EBELEO 6 - Disambi Dipyadipya

¹ MBWÔSO tuxiyi diyi kunyuma dia bubangabanga bwa Kalistu, yi tudiki kuya ku bwabukulu ; kutena kwabaka kabidi kibangolelu kia kwela kwa lwombixi bwalo bwa makisa mafu, yi kia kwetabusa kwa Ncembi,

² kia kweyesa kwa binumeyelu, yi kia kubaka kwa makaci, yi kia kubisa kwa bafu, yi kia lopelo lwa kô kô.

³ Yi tunakwenca noku ndo Ncembi unakwetabusa.

⁴ Bwalo butasolubukwabo,—ku mucwe ă bantu bakalumuxibwa kalikali, yi bakakikisa dilongi dia diulu, yi bakatekyebwa basangilañani yi Mwoxixi a Babala,

⁵ yi bakakikisa diyi dinengela dia Ncembi, yi makisa a ngulu a mwociya ou utanalanda kulwa,

⁶ ndo baba banasaluka,— kabasolubukwa kubapingasa ku kwela kwa lwombixi ; badi mu kudikopekyela Mwana a Ncembi, yi badi mu kumuxipa bundu butupu.

⁷ Loboko lolu lwamanwa mai a mbula yilolwa kulu kwalu matuku moso, yi lwamalelañana bidibwa biamalelekyela yi bantu bamadimibwalu ku micwe yabo, Iwamalwangwasanibwa kudi Ncembi ;

⁸ mo ndo lwamalelañana mieba yi tumpedyampedi, lwamanyañanibwa, ludi pepe yi kufingibwa difingu ; yi ku sula kunakwoxebwalu mudilu.

⁹ Mo ku bwalo bwenu, banangibwi, twamakwetabuxixibwa malo adika aa noku loko, malo anamatañana yi kupandixibwa kwa môyo, isanga twamatôya noku.

¹⁰ Bwalo butasosaka Ncembi yi nkwami bea ndo kwelwa mudimo ěnu bwilwa, yi nyinga yinwamakwebesa bwalo bwa dina dienci, binwakasadila bena babala ; yi nukidi mu kukisa nako.

¹¹ Yi twakyeba bwalo bwa muntu mwoso yinenu a-ebesi mulukutu ă noku ku bwalo bwa kilubukilu kia mudingidilu ou pôi ku sula ;

¹² binutaxeakala bena mampoci, mo bokodi ba bantu bamakita bilaka bwalo bwa kwetabusa yi bwa bwika.

¹³ Ncembi, pakaxiyilayi Abalami kilaka, bwalo bwakasakayi mungaumwadika munene ndo kuteya kiteyi kudiyi, akateya kudiyi mikyenci

¹⁴ ene, Pa kukulwangwasana nakukulwangwasana sôsôlwo, yi pa kukulundisa bungi nakukulundisa ;

¹⁵ yi mo nako, pakadi amakwekyela yi kiekyelo kia bwika, akangata kilaka.

¹⁶ Bwalo bwateya bantu biteyi kudi you ubadika munene, yi ku bwalo bwabo bwoso, kiteyi kuteyebwa kidi kisudeyelu kia mbata mwoso.

¹⁷ Mo nako Ncembi, bwalo bwakakyebayi kwebesa bakitañani ba kilaka lukanyi lwanci dyendeli lutabiyi kukulumuka, akadisokyeya yi kiteyi ;

¹⁸ mbwôso ku mucwe ă bintu bibidi bitabiyi kukulumuka, bitabiyi Ncembi kudimba kudibio, ndo kutuxeakala coco yi kibondelu kia ngulu, bamacina ku kicininu ndo kubamba mudingidilu ămatekyebwa ku mpala ecu ;

¹⁹ utudi yinau bea ngindu a mucima udi nku yi bô, amabwela mu kidi kidi munda mwa ngumbu a mbuxa ;

²⁰ mwakabwela Yisu, mukyenci ku bwalo bwecu, amalwa bokanda bunene bwa kô kô bwa butonga bwa Melekisedekye.