EFESO 4 - Disambi Dipyadipya

¹ MBWÔSO meme, musungi mu bwalo bwa Fumu, nwabondabonda ene, Nwendi bea bialelekyela yi kubikidibwa kunwamabikidibwa yinaku,

² yi kudipwesa kwoso yi diedya yi kicwandundu, nudi mu kwekyelañana yi kiekyelo kia nyinga.

³ Nupalali yi mulukutu ndo kunama mwakadilu umoumwe ă Mwoxixi yi kisambikilu bia polo.

⁴ Mumbidi udiko umoumwe, yi Mwoxixi umoumwe, bea binwakabikidibwa yi mudingidilu umoumwe ă kubikidibwa kwenu ;

⁵ Fumu umoumwe kwetabusa kumokumwe, kunumeyebwa kumokumwe ;

⁶ Ncembi yi Tete umoumwe a bantu boso, udi kulu kwa bantu boso, yi mu bantu boso, yi munda mwa bantu boso.

⁷ Mo kudi muntu ecu mwoso kwakapebwa lwoxixi lwamalelekyela yi lwedi lwa dilongi dia Kalistu.

⁸ Ndo biatôyayi ene, Pakaximunayi kulu pakacwalayi busungi musungi, yi akapa bantu malongi.

⁹ Mo kutôya ene, Akaximuna, kai bea kutôya ene, akapweka kabidi mu bicini bia loboko bidi muxi ?

¹⁰ You akapweka udi you kabidi akaximuna kulu kwa melu moso kulekule, bixekwolubisayi bintu bioso.

¹¹ Yi akapa banga bantu bakali batumibwi ; yi banga, badimuxi ; yi banga, bambidi ba losangu lunengela ; yi banga, banami yi beyexi ;

¹² bwalo bwa kukukisa bena babala ; ndo ku kwendesa kwa mudimo ă busadi kusala, yi ndo ku kwabaka kwa mumbidi ă Kalistu ;

¹³ bitwafika bungi bwecu ku mwakadilu umoumwe ă kwetabusa, yi ă kilubukilu kia Mwana a Ncembi, ku Iwedi lwa muntu amalunda mwamukulu, ku lwedi lwa bule bwa kiolubilu kia Kalistu.

¹⁴ Nako katuxeakala kabidi babaki nyô, bamatambixibwa yi kunu yi koku, yi bamapumbuxibwa yi lupepele lwoso lwa kweyesa kudi ku Iwomonyi lwa bantu, yi ku bwanya bwabo, kweyesabo ndo kubuncisa bantu.

¹⁵ Mo pa kwenda yi sôsôlwo mu nyinga, tuxelunda pôi kudiyi mu bintu bioso, udi Mucwe, isanga Kalistu.

¹⁶ Kudiyi kwamakwelekyexebwa bungi bwa mumbidi bileli te, yi ămasambikibwa ku dinyungu dioso luna mwakisadio, bea bidi mukixilu ă kicini kioso pa lwedi Iwakio, ămalundisa mumbidi ndo kudiabaka mikyeu mu nyinga.

¹⁷ Mbwôso ngwatôya yi ngwatôbôla mu Fumu ene, Kanwendi nyô bea biendenda mabila kabidi, ku kimbombo kia lukanyi lwabo,

¹⁸ bamapindixibwa ku kilubukilu kiabo, bamanamunibwa ku môyo ă Ncembi bwalo bwa mwedima udi munda mwabo, bwalo bwa kukolexebwa kwa mucima ăbo.

¹⁹ Kabobo bamalekyela kwakala kulebela munda, bamadilongola ku luxindiiu lwoso ndo kukisa lobindu lwoso yi bwefi.

²⁰ Mo nonu nwakadi kanusokweya Kalistu noku ;

²¹ akali nwakamwombwa yi nwakakweyexebwa munda mwanci, bea biapwakala sôsôlwo munda mwa Yisu.

²² Mbwôso, ku bwalo bwa mwosambu ěnu a buxi, nunculi muntu a kalikali, udi yi musalu bwalo bwa nyinga ya ncimi ;

²³ binuxesubixibwa mu mucima ă lukanyi lwenu,

²⁴ binuxelata muntu mupyamupya, amapangibwa yi bufwani bwafwanañana yi Ncembi mu nkwami yi mu babala a sôsôlwo.

²⁵ Mbwôso nunculi ncimi, yi nutôyañani sôsôlwo muntu mwoso yi muna kwanci ; bwalo butudi bicini muntu a muna kwanci muntu a muna kwanci.

²⁶ Ndo yi bituku, nwakali yi bituku yi kanwoni ; diba kadipweki pa bisusu bienu ;

²⁷ kanuxiyidi lolo diabolo kidi.

²⁸ You akakweba, kyebi kabidi ; kate akambi mudimo, akisi bwalo bobu ku makaci anci budi bunengela, bixeakalayi yi bintu bia kumulongola amakwayila.

²⁹ Kutôya kwoso kwa musalu kakuncuki ku musuku ěnu, kate kutôya koku noku kwamalelekyela yi mwabakilu mwoso uxekwabakibwa, bixelongolaku lwoxixi kudi bantu baba bombombwa.

³⁰ Yi kanutatixi Mwoxixi a babala a Ncembi, unwamabakibwa kilembetelu kudiyi pôi ku dituku dia kupikudibwa.

³¹ Bululu bwoso, yi bituku, yi bisusu, yi munyingu, yi mwotangu, biancudibwi kunudi yi mwoxingi mwoso ;

³² yi nwombwelañani bonkangi yi mwengo ; yi nulekyelañani mabi bea biakanulekyela Ncembi kabidi mabi munda mwa Kalistu.