EFESO 2 - Disambi Dipyadipya

¹ YI nonu, bakadi bafu mu mona enu yi mu mabi enu,

² anwakakwenda munda mwao kalikali yi mwendelu ă mwociya ă loboko lolu, mwendelu ă fumu a bumanya bwa dinamu dia mwoxixi kulu, kidimu kieki kiamakwencañana nkyekyu mu bana ba ntamu.

³ Yi coco kabidi bungi bwecu twakakwenda yinabo kalikali mu xindilu ya munyu ecu, twakadi mu kwenca nyinga ya munyu yi ya nkanyi ; yi ku butonga bwecu twakadi bana ba bisusu bea banga bantu.

⁴ Mo Ncembi you, udi yi bodidi bwa mwengo, bwalo bwa nyinga yenci mingi yakatunangayi,

⁵ isanga patwakadi bafu bwalo bwa mona ecu, amatuteka yi môyo yi Kalistu ndongo ; (nwamapandixibwa ku lwoxixi) ;

⁶ yi amatubandisa yinanci ndongo, yi amatuxikika yinanci ndongo mu melu kulu, munda mwa Kalistu Yisu ;

⁷ bixekwebesayi madidi amalekola bungi a lwoxixi lwanci mu mieciya yilolwa, ku bonkangi bulolwa kutudi munda mwa Kalistu Yisu.

⁸ Bwalo bunwamapandixibwa ku lwoxixi, ku mucwe ă kwetabusa ; yi koku noku kumoni kwenu mikyenu ; kudi dilongi dia Ncembi ;

⁹ kumoni bwalo bwa makisa, bitaxekwana muntu mwoso mwanu.

¹⁰ Bwalo bututani mudimo ănci ; twamapangibwa munda mwa Kalistu Yisu bituxekwenca makisa anengela akalungika Ncembi buxi bituxekwenda munda mwao.

¹¹ Mbwôso nweli nkanyi ene, kalikali nonu nwakadi mu munyu. Nwamabikidibwa bena mientonto kudi bantu bamabikidibwa bena bwadi mu munyu, bwamakwelebwa ku makaci.

¹² Mbwôso ku kikondo yikia nwakadi kutena Kalistu, nwakanamunibwa kudi bubila bwa Isalele, yi nwakadi bantu babene ku bwalo bwa masambi a kilaka ; nwakadi kanuna yi mudingidilu yi kanuna yi Ncembi ku loboko.

¹³ Mo nkyekyu, munda mwa Kalistu, nonu bakadi kulekule kalikali nwamatekyebwa pepe ku maxi a Kalistu.

¹⁴ Bwalo budiyi polo ecu akateka babidi umoumwe, yi akaxipa kididi kia nkalu kiakadi pakacikaci ;

¹⁵ bwalo bwakalengolayi nkyetekyete mu munyu ănci, bwadi bwa milangu ya mixiyilu yakaxiyibwa  ; bixepangayi muntu umoumwe mupyamupya munda mwanci mikyenci kudi bantu babidi. Mbwôso akateka polo nako.

¹⁶ Bixekwameyayi lolo bubidi bwabo mu mumbidi umoumwe kidi kimokimwe yi Ncembi, ku nkulusu ; bwalo bwakaxipayi nkyetekyete koku.

¹⁷ Yi akalwa yi akakwambila losangu lunengela Iwa polo kunudi bena kulekule, yi lwa polo kudi bantu, bena pepe.

¹⁸ Bwalo kudiyi ndo kutwakala bubidi bwecu yi kibwelelu kiecu kudi Mwoxixi umoumwe kia kuya kudi Tete.

¹⁹ Mbwôso kanuna kabidi bantu babene yi benyambango, kate nudi bena bula bumobumwe yi bena babala, yi nudi bena nkumbu a Ncembi ;

²⁰ yi nwamakwabakibwa kulu kwa kibangolelu kia batumibwi yi badimuxi, yi Kalistu Yisu mikyenci apwakala dibwe dinene dia ku ilunga basodi.

²¹ Munda mwanci ndo mwamasambikanana kicini kioso kia ncibo loko, kidi mu kulunda lunda ku tempelo a babala mu Fumu.

²² Munda mwanci nonu kabidi nwamakwabakibwa kidi kimokimwe ndo kwakala ncibo a Ncembi kudi Mwoxixi.