2 KOLINTI 6 - Disambi Dipyadipya

¹ MBWÔSO coco, badi mu kusalañana yinanci mudimo umoumwe, tunwabondabonda kabidi ene, Kanwangaci lwoxixi lwa Ncembi kanana.

² Bwalo bwatôyayi ene, Namakwombwa mu kikondo kia kumonebwa yi dikasa dinenge la, yi namakusamunina mu dituku dia kupandixibwa ; mona nkyekyu kudi kikondo kia kumonebwa yi dikasa dinengela ; mona, nkyekyu kudi dituku dia kupandixibwa.

³ Katusoteka kiponexelu mu kintu kioso, bitaxekamibwa busadi bobu dikamu.

⁴ Kate tudi mu kudiebesa mikyecu ku malo moso bea basadi ba Ncembi ; mu bwika bungi, mu maxitu, mu makombi, mu mpeya,

⁵ mu miekolola, mu nkanu, mu miyengi, mu midimo, mu kukyesa kwa butuku, mu kuncila kwa bidya ncilu ;

⁶ mu babala, mu kilubukilu, mu kicwandundu, mu bonkangi, mu Mwoxixi a babala, mu nyinga yitena yi mancanga ;

⁷ mu diyi dia sôsôlwo, mu ngulu ya Ncembi ; ku bipiko bia nkwami pa kidyo yi pa kimoso ;

⁸ ku kutumbixibwa yi ku kukixibwa ; ku mwoximo mu bi yi ku mwoximo unengela ; bea bena ncimi kate yi sôsôlwo ;

⁹ bea bantu ba kanana, kate twamalubukibwa ; bea bena bieyeyeyo, kate mona, tudi yi môyo ; bea bantu bamakumibwa, kate katusoxipibwa ;

¹⁰ bea bena bidilu, kate twaxekyelela matuku moso ; bea bakombi, kate twamateka bantu bangi yi madidi ; bea bena makaci matupu, kate twapwangata bintu bioso.

¹¹ Musuku ěcu ămanudipudibwa, bena Kolinti ; mucima ěcu ămadipudibwa.

¹² Nonu kanusoximbibwa munda mwecu, mo nwamaximbibwa mu nyinga yenu mikyenu.

¹³ Nkyekyu bwalo bwa sayi ya butonga bobu kusayidibwa, (ngwatôya bea kudi bana), nonu nudipudibwi kabidi.

¹⁴ Kanusambikibwi yi bantu batasokwetabusa, batena bileli. Kudyañana kwa beci kudiko kwa nkwami yi lwonu ? Ndo kusangilañana kwa beci kudiko kwa obo yi mwedima ?

¹⁵ Yi kulelekyelañana kwa beci kudiko kwa Kalistu yi Beliala ? Ndo kwabanyañana kwa beci kudiko kwa mwetabuxi yi muntu utasokwetabusa ?

¹⁶ Yi kwetabusañana kwa beci kudiko kwa tempelo a Ncembi yi ngixi ? Bwalo bunudi tempelo a Ncembi a môyo ; bea biakatôya Ncembi ene, Meme nakwakala munda mwabo ; yi nakwenda munda mwabo ; yi nakwakala Ncembi abo, yi bobo banakala bantu bamene.

¹⁷ Mbwôso Fumu ene, Nusokowi kudibo, nubalolebwi ; kanukwaci bwalo bwoso bwa mbindu ;

¹⁸ yi meme nakunwangata, yi nakwakala yinenu Tete, yi nonu nunakala yinami bana ba babalumi yi ba babakaxi ; Fumu a ngulu mioso ndo atôya noku.