EFESO 3 - Disambi Dipyadipya

¹ KU mucwe ou, meme Paulu, musungi a Kalistu Yisu ku bwalo bwenu badi bena mabila,—

² akali lolo nwamakwombwa dia bunkôngôlo bwa lwoxixi lwa Ncembi lwakangupebwa ku micwe yenu ;

³ mwakangwebexebwa bwalo bobu busokoka ku kiebexelu ; bea binakafunda buxi mu meyi mabende.

⁴ Mbwôso nonu, binwabala, nunalembetela bwinu bundi yinabu ku bwalo busokoka bwa Kalistu.

⁵ Ku minga mieciya bwalo bobu bwakadi kabusokwebexebwa kudi bana ba bantu, bea biamakwebexebwabu batumibwi banci ba babala nkyekyu, yi badimuxi banci mu Mwoxixi.

⁶ Ene, bena mabila badi bakitanani yinecu ba mwokito, yi bena mumbidi umoumwe yinecu, yi babanyanani yinecu ba kilaka mu Kalistu Yisu bwalo bwa losangu lunengela ;

⁷ lunakatekyebwa mulongodi alu pa lwedi lwa dilongi dia lwoxixi lwa Ncembi lwakangupebwa, luna bidi mukixilu ă ngulu yenci.

⁸ Kudi meme, udi muxi mwa you amafwila bena kwanci bubende a bena babala, kwamapebwa lwoxixi lolu, lwa kwambila mabila losangu lunengela lwa madidi a Kalistu atabiyi kwelekyexebwa ku lwedi ;

⁹ yi lwa kumonesa bantu boso bunkôngôlo bwa bwalo busokoka bwakasokokyebwa pôi mieciya mioso munda mwa Ncembi akapanga bintu bioso.

¹⁰ Akadi yi lukanyi ene, kudi makalanga yi mamanya adi mu melu kulu kuxekwebexebwa bwinu bwa Ncembi nkyekyu munda mwa kikokye, bwa ntonga yi ntonga.

¹¹ Nako kwakadi lukanyi lwanci lwa kô kô lwakakwelayi lukanyi munda mwa Kalistu Yisu Fumwecu ;

¹² utudi yi mucima munda mwanci yi kibwelelu kia kubwela yi mucima bwalo bwa kwetabusa kwecu ku bwalo bwanci.

¹³ Mbwôso ngwalomba ene, kanupwangwi bwalo bwa maxitu amene angwombombwa ku micwe yenu, atani mwanu enu.

¹⁴ Ku mucwe ou, ngwakuma binu biamene paxi ku mpala a Tete

¹⁵ amatambibwa bulungu bwoso kudiyi mu diulu yi pa loboko,

¹⁶ anulongoli ngulu pa lwedi lwa bodidi bwa dikai dienci, yinuxesubixibwa yinayo kudi Mwoxixi anci mu muntu a munda ;

¹⁷ bixexikama Kalistu munda mwa micima yenu ku kwetabusa ; mo nako binwamancikibwa dicina mu nyinga, yi binwamasubixibwa mu nyinga,

¹⁸ nonu nuxeponyañana yi bungi bwa bena babala ndo kulembetela bunene, yi bule, yi bule pyô, yi bule twakô ;

¹⁹ yi kulubukwa nyinga ya Kalistu yamadika kilubukilu, binuxekwolubixibwa ku kiolubilu kia Ncembi bungi bwakio.

²⁰ Kudiyi lolo ubili kwenca bungi bungi kulu kwa lwedi lwoso lutwalomba ndo lutwelela lukanyi, pa lwedi lwa ngulu yakisañana munda mwecu,

²¹ kudiyi kwakali dikai munda mwa kikokye yi munda mwa Kalistu Yisu ku mieciya mioso ya mieciya ya kô kô. Amen.