EFESO 5 - Disambi Dipyadipya

¹ MBWÔSO nwakali bokodi ba Ncembi bea bana banangibwi ;

² yi nwendi mu nyinga bea biakatunanga Kalistu kabidi, yi akadilongola ku micwe yecu, dilongi yi kixipilu ku mpala a Ncembi, didi yi mwoxixi ă manonu anengela.

³ Kate budibi, yi lobindu Iwoso, yi luxindilu, kabitambibwi pakacikaci penu bea biamalelekyela yi bena babala ;

⁴ ndo nyete, ndo kutôya kwa kanana, ndo miexopo, bitasolelekyela ; kate kuxinga kwa biloba.

⁵ Bwalo bunwalubukwa sôsôlwo dia mudibi mwoso yi muna mbindu yi muna luxindilu (udi bea muxingidi a bwanga bwanci), ene, yei kiena yi mwokito mwoso mu bufumu bwa Kalistu yi Ncembi.

⁶ Muntu kanudimbi yi meyi a kanana ; ku bwalo bwa bintu bebi kulolwa bisusu bia Ncembi kulu kwa bana ba kadiu.

⁷ Mbwôso kanwakadi yinabo busangilañani bumobumwe ;

⁸ bwalo bunwakadi mwedima kalikali, kate nkyekyu nudi obo mu Fumu ; nwendi bea bana ba obo,

⁹ (bwalo bwapwakala dimona dia obo ku kunengela kwoso yi nkwami yi sôsôlwo) ;

¹⁰ nudi mu kwelekyesa bwalo bobu bwaxekyelesa Fumu.

¹¹ Kanwakadi yi busangilafiani bwoso yi makisa a mwedima atena mamoma, kate nwatongoli ;

¹² bwalo budi bundu isanga kutôya dia malo amakwencebwa kudibo ku busoko.

¹³ Mo malo moso patongolebwao amakwebexebwa ku obo ; kintu kioso kiamakwebesa bintu bioso kidi obo.

¹⁴ Ndo biatôyayi ene, Bika owe walala tulu, yi emana kudi bafu, yi Kalistu unakutekyela obo.

¹⁵ Mbwôso nutebeli yi mpaso munwendenda, kumoni bea bantu basaka yi bwinu, kate bea bena bwinu ;

¹⁶ nudi mu kwololola bipoma bwalo budi matuku aa noku mabi.

¹⁷ Mbwôso kanwakadi yi budibi, kate nulembeteli nyinga ya Fumu yakyebayi.

¹⁸ Yi kanukolwi nkolwa ya malufu adi bukadeyakadeya, kate nwolubixibwi yi Mwoxixi a babala.

¹⁹ Nwambilafiani mu misambu yi mu ncemba yi mu miembikixilu ya Mwoxixi, nudi mu kwembikisa yi kukwameya nkwamenu ku mucima ěnu kudi Fumu.

²⁰ Nuxingi biloba matuku moso ku mucwe ă bintu bioso mu dina dia Fumwecu Yisu Kalistu ku mpala a Ncembi, isanga Tete.

²¹ Nudipwesi mikyenu muntu kudi muna kwanci muntu kudi muna kwanci mu bowa bwa Kalistu.

²² Bakaxi, nudipwesi mikyenu kudi babayenu, bea kudi Fumu.

²³ Bwalo budi mwamulumi mucwe ă mukasanci bea bidi Kalistu kabidi Mucwe ă kikokye ; yi yei udi mupandixi a mumbidi.

²⁴ Kate bea biamadipwesa kikokye mikyekio kudi Kalistu ndo bixedipwesa mikyeabo babakaxi kabidi kudi babayabo mu kintu kioso.

²⁵ Babalumi, nunangi bakaxi benu bea biakananga Kalistu kabidi kikokye, yi akadilongola mikyenci ku mucwe ăkio ;

²⁶ bixekibalolayi amakikusula ku kiowelu kia mai ku diyi dia Ncembi,

²⁷ bixelongolayi kikokye kudiyi mikyenci yi dikai, kitena ndo kantobo ndo mwanda ku mpala, ndo kintu kioso kia noku ; kate bixeakalakio babala yi kutena bwalo bubi.

²⁸ Mo nako babalumi baxenanga bakaxi babo kabidi, bea luna mimbidi yabo mikyeabo.

²⁹ You ananga mukasanci udiananga mikyenci ; bwalo butenako muntu pô amanyafiana munyu ănci mikyenci ; kate amaudisa yi amaubungula, bea kabidi Kalistu yi kikokye ;

³⁰ bwalo butudi bicini bia mumbidi ănci.

³¹ Ku mucwe ou kunaxiya muntu tetenci yi mamanci yi unasambikibwa kudi mukasanci, yi bubidi bwabo banakala munyu umoumwe.

³² Bwalo bobu bwa bwisa budi bunene ; mo ngwatôya dia Kalistu yi dia kikokye.

³³ Kaninga nonu kabidi, muntu mwoso bienci muntu mwoso bienci, anangi mukasanci bea mikyenci ; yi bwalo bwa mwamukaxi, anemeki bayenci.