FILIPI 3 - Disambi Dipyadipya

¹ KU sula, bakunyi bamene, nuxekyeleli mu Fumu. Kunufundila bintu bebi kakusongupenyusa, mo ku bwalo bwenu kudi kunuteka ngengele ngengele.

² Nudimuki bwalo bwa yimbwa, nudimuki bwalo bwa basadi babi, nudimuki bwalo bwa bena salu.

³ Bwalo butudi bena bwadi coco, bamaxingila Ncembi kudi Mwoxixi a Ncembi, bañana mwanu bwalo kwa Kalistu Yisu, yi kabasokwetabuxila munyu pô ;

⁴ isanga meme ambeci nxeakala mikyemi yi kwetabusa anga ku bwalo bwa munyu. Aka munga muntu mwoso encenca dia kwetabuxila munyu, meme ngwadika.

⁵ Nakakwelebwa bwadi ku diba dia yenana, nakadi muna bubila bwa Isalele, muna bulungu bwa Bencamini, muna Ebeleo a bena Ebeleo ;

⁶ ku bwalo bwa bwadi nakadi muFalixi ; ku bwalo bwa mulukutu, nakakolomona kikokye ; ku bwalo bwa nkwami idi munda mwa bwadi, nakasañanibwa kutena bwalo bubi.

⁷ Kate bintu bebi biakadi yinami sombo kusomboka, kabebi ndo binakabala ene, kupwekyelela, bwalo bwa Kalistu.

⁸ Kate sôsôlwo, ngwabala bintu bioso kabidi mo kupwekyelela bwalo bwa kilubukilu kia Kalistu Yisu Fumwami ; unamapwekyelela ku bintu bioso ku mucwe ănci, yi namabibala luna mwosapu, binxeakala yi Kalistu ku kutetowa kwamene,

⁹ yi binxesananibwa munda mwanci, kumoni yi nkwami yamene idi ya bwadi, kate yei idi ku kwetabusa kwa Kalistu, nkwami yei idi ya Ncembi pa kwetabusa ;

¹⁰ binxemulubukwa yei, yi ngulu ya kwombuluka kwanci kudi bafu, yi busangilanani bwa masama anci akatatixibwayi, binxefwanixibwa lufu lwanci ;

¹¹ ndo ambeci nxepeta ku kwombuluka kudi bafu.

¹² Kumoni luna kutôya ene, namangata nkyekyu, ndo ene, namakuka nkyekyu, mo ngwalabela ndo ambeci nxekwata bwalo bobu bunakakwacidibwa kudi Kalistu Yisu.

¹³ Bakunyi, kisodienca mikyemi ene, namakwata nkyekyu ; mo ngwencenca kintu kimokimwe ; ngwelelwa bintu bidi kunyuma bwilwa, yi ngwalundikila bintu bidi ku buxi,

¹⁴ ngwalabela bolongya bwa ngolo, ku sayi ya kubikila koku kutwamabikidibwa kulu kudi Ncembi mu Kalistu Yisu.

¹⁵ Mbwôso bungi bwecu bamakuka twakali yi lukanyi lwa noku ; yi ndo ku kintu kioso nudi yi nkanyi ibidi, Ncembi unanwebesa isanga bwalo bobu ;

¹⁶ kaninga bwalo bwa lwedi lutwamafika nkyekyu, twendi pa lwedi lolu.

¹⁷ Bakunyi, nwakali bokodi bamene, yi nutebeli bantu bendenda bea luna lwendo lwecu lutwakakwelekyesa kwenu.

¹⁸ Bwalo bwendenda bantu bangi banamanwambila diabo matuku mangi, yi ntananwambila kabidi nkyekyu isanga yi masonci, ene, badi batandañani yi nkulusu a Kalistu ;

¹⁹ badi yi kixikidilu kiabo ndo kuncimixibwa ; badi yi difu ku ncembi abo ; badi yi mwanu ăbo mu bundu bwabo ; banama bintu bia loboko.

²⁰ Bwalo butudi yi bwana bwecu bwa bula munda mwa diulu ; mutwadingidila kabidi Mupandixi, Fumu Yisu Kalistu ;

²¹ unapilula kabidi mumbidi ă kupwexebwa kwecu, bixefwanixibwau mumbidi ă dikai dienci, bea bidi mukixilu ălubukwayi yinau kupwesa isanga bintu bioso kudiyi mikyenci.