FILIPI 2 - Disambi Dipyadipya

¹ MBWOSO ndo kibondelu kioso kidiko munda mwa Kalistu ndo kusambanina kwoso kwa nyinga, ndo busangilañani bwoso bwa Mwoxixi, ndo mwengo mwoso yi mankangi moso,

² nwombudisi kiango kiamene ; nwakali yi lukanyi lumolumwe, yi nyinga umoumwe, yi diyi dimodimwe, bena lukanyi lumolumwe.

³ Kanwenci kintu kioso ku bwalo bwa mbata ndo ku disasa, kate muntu mwoso abali yi diedya ku lukanyi ene, muna kwanci umwadika kunengela ;

⁴ nudi mu kutebela kumoni muntu mwoso enu bintu bienci mikyenci ; kate muntu mwoso enu kabidi bintu bia banga bantu.

⁵ Nwakali yi lukanyi lolu munda mwenu lwakadi munda mwa Kalistu Yisu.

⁶ Yei, bwalo bwakadiyi yi mwocindu ă Ncembi, akadi kasokyeba kwakala lwedi lumolumwe yi Ncembi luna ku bwefi,

⁷ kate akadipangulula mikyenci, yi akadiangacila mwocindu ă musadi, yi akalwa yi bufwani bwa muntu.

⁸ Yi pa kusañanibwa yi butonga bwa bantu akadipwesa mikyenci, yi akalwa yi diedya pôi ku lufu, e, lufu lwa nkuiusu.

⁹ Ku mucwe ou kabidi kwakamubandisa Ncembi kulu wapa, yi akamupa dina didi kulu kwa dina dioso ;

¹⁰ bixekonyama kinu kioso ku dina dia Yisu, kia mu diulu, yi kia ku loboko, yi kia muxi mwa loboko ;

¹¹ yi bixesakola ludimi lwoso ene, Yisu Kalistu udi Fumu, ndo kulundisa dikai dia Ncembi Tete.

¹² Mbwôso banangibwi bamene, bea binwamakwedeya matuku moso, kumoni ku meso amene kutupu, kate nkyekyu nwadika kwenca nako bindi meme kunga, nusali mudimo ă kupandixibwa kwenu yi bowa yi lukomba ;

¹³ bwalo budi you Ncembi encenca munda mwenu yi kunanga yi kwenca, bea bidi muxekyelelu ănci.

¹⁴ Nwenci bintu bioso kutena mapindu yi kutena mbata ;

¹⁵ binuxeakala kutena dikamu yi kutena bosaka, bana ba Ncembi kutena kantobo ka bubi, pakacikaci pa mwociya ă makoko yi ă masalu ; unwamonebwa pakacikaci pabo bea minda ku loboko ;

¹⁶ nudi mu kulongola diyi dia môyo ; binxeakala yi mwanu ă kwana ku dituku dia Kalistu ; ene, nakadi kisoya mbilu kanana, yi nakadi kisokamba kanana.

¹⁷ Kate ndo namapanguludibwa kabidi bea malufu kulu kwa kixipilu kia kwetabusa kwenu, yi kulu kwa mudimo ăku, ngwamona kiango yi ngwaxekyelela yinenu bungi bwenu.

¹⁸ Mbwôso mo nako kabidi nonu numoni kiango yi nuxekyeleli yinami.

¹⁹ Mo ngwencenca mu Fumu Yisu ene, ntumi Timoteo kunudi mankyelonkyelo, binxekolexebwa meme kabidi panalubukwa mwakadilu ěnu.

²⁰ Bwalo buntena yi munga muntu umoumwe udi yi lukanyi lwa noku, unadingila mwakadilu enu sôsôlwo.

²¹ Bwalo bwapalala bantu boso bintu biabo mikyeabo, kumoni bintu bia Yisu Kalistu.

²² Mo nonu nwalubukwa mwakakwelekyexebwayi, ene, luna mwana yi tetenci ndo biakasalayi yinami ku mudimo ă losangu lunengela.

²³ Mbwôso ngwencenca ene, mutumi mangwoso, panamona munakala bwalo bwamene ;

²⁴ mo namakwetabuxila Fumu ene, meme kabidi nakulwa mo nkyekyu mikyemi.

²⁵ Kaninga nakakwenca ene, kudi loko kutuma Epafalodito kunudi, udi muna kwami, yi musadisanani yinami, yi disalai yinami dia Fumu, yi mutumibwi enu, yi musadi enu bwalo bwa bokombi bwamene.

²⁶ Bwalo bwakadilayi kunumona bungi bwenu, yi akadi yi buxitu bungi bwalo bunwakakwombwa ene, yei udi yi kusama.

²⁷ Yi akadi yi kusama sôsôlwo, pepe yi lufu ; kate Ncembi akamwombwela mwengo ; yi kumoni yei mutupu kate meme kabidi, bintaxeakala yi buxitu kulu kwa buxitu.

²⁸ Mbwôso namamutuma yi mulukutu, binuxexekyelela pa kumumona kabidi, yi bixepwekyelela buxitu bwamene.

²⁹ Mbwôso numwangati mu Fumu yi kiango kioso ; yi nunemeki bena noku ;

³⁰ bwalo ku mucwe ă mudimo ă Kalistu kwakokokyelayi pepe yi lufu, kutena kwombwela môyo ănci mutete, ndo kwombudisa lwedi lwakasaka lwa mudimo ěnu ku bwalo bwamene.