EFESO 1 - Disambi Dipyadipya

¹ PAULU, mutumibwi a Yisu Kalistu ku nyinga ya Ncembi, kudi bena babala badi ku Efeso, yi kudi bena kibaku badi mu Kalistu Yisu ;

² lwoxixi lwakali yinenu yi polo kudi Ncembi Tetecu yi Fumu Yisu Kalistu.

³ Ncembi yi Tete a Fumwecu Yisu Kalistu atumbixibwi, amatulwangwasana yi mulwangwasanu mwoso ă Mwoxixi, mu melu kulu, munda mwa Kalistu ;

⁴ bea biakatusungulayi munda mwanci buxi bwa kibangolelu kia loboko, bituxeakala yi babala yi kutena bwalo bubi ku mpala anci mu nyinga.

⁵ Akatulungika buxi bituxeakala yi bwana kudi Yisu Kalistu ku mpala anci mikyenci, luna bidi kiango kia nyinga yenci ;

⁶ bixetumbixibwa dikai dia lwoxixi Iwanci, lwamatumonayi yinalu munda mwa Munangibwi you.

⁷ Munda mwanci ndo mutudi yi kupikudibwa kwecu ku maxi anci, kilekyelo kia mona ecu, luna bidi bodidi bwa lwoxixi lwanci ;

⁸ Iwamalekolesayi ku bwalo bwecu yi bwinu bwoso yi mayala moso.

⁹ Amatulubukisa bwalo busokoka bwa nyinga yenci, luna bidi kiango kienci kiakakwelayi lukanyi munda mwanci mikyenci,

¹⁰ ene, ku mulungikilu ă kikondo kinakukixibwa mieciya mioso kiolubilu tô ndo kunasangisayi bintu bioso mu Kalistu ; bintu bia mu melu kulu, yi bintu bia pa loboko.

¹¹ Munda mwanci, mwa you utwamatekyebwa bena mwokito munda mwanci kabidi ; bwalo butwakalungikibwa buxi, bea biakadi lukanyi lwa you akisa bintu bioso luna bidi lukanyi lwa nyinga yenci,

¹² bituxeakala bena lotumbu lwa kutumbisa dikai dienci ; isanga coco bamadingidila Kalistu buxi.

¹³ Yi munda mwanci nonu kabidi, pakadi nwamakwombwa diyi dia sôsôlwo, losangu lunengela lwa kupandixibwa kwenu ; munda mwanci, binwakamwetabuxila kabidi, ndo munwakabakibwa kilembetelu kia Mwoxixi a kilaka a babala,

¹⁴ udi kibutuku kia mwokito ecu pôi kipikudilu kia bintu bienci mikyenci, bixetumbixibwa dikai dienci.

¹⁵ Ku bwalo bobu meme kabidi, binamakwombwa dia kwetabusa kudi munda mwenu kwa kwetabuxila Fumu Yisu, yi dia nyinga idi yinenu ya kunanga bena babala boso,

¹⁶ kisolekyela kuxinga biloba ku bwalo bwenu, ndi mu kunutamba tamba mu ndombu yamene.

¹⁷ Ncembi a Fumwecu Yisu Kalistu, Tete a dikai, anupi mucima ă bwinu yi ă kiebexelu mu kilubukilu kienci ;

¹⁸ binuxetekyebwa obo ku meso a mucima enu, binuxelubukwa mudingidilu ă kubikila kwanci bidiu, yi bodidi bwa dikai dia mwokito ănci bidibu munda mwa bena babala,

¹⁹ yi ngulu yenci bungi bungi yitena lwedi bidiyo ku bwalo bwecu bamakwetabusa, bea bidi mukixilu ă mpinyu ya ngulu yenci

²⁰ yakakisayi munda mwa Kalistu, pakamubisayi kudi bafu ; yi akamuxikika ku kianca kienci kia kidyo mu melu kulu,

²¹ kulu kwa bukalanga bwoso kulekule, yi kwa bumanya bwoso, yi kwa ngulu mioso, yi kwa bufumu bwoso, yi kwa dina dioso diamatambibwa, kumoni ku mwociya ou kutupu, kate ku mwociya ou kabidi ulolwa ;

²² yi akapwesa bintu bioso muxi mwa makasa anci ; yi akamupa akali Mucwe ă bintu bioso ku mpala a kikokye,

²³ kidi mumbidi ănci ; kiolubilu kia you a-olubisa bintu bioso mu bintu bioso.