2 KOLINTI 7 - Disambi Dipyadipya

¹ MBWÔSO bwalo bututani yi bilaka bebi banangibwi, tudikusuli mikyecu ku lobindu lwoso lwa munyu yi lwa kidimu, twombudisi babala mu bowa bwa Ncembi.

² Nutudipuli kidi ; coco katwoneni muntu umoumwe ; katusaludili muntu umoumwe ; katudimbili muntu umoumwe.

³ Kisotôya nako bwalo bwa kunubela ; bwalo bunakatôya kalikali ene, nonu nudi mu micima yecu ndo kufwañana yinenu kidi kimokimwe ndo kwakala yi môyo yinenu kidi kimokimwe.

⁴ Mucima ămene ă kutôya ku bwalo bwenu udi mungi ; mwanu ungwañana ku bwalo bwenu udi mungi ; namakwolubixibwa yi kibondelu ; namapulowa yi kiango mu maxitu ecu moso.

⁵ Isanga bitwakalwa mu Makyedonia, munyu ecu ăkadi kauna yi polo pô ; kate twakadi yi buxitu ku mwanca mwoso ; kunci kwakadi bitumba, yi munda mwakadi bixesa.

⁶ Kaninga yei abondabonda bantu bamapwexebwa, isanga Ncembi, akatubondabonda ku kilulu kia Tito ;

⁷ yi kumoni ku kilulu kienci kitupu, kate yi kibondelu kabidi kiakabondebwayi ku bwalo bwenu, pakatwambilayi dia nyinga yenu, dia bidilu bienu, yi dia mucima ěnu ku bwalo bwamene ; binakadika kuxekyelela.

⁸ Mbwôso isanga nakanudidisa yi mukanda, kisokwela lwombixi, isanga nakakwela lwombixi ; bwalo bungwalembetela ene, mukanda ou ăkanudidisa, isanga mo kakondo.

⁹ Nkyekyu ngwaxekyelela kumoni bwalo bunwakadidixibwa, kate bwalo bunwakadidixibwa ku kwela kwa lwombixi ; bwalo bunwakadidixibwa yi mudidilu ă Ncembi, binutaxepwekyelela yi kintu kioso kutudi.

¹⁰ Bwalo bwa bidilu bia Ncembi biamakwelesa bantu lwombixi ku kipandilu kia môyo kitasokwelebwa lwombixi ; mo bidilu bia loboko ndo biencencañana lufu.

¹¹ Numoni bwalo bobu ; binwakadidixibwa yi mudidilu ă Ncembi, mwakakwencau munda mwenu ; kai mwokulu, ya, kai sakolo, ya, kai bituku, ya, kai bowa, ya, kai nyinga, ya, kai mulukutu, ya, kai sombo. Ku bintu bioso ndo ku nwamadiebesa mikyenu susu ku bwalo bobu.

¹² Mbwoso isanga nakanufundila, kifundili ku bwalo bwanci bwa you akakwenca bubi, ndo ku bwalo bwanci bwa you akakwencebwa bubi, kate bixenwebexebwa mulukutu ěnu ă mudimo ku bwalo bwecu ku meso a Ncembi.

¹³ Mbwôso twakabondebwa ; ya, twakadika kuxekyelela mu kibondelu kiecu bwalo bwa kiango kia Tito ; bwalo bwakasubixibwa mucima ănci kunudi bungi bwenu.

¹⁴ Bwalo ndo namakwana mwanu mwoso ku mpala anci ku bwalo bwenu, kisoxipibwa bundu ; kate bea bitwakanwambila nonu malo moso mu sôsôlwo, ndo biamasañanibwa mwanu ěcu sôsôlwo utwakakwana ku mpala a Tito.

¹⁵ Yi nyinga yenci ya munda yamalekola bungi ku bwalo bwenu, pelelayi diedya dienu lukanyi dia bungi bwenu, munwakamwangata yi bowa yi lukomba.

¹⁶ Ngwaxekyelela bwalo buntani yi kwetabusa ku bwalo bwenu mu bintu bioso.