBI YI A NYETE YA LOBOKO. ”

⁶ Yi nakamona mwamukaxi amakolwa nkolwa ya maxi a bena babala, yi maxi a batôbôdi ba Yisu. Yi panabamona, nakakama dikamu dingi.

⁷ Yi mwangele akangwambila ene, Wamakama dikamu kukai ? Meme nakukusakolela bwalo busokoka bwa mwamukaxi, yi bwa Nyama amamucwala, udi yi micwe sambwali yi xiba disangi.

⁸ Nyama akamona owe akadiko yi kienako ; yi utanalanda kuximuna mu dina twakô kuya ncimina nya. Yi bantu bamaxikama ku loboko batena yi mena mafunda mu mukanda ă môyo pôi kibangolelu kia loboko, banakama kama pa kumona Nyama ene, akadiko, yi kienako, yi unalwa.

⁹ Kunu kudi lukanyi ludi yi bwinu ; micwe sambwali idi mpongo sambwali ; yamaxikama mwamukaxi kulu kwayo.

¹⁰ Idi lolo bafumu sambwali, batano bamapona ; umoumwe udiko ; munga ukidi kaluli ; yi palolwayi unakala kakondo kabende.

¹¹ Yi Nyama you akadiko yi kienako, yei kabidi udi muna yenana, yi udi a sambwali, yi uyeya kuya ncimina nya.

¹² Yi xiba disangi yakamona owe idi bafumu disangi, bakidi kabasoangata bufumu, kate ku ola umoumwe kunangatabo bumanya yi Nyama ndongo luna bafumu.

¹³ Baba badi yi lukanyi lumolumwe, yi banalongolela Nyama ngulu yabo yi bumanya bwabo.

¹⁴ Baba banatanda yi Mwana a mukwakwa mbita, yi Mwana a mukwakwa unabapidila, bwalo budiyi Yangabita a baYangabita yi Fumu a bafumu, yi bobo badi yinanci bamabikidibwa, bamasungudibwa, badi bena kibaku.

¹⁵ Yi akangwambila ene, Mai akamona owe, amaxikama mudibi kulu, adi bantu yi bimbukuma yi mabila yi ndimi.

¹⁶ Yi xiba disangi yakamona, yi Nyama, baba bananyañana mudibi, banamuteka makaci matupu, yi butaka, yi banadya nyama anci yi banamwosa mudilu.

¹⁷ Bwalo bwamateka Ncembi mu micima yabo ndo kwenca lukanyi lwanci, yi kwakala yi lukanyi lumolumwe, yi kulongolela Nyama bufumu bwabo, pôi kikondo kinafikixibwa meyi a Ncembi.

¹⁸ Yi mwamukaxi akamona owe udi bula bunene butani yi bufumu kulu kwa bafumu ba loboko.