EBELEO 13 - Disambi Dipyadipya

¹ NYINGA ya bakunyi yasali.

² Kanwelu kwebesa bantu babene nyinga ; ku noku kwamangata banga bantu bangele kutena kulubukwa.

³ Nweli bantu nkanyi badi ku nkanu, kulexi yi ndo nwamasukibwa yinabo ; yi bobo lolo bamakolomonebwa, bwalo bunudi mikyenu kabidi mu mumbidi.

⁴ Bwalo bwa dibakwa bunemekyebwi kudi bantu boso, yi ntangi kasaludibwi ; bwalo bunasambola Ncembi badibi yi bena mendela.

⁵ Mwosambu ě nu ăkali kutena nyinga ya bima ; micima yenu yibakami yi bintu bidi yinenu ; bwalo bwamatoya yei ene, Meme kinakuxiya nyô, kanana, meme kinakukadeya nyo.

⁶ Ndo bitwatôya yi mucima unengela ene, Fumu udi musamunini amene ; kinacina ; muntu unakwenca kai yinami ?

⁷ Nweli milopwe yenu nkanyi yakanutôyela diyi dia Ncembi ; yi nwokoli kwetabusa kwabo, bwalo bunwatebela ku sula kwa mwosambu ăbo.

⁸ Yisu Kalistu ulexi, mankyelo, yi lelo, yi ku mieciya mioso.

⁹ Kanuncudibwi ku kweyesa kwabene kwa ntonga yi ntonga ; bwalo budi loko mucima kusubixibwa yi lwoxixi, kumoni yi bidya ; bobo pako bamakwenda yi milangu ya bidya bakadi kabasotetowa pô.

¹⁰ Coco tudi yi kilongolelu kitenabo yi bumanya bwa kudya kudikio bamaxingila ku ncibo a bixeba.

¹¹ Mimbidi ya nyama yei yamacwadibwa maxi ayo mu bidi bia babala kudi bokanda bunene ku mucwe ă bubi, yamakwoxebwa kunci kwa kingandu.

¹² Mbwôso Yisu kabidi, bixebalolayi bantu ku maxi anci mikyenci, akatata kunci kwa kibwelelu kia bula.

¹³ Coco lolo tubatuki kuya kudiyi kunci kwa kingandu, tudi mu kucwala bundu bwanci.

¹⁴ Bwalo bututena yi bula kunu bwasala, kate twapalala bobu bulolwa.

¹⁵ Tulongoli Ncembi lolo dilongi dia misambu kudiyi matuku moso, dimoma dia milomo yamasakola sakola dina dienci.

¹⁶ Mo kanwelu dia kulwangwasana bantu yi dia kupapapa bintu ; bwalo bwamaxekyelela Ncembi malongi a noku.

¹⁷ Nwedeyi milopwe yenu, yi nudipwesi mikyenu kudibo ; bwalo bwakyesabo butuku yi kudingila micima yenu, luna bantu banasakola bwalo ; bixekwencabo nako yi kiango, kumoni yi mikabanu ; kusakola yi mikabanu kuxenupwekyelesa nonu.

¹⁸ Nutulombeli, bwalo butwalubukwa sôsôlwo ene, tudi yi kilubukilu kinengela, yi twakyeba kwendendenda yi nkwami ku bintu bioso.

¹⁹ Yi ngwadika kunubondabonda noku kungi, binxepingaxibwa kunudi mangwoso.

²⁰ Ncembi a polo akapingasa kalama kanene ka mikwakwa kudi bafu bwalo bwa maxi a disambi dia kô kô, isanga Fumwecu Yisu,

²¹ anukukisi mu kintu kioso kinengela binuxekwenca nyinga yenci, udi mu kukisa bwalo munda mwenu budi yi ñonu ku meso anci, kudi Yisu Kalistu ; kudiyi kwakali dikai ku mieciya ya mieciya. Amen.

²² Mo nwabondabonda bakunyi, ene, nwombwi diyi dia kibondelu ; bwalo bunamanufundila mu meyi mabende.

²³ Nulubukwi ene, muna kwecu Timoteo amalekyelebwa ; aka yei ulolwa mangwoso, nakunumona yinanci.

²⁴ Nubisi milopwe yenu mioso, yi bungi bwa bena babala. Bobo badi bena Italia banwabisa.

²⁵ Lwoxixi Iwakali yinenu bungi bwenu. Amen.