EBELEO 7 - Disambi Dipyadipya

¹ MELEKISEDEKYE you, Fumu a Saleme, bokanda bwa Ncembi adika kulu,—yei akapomana yi Abalami pakapiñanayi ku kuxipa kwa bafumu, yi akamulwangwasana.

² Kudiyi ndo kwakapa Abalami kabidi mulambu ă dikapa dimodimwe dia makapa disangi dia bintu bioso ; akadi ku buxi, pa kusakolebwa, ene, fumu a nkwami, yi kunyuma lolo, fumu a Saleme, kulexi yi kutôya ene, fumu a polo ;

³ kutena tete, kutena mama, kutena mukanda ă bakakanci ; akadi kiena yi ndo bubangabanga bwa matuku ndo yi ku sula kwa môyo, mo amatekyebwa yi bufwani bwa Mwana a Ncembi, kayou amasala bokanda kangala kangala.

⁴ Nweli pako bunene bwa muntu you nkanyi, akapa Abalami kakyecu mulambu ă makapa a bintu binene disangi disangi bia lusancu.

⁵ Yi bobo sôsôlwo badi bana ba Lebi badedya bubokanda, badi yi mulangu ă kwangata mulambu ă makapa kudi bantu, luna biamatôya bwadi ; kudi bena kwabo, isanga bamabatuka mu makondo a Abalami ;

⁶ mo you utasoakala yi mukanda ă bulungu bwabo amangata mulambu ă makapa kudi Abalami, yi amamulwangwasana akadi muna bilaka,

⁷ Mo kutena mbata mwoso, muntu mubende amalwangwasanibwa kudi muntu umwadika kunengela.

⁸ Kunu lolo, bantu bafofwa bamangata mulambu ă makapa ; mo koku, you amatôbôlelebwa ene, udi yi moyo.

⁹ Yi ndo kutôya noku, isanga Lebi, amangata mulambu ă makapa, amafuta mulambu ă makapa kabidi munda mwa Abalami ;

¹⁰ bwalo bwakadiyi ukidi mu makondo a tetenci pakapomana Melekisedekye yinanci.

¹¹ Akali lolo kukuka dyendeli kuxelwa ku bubokanda bwa buna Lebi, (bwalo bwakapebwa bantu bwadi ku mucwe ă bubokanda bobu), ku bwalo kai kuxekwemana bunga bokanda bwa butonga bwa Melekisedekye, butasobadibwa muna butonga bwa Alono ?

¹² Bwalo bwamabambibwa dibambu, pa kukulumunibwa bubokanda, dia kukulumuna kabidi bwadi.

¹³ Bwalo you amatôyebwa bintu bebi ku bwalo bwanci akakwabanya yi bunga bulungu butasoakala yi muntu umoumwe amadingila kilongolelu.

¹⁴ Bwalo budi ololwo bwa Fumwecu, ene, akabatuka mu Yuda ; yi ku mucwe ă bulungu bobu, Mosese akadi kasotôya diyi dimodimwe dia makanda.

¹⁵ Yi bwalo bobu bwamadika kwakala ololwo, ndo bunga bokanda bulolwa yi bufwani bwa Melekisedekye,

¹⁶ bwamalungikibwa kumoni ku bwadi bwa mulangu ă munyu, kate ku ngulu ya môyo utabiyi kuxeleleka pô.

¹⁷ Bwalo bwamatôbôlebwa ene, Owe udi bokanda bwa kô kô bwa butonga bwa Melekisedekye.

¹⁸ Nako kudi kulengola mulangu ăkadi ku buxi ku mucwe ă kulebela kwau yi kimbombo kiau,

¹⁹ (bwalo butakukisa bwadi kintu kioso), yi kudi kukitisa mudingidilu ămadika loko utwakokyela pepe yi Ncembi ku mucwe ău.

²⁰ Yi bunga bwalo kabidi ; kakwakadi kutena kiteyelu kia kiteyi.

²¹ Bobo sôsôlwo bakatekyebwa makanda kutena kiteyi ; mo yei akatekyebwa yi kiteyi kiakateyebwa kudi you akatôya ku bwalo bwanci ene, Fumu akateya kiteyi, yi kanakwela lwombixi, ene, Owe ndo bokanda bwa kô kô.

²² Mbwôso mo nako Yisu akalwa luba lwa kusubisa disambi diamadika loko.

²³ Yi bobo sôsôlwo bakatekyebwa makanda mangi, bwalo bwakakandibwabo ku lufu, kabasadi ;

²⁴ mo yei, bwalo bwasalayi kô kô, udi yi bubokanda butasodikanana.

²⁵ Mbwôso kabidi ubili kubapandisa dyendeli bakokyela pepe yi Ncembi kudiyi, bwalo bwapwakalayi yi môyo matuku moso ndo kubatôyela.

²⁶ Bwalo bwakalelekyela bokanda bunene bwa noku ku bwalo bwecu, budi babala, butena nkanyi mibi, butena lobindu, bwamanamunibwa kudi bena bubi, bwamadikixibwa kulu kwa melu kulu ;

²⁷ butena yi bwalo bwa kudilongolela malongi, bea makanda aa manene ku dituku ku dituku, ku buxi bwalo bwa mabi anci mikyenci, yi kunyuma bwalo bwa mabi a bantu ; dilongi dedi ndo diakalongolayi ku kikondo kimokimwe dyendeli nya pakadilongolayi mikyenci.

²⁸ Bwalo bwamateka bwadi bantu makanda manene badi yi bubombu ; mo diyi dia kiteyi kiakateyebwa kunyuma kwa bwadi diamateka Mwana bokanda bunene amakukixibwa kô kô.