2 PITA 1 - Disambi Dipyadipya

¹ XIMONO PITA, musadi yi mutumibwi a Yisu Kalistu, kudi bantu bamangata kwetabusa kumokumwe yinecu kwa dipiko, ku nkwami ya Ncembi yi Mupandixi ecu Yisu Kalistu ;

² lwoxixi yi polo bilelexebwi yinenu bungi bungi mu kilubukilu kia Ncembi yi kia Yisu Fumwecu.

³ Ngulu yenci ya buNcembi bwanci yamatupa bintu bioso biamalelekyela yi môyo yi mwosambu ă Ncembi, ku kilubukilu kia you akatubikila ku dikai yi ku dikimu.

⁴ Ku mucwe ăbio ndo kwamatulongolayi bilaka bienci bia dipiko, biamadika bunene ; binuxelwa babanyañani kudibio yi butonga bwa buNcembi, bwalo bunwamapanda musalu udi ku loboko ku mucwe ă luxindilu.

⁵ Mo ku mucwe ou kabidi, nwakali yi mulukutu mwoso, mu kwetabusa kwenu ndo kwakala yi dikimu, mu dikimu kwakala yi kilubukilu,

⁶ mu kilubukilu kwakala yi mulangu, mu mulangu kwakala yi bwika, mu bwika kwakala yi mwosambu ă Ncembi,

⁷ mu mwosambu ă Ncembi kwakala yi nyinga ya bakunyi, mu nyinga ya bakunyi kwakala yi nyinga.

⁸ Bwalo ndo bintu bebi bidi munda mwenu yi biamayiba bungi kanunakala yi ndo bompoci ndo bokuta mu kilubukilu kia Fumwecu Yisu Kalistu.

⁹ You asaka bintu bebi udi mufofo, muna lumonena, amakwelwa kukusudibwa kwa mabi anci a kalikali.

¹⁰ Mbwôso bakunyi, nupalali yi mulukutu kwakala yi kilayixilu bwalo bwa kubikidibwa kwenu yi bwa kusungudibwa kwenu ; bwalo ndo nwencenca bintu bebi, kanunapona pô ;

¹¹ mo nako kibwelelu kinanudipudibwa kingi kingi mu bufumu bwa Fumwecu yi Mupandixi ecu Yisu Kalistu bwa kô kô.

¹² Mbwôso kinakodya kunwelesa bintu bebi nkanyi matuku moso, isanga nwamabilubukwa yi nwamasubixibwa mu sôsôlwo a nkyekyu you.

¹³ Mo ngwencenca ene, kudi yi nkwami, pakala meme ndi mu ngandu kieki, kununyingisa ndo kunwelesa nkanyi ;

¹⁴ bwalo bulolwa kikondo mangwoso kia kuncula kingandu kiamene, bea biamangwebesa Fumwecu Yisu Kalistu.

¹⁵ Mo nakupalala yi mulukutu ene, ku kikondo kioso kunyuma kwa kibatukilu kiamene, nuxelubukwa kwela bintu bebi nkanyi.

¹⁶ Bwalo bututalandili tufumu twamapangibwa yi bwinu, patwakanusakolela ngulu ya Fumwecu Yisu Kalistu yi kilulu kienci, kate twakadi batôbôdi bakamona bunene bwanci ku meso.

¹⁷ Bwalo bwakangatayi bunene yi dikai kudi Ncembi Tete, pakamufikixibwa diyi ku dikai diamadika lwoxixi ene, You udi Mwanami munangibwi unapuxekyelela meme ;

¹⁸ yi dedi diyi, coco twakadiombwa diakafikixibwa mu diulu, patwakadi yinanci ku lupongo lwa babala.

¹⁹ Yi tutani yi diyi dia kidimuxilu diamadika kusuba nkyekyu, dinwencenca loko ndo nudiadingila, bea mwinda ămalumuka mu kidi kia mbindu ; pôi kikondo kinakya butuku yi mutoto ă lubangu unabanda mu micima yenu.

²⁰ Mo nulubukwi bwalo bobu buxi ene, kakuna kidimuxilu kimokimwe kia mukanda ă Ncembi kixesakolebwa pa bwakio.

²¹ Bwalo butafikixibwa kidimuxilu kioso pô ku nyinga ya bantu, kate bantu ba babala ba Ncembi bakatôya bea biakatôyexebwabo kudi Mwoxixi a babala.