EBELEO 3 - Disambi Dipyadipya

¹ MBWOSO, bakunyi ba babala, bamangata makapa ku kubikidibwa kwa diulu, nunamacisi nkanyi yenu kudi Mutumibwi yi Bokanda bunene bwa kwetabusa kwecu kutwasakola, Yisu ;

² akadi muna kibaku ku mpala a you akamulungika, bea biakadi kabidi Mosese mu bungi bwa ncibo anci.

³ Bwalo bwamakwelekyexebwayi ene, amalelekyela yi dikai diamadika dedi dia Mosese bea biamadika you kutumba akapanga ncibo, kumoni ncibo mikyenci.

⁴ Bwalo bwamapangibwa ncibo mwoso kudi muntu, mo you akapanga bintu bioso udi Ncembi.

⁵ Mosese sôsôlwo akadi muna kibaku mu bungi bwa ncibo anci, bea musadi, bwalo bwa ntôbô ya bintu bebi bixekwambidibwa kunyuma ;

⁶ mo Kalistu bea Mwana, kulu kwa ncibo anci ; utudi ncibo anci coco, akali twamabamba mucima ěcu nda pôi ku sula, yi mwanu ă mudingidilu ěcu.

⁷ Mbwôso, bea biamatôya Mwoxixi a babala, ene, Lelo, ndo nunakwombwa diyi dienci,

⁸ kanukolexi micima yenu bea ku kikondo kiakanguxengesabo, bea mu diba dia kielekyexelu mu mbata a kisobe,

⁹ mwakangwelekyesa batetenu pa kungukikisa, yi bakamona makisa amene mbula masangi anai.

¹⁰ Ndo binakanyungula kungi ku mucima bwalo bwa mwociya yiwa, yi nakatôya ene, Bamaungaunga matuku moso mu micima yabo ; mo bantu baba kabalembetela miesambu yamene ;

¹¹ binakateya kiteyi ku bituku biamene, ene, Kabanabwela mu kiomowelu kiamene pô.

¹² Nudingili bakunyi, ximbi ambeci munda mwa muntu enu mwoso muxeakala mucima mubi utena yi kwetabusa, ă kuncuka kudi Ncembi a môyo ;

¹³ kate nubondañani ku dituku ku dituku, pakala pamabikidibwa ene, Lelo ; bitaxekolexebwa muntu enu mwoso ku ncimi a bubi.

¹⁴ Bwalo butukyelwa basangilañani yi Kalistu, akali twamabamba bubangabanga bwa kwetabusa kwecu nda pôi ku sula ;

¹⁵ bwalo bwamatôyebwa ene, Lelo, ndo nunakwombwa diyi dienci, kanukolexi micima yenu, bea ku kikondo kiakanguxengesabo.

¹⁶ Bañani pako, pakakwombwabo, bakaxengesa ? Ape ka bungi bwabo bakabatuka mu Ecipito muxi mwa Mosese ?

¹⁷ Yi akakwombwela bañani bituku mbula masangi anai ? Ka bantu bakakwona, bakamwangalaka mimbidi yabo mu mbata a kisobe ?

¹⁸ Yi ku bwalo bwa bañani kwakateyayi kiteyi ene, kababwedi mu kiomowelu kienci, batena bantu bakadi bena ntamu ?

¹⁹ Twamamona lolo ene, bakadi kababiyi kubwela bwalo bwakasakabo yi kwetabusa.