KIEBEXELU 15 - Disambi Dipyadipya

¹ Yi nakamona kinga kilayixilu mu diulu kinene kia kikamakama ; bangele sambwali badi yi masama sambwali, aa a ku sula ; bwalo bwamakukixibwa bisusu bia Ncembi munda mwao.

² Yi nakamona luna mai manene a mulondo, maputola yi mudilu, yi bobo bakadi bamapidila Nyama yi kifwanisa kienci, yi lubadi lwa dina dienci, badi mu kwemana kulu kwa mai manene a mulondo, badi yi sese ya Ncembi.

³ Badi mu kwembikisa lolo musambu ă Mosese, musadi a Ncembi, yi musambu ă Mwana a mukwakwa, ene, Makisa ebe adi manene yi a bikamakama, Fumu Ncembi, Ncembi Xadai. Miesambu yebe idi ya nkwami yi sôsôlwo, Fumu a mabila.

⁴ Ñani ani unakala kasocina, Fumu, yi kasotumbisa dina diebe ? Bwalo budi Owe mutupu babala ; bwalo bunalwa mabila moso yi banaxingila ku mpala ebe ; bwalo bwamakwebexebwa makisa ebe a nkwami.

⁵ Yi kunyuma kwa bintu bebi nakatebela, yi tempelo akadipudibwa a ncibo a ntôbô mu diulu ;

⁶ yi bangele sambwali bakabatuka mu tempelo, bakadi yi masama sambwali, bamalatixibwa mbuxa a babala obo, yi biedi biabo bidinga yi miekaba ya ôlo.

⁷ Yi kimo kipangu kia bipangu binai bia môyo kiakapa bangele sala sambwali ya ôlo, yamakwolubixibwa bisusu bia Ncembi, udi yi môyo ku mieciya ya mieciya.

⁸ Yi tempelo akakwolubixibwa munyinga ămabatuka mu dikai dia Ncembi yi mu ngulu yenci ; yi kakwakadi muntu ubili kubwela mu tempelo biamamanibwa masama sambwali a bangele sambwali.