EBELEO 4 - Disambi Dipyadipya

¹ MBWÔSO tucini bowa, bwalo bukidiko kilaka kiakaxiyidibwa kia kubwela mu kiomowelu kienci, ximbi ambeci muntu mwoso enu uxeakala ulexi yi kuxikila.

² Bwalo butwamakwambidibwa losangu lunengela luna bobo kabidi ; kate diyi dia losangu diakadi kadisobatetowesa, bwalo butaputolebwadio yi kwetabusa mu bantu baba bakakwombwa.

³ Bwalo butwabwela mu kiomowelu kieki bamakwetabusa ; bea biakatôyayi ene, Binakateya kiteyi ku bituku biamene, ene, kabanabwela mu kiomowelu kiamene pô ; isanga makisa akamanibwa pôi kibangolelu kia loboko.

⁴ Bwalo bwamatôyayi mu kinga kidi dia dituku dia sambwali noku ene, Ncembi akakwomowa ku dituku dia sambwali ku makisa anci moso ;

⁵ yi ku kidi kieki kabidi ene, Kabanabwela mu kiomowelu kiamene pô.

⁶ Mbwôso biapwakala bwalo noku ene, banga baxebwela momu, yi bobo bakakwambidibwa losangu lunengela kalikali bakaxikila dia kubwela bwalo bwa ntamu,

⁷ ndo biakalungikayi dinga dituku kabidi ene, Lelo ; pa kutôya mu Dafidi kunyuma kwa kikondo kingi ene, Lelo akali nunakwombwa diyi dienci, kanukolexi micima yenu.

⁸ Bwalo butaxetôyayi dia dinga dituku kunyuma, ndo Yoxuwa akababwesa mu kiomowelu,

⁹ Mbwôso kiomowelu kia Sabado kiamasala bwalo bwa bantu ba Ncembi.

¹⁰ Bwalo you amabwela mu kiomowelu kienci amakwomowa bwalo bwa makisa anci, bea biakakwomowa Ncembi ku bwalo bwa makisa anci.

¹¹ Mbwôso tupalali yi mwokulu kubwela mu kiomowelu kieki, bitaxepona muntu mwoso ku bufwani bobu bwa ntamu.

¹² Bwalo budi diyi dia Ncembi yi môyo yi kucwa, diamadika mwele mwoso ă mpala ibidi kucwa, diamatubula isanga kunamuna yi mucima yi kidimu bonamu, yi manyungu yi bwongo bwa mifwa ; dibili kukala mitôyelu ya munda yi nkanyi ya mucima.

¹³ Yi kipangu kakinako kitasoakala ololwo ku meso anci ; mo bintu bioso bidi mataka yi biamakwebexebwa ololwo ku meso a you utudi yinanci bwalo.

¹⁴ Mbwôso bwalo bututani yi Bokanda bunene bunene bwamadika melu moso kulu, Yisu Mwana a Ncembi, tubambi kusakola kwecu nda.

¹⁵ Bwalo bututasoakala yi bokanda bunene butabiyi kwombwela mabombu ecu mwengo, mo bwakakwelekyexebwa mu bintu bioso luna coco, kutena bubi.

¹⁶ Mbwôso tukokyeli yi mucima ku lukwasa lwa lwoxixi, bituxeangata mwengo, yi bituxesañana lwoxixi lwa kutukwacisa ku kikondo kia loko.