2 KOLINTI 8 - Disambi Dipyadipya

¹ TUNWALUBUKISA kabidi bakunyi, dia lwoxixi lwa Ncembi lwamapebwa bikokye bia Makyedonia,

² ene, isanga bakakwelekyexebwa yi buxitu bungi, kaninga kiango kiabo kingi kisambika yi bokombi bwabo bungi kiakalelañana madidi a malongi mangi kudibo.

³ Bwalo bungwatôbôla ene, bakakwetabusa biabo kumoni ku lwedi lwabo lutupu, mo isanga kudika lwedi lwabo ;

⁴ yi bakatuxengula yi kuxengula kungi ku bwalo bwa lwoxixi lolu, yi bwa busangilañani bwa kupapapa bena babala.

⁵ Kumoni lolo mutwakadingila mutupu ; mo ku buxi kwakadilongolabo mikyeabo kudi Fumu yi kutudi ku nyinga ya Ncembi.

⁶ Bitwakalomba Tito, bwalo bwakabangayi buxi, ene, amani lwoxixi lolu noku kabidi munda mwenu.

⁷ Yi bwalo bunwalekola yi kintu kioso, yi mwetabusu, yi diyi, yi kilubukilu, yi mulukutu mwoso, yi nyinga yenu ku bwalo bwecu, nulekoli yi lwoxixi lolu kabidi.

⁸ Kisotôya luna kunulanga mulangu, mo ku bwalo bwa mulukutu ă banga bantu, luna kwelekyesa nyinga yenu ndo idi sôsôlwo.

⁹ Bwalo bunwalubukwa lwoxixi lwa Fumwecu Yisu Kalistu, ene, isanga akadi yi bodidi akatulowa mwokombi ku micwe yenu, binuxeakala yi bodidi bwalo bwa bokombi bwanci.

¹⁰ Yi ku bwalo bobu, meme nwakwamina mpanga ; bwalo meme kukisa noku kudi loko ku bwalo bwenu, bakabanga kalikali kumoni kwenca kutupu kate kunanga nako, lwedi lwa mbula muncimancima.

¹¹ Mbwôso nkyekyu numani kwenca kabidi ; byaka bea binwakadi yi nyinga ya kunanga nako ndo binunamana kwenca nako ku lwedi lwa bintu binudi yinabio.

¹² Bwalo ndo nyinga idiko, yamamonebwa loko ku lwedi ludi muntu yinalu, kumoni ku lwedi lutasoakalayi yinalu.

¹³ Kakuna ndo kuncula banga bantu maxitu yi kunubaka maxitu nonu ;

¹⁴ kate ndo kwelekyesa bintu bileli ; bintu bienu bungi ku kikondo kiekio bixeakala ku bwalo bwa bokombi bwabo ; bixeakala bintu biabo bungi kabidi ku bwalo bwa bokombi bwenu ; bixeakala bintu bileli ;

¹⁵ bea biakafundibwa ene, You akadi yi bintu bingi akadi kasoxiya kintu ; yi you akadi yi bintu bibende akadi kasosaka.

¹⁶ Mo Ncembi axingibwi biloba akanutekyela mulukutu ou mu mucima ă Tito.

¹⁷ Bwalo bwakakwetabuxilayi lulombu lwecu ; mo bwalo bwakadiyi yi mulukutu mungi, ndo bwakayayi bienci kunudi.

¹⁸ Yi twamatuma yinanci mwakunyi you udi yi lotumbu lwanci bwalo bwa losangu lunengela mu bikokye bioso ;

¹⁹ yi kumoni noku kutupu, kate akasungudibwa kabidi kudi bikokye ndo kwenda yinecu yi lwoxixi lolu, lutanalongolebwa kutudi ndo kulundisa dikai dia Fumu, yi bwalo bwa nyinga yecu.

²⁰ Tudi mu kudingila ximbi muntu uxetukama dikamu bwalo bwa lwoxixi lolu lutanalongolebwa kutudi ;

²¹ bwalo butwelela bintu nkanyi bidi yi nkwami kumoni ku meso a Fumu kutupu, kate ku meso a bantu kabidi.

²² Yi twamatuma muna kwecu you yinabo utwamasañana matuku mangi yi mulukutu mu bintu bingi, mo nkyekyu amadika yi mulukutu mungi mungi, bwalo bwa mwetabusu mungi ăpwakalayi yinau bwalo bwa kwetabusa kudiyi yinaku ku bwalo bwenu.

²³ Ndo ku bwalo bwa Tito, udi mbai amene yi musadisanani yinami ku bwalo bwenu ; ndo ku bwalo bwa bena kwecu, badi batumibwi ba bikokye, dikai dia Kalistu.

²⁴ Mbwôso nubebesi kilembetelu kia nyinga yenu, ku mpala a bikokye, yi kia mwanu ěcu utwañana ku mucwe ěnu.