FILEMONO 1 - Disambi Dipyadipya

¹ PAULU, musungi a Kalistu Yisu, yi Timoteo mwakunyi, kudi Filemono musadisañani yinecu munangibwi,

² yi kudi Afia, mwakunyi a babakaxi, yi kudi Akipo, disalai yinecu dia Fumu, yi kudi kikokye kidi mu ncibo ebe ;

³ lwoxixi lwakali yinenu yi polo kudi Ncembi Tetecu yi kudi Fumu Yisu Kalistu.

⁴ Ngwaxingila Ncembi amene biloba matuku moso, nkwatamba tamba mu ndombu yamene,

⁵ ndi mu kwombwa dia nyinga yebe yi dia kwetabusa kudi yinebe ku bwalo bwa Fumu Yisu, yi ku bwalo bwa bena babala boso ;

⁶ bixeakala busangilañani bwa kwetabusa kwebe kucwa, bixeakalabu yi kilubukilu kia kintu kioso kinengela kidi munda mwecu ku bwalo bwa Kalistu.

⁷ Bwalo bunakadi yi kiango kingi yi kibondelu kingi mu nyinga yebe, bwalo bwamasubixibwa micima ya bena babala kudi, muna kwami.

⁸ Mbwôso isanga ndi yi mucima mwoso mu Kalistu ă kukulanga bwalo bobu bwamalelekyela,

⁹ kaninga ku mucwe ă nyinga ndo kungwatunga kukubondabonda ; meme, Paulu, ndi kinunu, yi nkyekyu musungi kabidi a Kalistu Yisu.

¹⁰ Nkwabondabonda ku mucwe ă mwanami unamalela ku nkanu yamene, Onesimo,

¹¹ utakadi kalikali yi sombo mwoso ku mpala ebe kusomboka yinanci, mo nkyekyu udi muna sombo ku bwalo bwebe yi ku bwalo bwamene ;

¹² unapupingasa kudi, kulexi yi kutuma mucima ămene mikyemi ;

¹³ unxenanga kubamba kunu yinami, bixengusadilayi ku mucwe ěbe ku nkanu ya losangu lunengela.

¹⁴ Mo kutena lukanyi Iwebe, meme nakadi kisonanga kwenca kintu kioso ; bixeakala bonkangi bwebe kumoni bea bwa dibambu, kate bwa mucima.

¹⁵ Ambeci yei akanamunibwa kudi kakondo kabende, bixemwangata owe kô kô,

¹⁶ kumoni kabidi bea mupika kate kudika mupika, bea mwakunyi munangibwi ; kudi meme sôsôlwo, mo kudi owe kabidi, yi mu munyu yi mu Fumu.

¹⁷ Aka lolo ungwabala ndi mwabanyañani yinebe, umwangati bea mikyemi.

¹⁸ Kaninga ndo yei amakwencela bwalo bwoso bubi, ndo udi yinebe mbata mwoso, uteki bwalo bobu ku bwalo bwamene.

¹⁹ Meme Paulu namafunda yi kianca kiamene mikyemi, ene, meme nakukufuta. Kisokutôyela mudi owe yinami mbata ku bwalo bwebe mikyebe kabidi.

²⁰ Ya, muna kwami, meme nxetetowa ku bwalo bwebe mu Fumu ; subisa mucima ămene mu Kalistu.

²¹ Bwalo buntani yi kwetabusa kwa kwetabuxila diedya diebe ndo binamakufundila, bwalo bungwalubukwa ene, owe unakwenca isanga kudika diyi dingwatôya.

²² Mo ungulungikili kabidi kidi ; bwalo bunamadingila ene, ku mucwe ă ndombu yenu, nakunulongolebwa.

²³ Epafalasa, udi yinami musungi mu Kalistu Yisu, ukwabisa ;

²⁴ yi Maku, yi Alistako, yi Demasa, yi Luka, badi basadisañani yinami.

²⁵ Lwoxixi lwa Fumwecu Yisu Kalistu lwakali yi kidimu kienu.