2 KOLINTI 5 - Disambi Dipyadipya

¹ BWALO butwalubukwa ene, aka ncibo ecu a loboko unalwa sasudibwa a kingandu kieki, tudi yi ncibo a Ncembi, ncibo utasokwencebwa yi makaci, a kô kô, mu diulu.

² Bwalo butwakabana munda mwa you noku, tudi mu kukyeba ndo kulata ncibo ecu a mu diulu,

³ ndo coco sôsôlwo pa kulacibwa katusosañanibwa yi butaka kabidi.

⁴ Bwalo coco tudi mu kingandu kieki twamakabana, tudi yi buxitu ; kumoni bwalo bwa kupuludibwa, kate bwalo bwa kulata, bixeminibwa kufwa kudi môyo.

⁵ You lolo akatupanga bwalo bwa kintu kiekio udi Ncembi, amatupa kabidi kibutuku kia Mwoxixi.

⁶ Mbwôso tudi yi mwetabusu matuku moso, yi twamalubukwa ene, bitwakala yi kidi kiecu mu mumbidi twamakala kunga ku bwalo bwa Fumu ;

⁷ (bwalo butwendenda ku kwetabusa, kumoni ku meso) ;

⁸ tudi yi mwetabusu pako, yi twatunga kwakala kunga ku bwalo bwa mumbidi, yi kwakala yi kidi kiecu kwa Fumu,

⁹ Mbwôso lomo lwecu lwamakwapema kumuxekyelesa ndo kunu ndo kunga.

¹⁰ Bwalo butunakwebexebwa bungi bwecu ku buxi bwa kisambolelu kia Kalistu ; bixeangata muntu mwoso malo a mu mumbidi bea biamakwencayi, ndo anengela ndo mabi.

¹¹ Mbwôso bwalo butwalubukwa bowa bwa Fumu, coco twamakwetabuxisa bantu ; mo twamakwebexebwa kudi Ncembi, yi ngwencenca ene, twamakwebexebwa kabidi mu bilubukilu bienu.

¹² Katusodialakana mikyecu kabidi kunudi, kate tunwalongola kianinu kia kutwanina mwanu, binuxeakala yinakio ndo kubapingasa bañana mwanu ku bwalo bwa mumbidi mutupu, kumoni bwalo bwa mucima.

¹³ Ndo lolo twakala bea bantu bamapasuka, kudi bwalo bwa Ncembi ; ndo tutani yi lukanyi lwa mulangu, kudi ku bwalo bwenu.

¹⁴ Bwalo bwamatubamba nyinga ya Kalistu dibambu ; bwalo butwasambola noku ene, ndo muntu umoumwe akafwila bantu boso, bantu boso lolo bakafwa ;

¹⁵ yi akafwila bantu boso ene, bobo bakala yi môyo kabaxeakala yi môyo ku bwalo bwabo mikyeabo nyô, kate ku bwalo bwa you akafwa yi akabika kabidi ku micwe yabo.

¹⁶ Mbwôso pôi nkyekyu katusolubukwa muntu umoumwe yi mulubukilu ă munyu ; isanga twakadi twamalubukwa Kalistu yi mulubukilu ă munyu, katusomulubukwa nako kabidi nyô.

¹⁷ Mbwôso ndo muntu mwoso udi munda mwa Kalistu, ka kipangu kipyakipya kieki ; bintu bia kalikali biamadika ; mona, bintu bipyabipya bidiko.

¹⁸ Yi bintu bioso bidi bia Ncembi amatukwameya kidi kimokimwe yinanci mikyenci kudi Kalistu, yi amatupa busadi bwa kukwameyañana ;

¹⁹ ene, Ncembi akadi munda mwa Kalistu ; udi mu kukwameya loboko yinanci mikyenci kidi kimokimwe ; kutena kubabadila mona abo ; yi amabwesa diyi munda mwecu dia kukwameyañana.

²⁰ Mbwôso tudi mikyenci ku mucwe ă Kalistu ; kulexi yi ndo Ncembi udi mu kubondabonda kutudi ; twamaxengula ku mucwe ă Kalistu ene, Nukwameyebwi yi Ncembi kidi kimokimwe.

²¹ You utalubukwa bubi, yei akamuteka bubi ku mucwe ěcu ; bituxeakala nkwami ya Ncembi munda mwanci.