KIEBEXELU 11 - Disambi Dipyadipya

¹ YI lukaku lwakangupebwa luna mulangala, yi yei ene, Bika, elekyesa lwedi lwa tempelo a Ncembi, yi lwa kilongolelu, yi bantu baxingila momu.

² Yi lekyela lumbu lutani kunci kwa tempelo, kulwelekyexi ; bwalo bwamalongebwalu mabila, yi bananyata bula bwa babala muxi mwa makasa abo ngondo masangi anai yi ngondo ibidi.

³ Yi nakupa batobôdi bamene ngulu, yi banatôbôla ntôbô lokone lwa matuku yi matuku nkama ibidi yi masangi asambomo, balete makutu.

⁴ Baba badi mici ibidi ya olife yi minda ibidi yamakwemana ku mpala a Fumu a loboko ;

⁵ yi ndo muntu mwoso amakyeba kubencela bubi, mudilu ndo ămabatuka ku misuku yabo yi ămapisa bantu bamatanda yinabo. Yi ndo muntu mwoso amakyeba kubencela bubi, uxexipibwa mo nako.

⁶ Baba badi yi bumanya bwa kuncibika diulu, bitaxeloka mbula ku matuku a kidimuxilu kiabo ; yi badi yi bumanya kulu kwa mai ndo kwakulumuna ku maxi, yi bwa kukuma loboko yi masama moso dituku dioso dianangabo.

⁷ Yi panakala bamamana ntôbô yabo kutôbôla, Nyama you amaximuna mu dina twakô unatanda yinabo mbita yi unabapidila, yi unabaxipa.

⁸ Yi mimbidi yabo mifu yinalala mu mwolongo ă bula bobu bunene, bwamabikidibwa yi mubikidilu ă Mwoxixi ene, Sodomo, yi Ecipito, bwakakopekyebwa koku kabidi Fumwabo ku nkulusu.

⁹ Yi banamona mimbidi yabo mifu kudi bantu yi kudi malungu yi kudi ndimi yi kudi mabila, matuku asatu yi dimo dituku pakacikaci ; yi kabasonanga mimbidi yabo yincikibwi mu nkita.

¹⁰ Yi bobo bamaxikama ku loboko bamaxekyelela ku bwalo bwabo yi banakala yi kiango, yi banatumañana malongi ; bwalo bwakanyingisa badimuxi baba babidi bantu bamaxikama ku loboko.

¹¹ Yi kunyuma kwa matuku asatu yi dimo dituku pakacikaci, mwoxixi ă moya ăkababwela kudi Ncembi, yi bakakwemana ku makasa abo ; yi bowa bungi bwakakwata bantu bakadi mu kubatebela.

¹² Yi bakakwombwa diyi dikola dia mu diulu didi mu kubambila ene, Nuximuni kunu. Yi bakaximuna munda mwa diulu ku dibaxi ; yi bantu bakatanda yinabo bakabatebela.

¹³ Yi ku ola you kwakadi kutepa kunene kwa loboko, yi kicini kimokimwe kia bicini bisatu bia bula kiakapona paxi ; yi mena a bantu akadi nkone sambwali bamaxipibwa ku kutepa kwa loboko. Banga lolo bakakwolubila bixesa, yi bakatumbisa Ncembi a diulu.

¹⁴ Mpeya amubidi amadika ; mona mpeya amusatu ulolwa mangwoso.

¹⁵ Yi mwangele a sambwali akakuma mpungi ; yi mu diulu mwakadi meyi akola, akatôya ene, Bufumu bwa loboko budiko, bwa Fumwecu yi Kalistu anci, yi yei unakala yi bufumu bwanci ku mieciya ya mieciya.

¹⁶ Yi babakulu masa ngi abidi yi banai, bamaxikama ku nkwasa yabo ku mpala a Ncembi, bakapona mpala muxi yi bakaxingila Ncembi

¹⁷ ene, Tukwaxingila biloba, Fumu Ncembi, Ncembi Xadai, You udiko, yi akadiko, bwalo bwamangata ngulu yebe minene, yi bwalo bwamangata bufumu bwebe.

¹⁸ Mabila akadi yi bisusu, yi bisusu biebe biamalwa, yi kikondo kia bafu kusambolebwa, yi kikondo kia kusayila basadi bebe sayi badi badimuxi ; yi bena babala, yi bobo bacina dina diebe yi babende yi banene ; yi kikondo kia kuxipa bantu bamaxipa loboko.

¹⁹ Yi tempelo akadipudibwa a Ncembi a mu diulu, yi muxete ă disambi dienci ăkamonebwa mu tempelo anci ; yi misadi ya kapenya yakalwa, yi meyi, yi makongola, yi kutepa kwa loboko, yi mabwe a mbula mangi mangi.