EBELEO 5 - Disambi Dipyadipya

¹ BWALO bokanda bwoso bunene bwamasokolebwa kudi bantu, bwamalungikibwa ku micwe ya bantu mu bintu bidi bwalo bwa Ncembi bixelongolayi malongi yi bixipilu bwalo bwa mabi ;

² ubili kwekyela bikyebikye yi bantu batasolubukwa yi bantu bamaungaunga, bwalo bwamadingibwayi mikyenci yi bubombu ;

³ yi ku mucwe ou kudiyi yi dibambu dia kudilongolela malongi bwalo bwa mabi bea ku micwe ya bantu.

⁴ Yi kakuna muntu amadiangacila mudimo ou ă bowa, kate you amabikidibwa kudi Ncembi, luna biakadi Alono kabidi.

⁵ Mo nako Kalistu kabidi akadi kasodibandisa mikyenci ndo kutekyebwa bokanda bunene, kate you akamutôyela ene, Owe ndo Mwanami ; ku dituku dedi ndo kunamakulela Owe ;

⁶ bea biatôyayi kabidi mu kinga kidi ene, Owe udi bokanda bwa kô kô bwa butonga bwa Melekisedekye.

⁷ Yei, ku matuku a munyu ănci akalonga ndombu yi milombelelu yi kudila kwa ngulu yi masonci, kudi you akalubukwa kumupandusa mu lufu, yi akakwombwebwa ku bwalo bwa diedya dienci bwalo bwa Ncembi ;

⁸ kayou, isanga akadi Mwana, kaninga akakweya diedya ku bintu biakatatayi ;

⁹ yi pakadi amakukixibwa akalwa mupangañani a kipandilu kia kô kô, ku bwalo bwa bantu boso bamwedeya ;

¹⁰ amatambibwa kudi Ncembi bokanda bunene bwa butonga bwa Melekisedekye.

¹¹ Ku bwalo bwanci, tudi yi mambi mangi kutôya adi kukola kusakola, bwalo bunwamalwa yi buxitu ku macu pa kwombwa.

¹² Pakala nonu nuxeakala beyexi ku bwalo bwa kikondo kiamadika, nutani kabidi yi bwalo bwa muntu kunweyesa bikoma bia bubangabanga bwa mambi a Ncembi, yi nwamalwa bea bantu baxenwa mabele, kumoni kudya bidya bikola.

¹³ Bwalo butena muntu mwoso unonwa mabele yi bwanya mu diyi dia nkwami, bwalo budiyi kana kabende ;

¹⁴ mo bidya bikola bidi bwalo bwa babakulu ba bantu, bobo bamakwekyela ekyela yi kukisa ; ndo bidibo yi bwinu bwa kuxiyañanisa yi kunengela yi bubi.